Mataafa Sooketa 32 - Mataafa Qulqulloota

Pahana innayya a warqeetoppa kodameeti

¹ Samayta ete akkima Muuse irroota qara jare ka lekkanni in kinnin akkeeyye, Arooni kapopa ollopa aane ka ishi kide, “Wa Muusese piita Kipsi kara ino sookshe qara kaye an upnooy, waaqadda ino tura aana ino kode.”

² Arooni ka ishootta kide, “Sira warqeeta nappaappa a iskattaayshina ka a hellaassin a diira isho a tuparra ollopa poha ka ana kapopan xooya.”

³ Samayta piisa ka nappaasso oppaayye sirasene a warqeeta sossookshe ka Arooni kapopan aane.

⁴ Ikka ishootta qara warqewwasene qeede; ka liilshe ka pahana innayya okkattati kode; Samayta ka kide, “Isira'eleteeyye, waaqaddasene piita Kipsi kara ishin sookshe tooy sene.”

⁵ Arooni ete sede akkeeyye, pahanasene a innayya okkatta tura'e pora kalisoota kode ka salishe ka kide, “Parriyyi kuyyaata a xaysonessuma Yaahiwwe.”

⁶ Parraytaadi paraappan samayta ka xa'e ka kalisoota kupnnitto isho a takkumta kalshe ka damta ka ikkayta kuti'e ka oori kirpa'e piite xa'e.

⁷ Yaahiwwe ka Muuse kide, “Samaytase xaayti a piita Kipsi kara sookisse juppoota kodeey, lekkado.

⁸ Saanta an ishootta ajaje qara jarjartan alle maqen ka pahana innayya okkatta a liilsame issi kodaden ka ishootta sakataden ka ishootta kalisoota kalshen ka kidene, ‘Isira'eleteeyye waaqaddasene piita Kipsi kara ishin sookshe tooy sene.’

⁹ Anti samayse in akke; tin ishootta kan samayta a xolma kokshe.

¹⁰ Amma miiriyyo a kuttati ishootta qara opaye, Anti ishoottan pashshaay, qaraayye anan dawran.” Anka samayta kuttayta ke kara sooksha.

¹¹ Muuse xoori Yaahiwwe Waaqase xaadi naappade ka kide; “Oo Yaahiwwe, samayse xaayti a hupnase xaayti kutta ka harkase xaayti kokkokan Kipsi kara sookisse qara'e maana'e miiraayti asse opaya?

¹² Kipseeta maana'e kiita, ‘Ha qoota neequmta ishootta qapo malla irrowwa qara ishootta pira'e ka piita qara ishootta patissa'e ishootta sookshe.’ Aarase xaayti a apitta mina opaye alle harfisado ka ishootta diishe ka samaytaayti qara'e wa neeqa an qeedan.

¹³ Akka orxayaasene xaayti Aprihaami ka Hisaaqi isho Yayqoopi mattaayti issin xaate ka kiite, ‘Sanynyeetaaytin akka hiikka moonta mina leksha ka piisse are kitto an ke kippeeta daashe sanynyeetaayti daashe, ikka haka paraparati lehnaatta’ matte oorsado.”

¹⁴ Yaahiwwe ka pateettase a samaytaadi qara qeeda dikade alle diishe.

¹⁵ Muuse ka tiitaawe ka dakaddasene lakki qaqqaaha a maakkuma a harkoppa qapadetinni irroota qara lekkade; dakaddasene nefo paka lakki piisanne qara taafamen.

¹⁶ Dakaddosen nefo koda Waaqa; a taafese qara pojamte taafe nefo Waaqa.

¹⁷ Iyyaasu ete nessa a samayta horro dakayeeyye i Muuse kide, “Ha safaroppa nessa oranna'e dakaanni.”

¹⁸ Muuse ka ishi kide, “Ha ini nessa kirpa diisheey, uuyata a putayma'en umma ullupitta a putamitta'en.”

¹⁹ Muuse ete safara kapa dehaadeeyye ka pahanasene a innayya okkatta isho kirpase akkeeyye, a kuttati miirode ka harkoppaayye dakaddasene qaqqaaha alle dakke ka irroota kela pappaqshe.

²⁰ Ka pahana innayyasene a okkatta a kodadene apittan kupe ka yooqe ka daamma kode ka pisha qara fide ka samaytase a Isira'eeliti ikishe.

²¹ Ka Arooni kide, “Samayse maana ke kode akka juppoota asse neeqa karopa ishootta kalisse?”

²² Arooni ka ishi kide, “Poqallaayyo a kuttati assen miiroodan, samayse akkima neequmta qaropaaw kammo i'upta.

²³ Ishootta ana kide, ‘Wa Muusese piita Kipsi kara ino sookshe qara kaye ino an upnooy, waaqadda ino tura aana ino kode.’

²⁴ Anka ishootta kide, ‘Nama piisa sira warqeeta a qapa a furo ka ishin de'o’ ikka ana daashen; anka apittoppopa tuqe ikka pahana innaayya okkatta koddite.”

²⁵ Muuse akkima Arooni samayta tupadesa diishe ikka xaadi qara anno ka nyaapaaysho tura jeere ete akkeeyye,

²⁶ xarra safaraseti oppa'e qa'ade ka kide, “Nama a Yaahiwwe kodde a ana kapopa de'o.” Lewaata piisa ka isha kapopa ante.

²⁷ Ikka ishootta kide, “Yaahiwwe Waaqa Isira'eeli i'ishina kiini, ‘Ishina piisantiiyyi surraappa koraatetaayshin hidada ka safara karaayye nama ishin mina kale innaassin ka xelittaayshin isho kantittaayshin piisa leysha ka safara piisa ollin kaya.’”

²⁸ Lewaatase ka akka Muuse ishootta ajaje qara koote; kuyyaasetiiyyi samaytoppa nama kuma sessa mina co ka pirame.

²⁹ Muuse ka ishootta kide, “Ishina piisaniiyyi qoota hellaassin a diira a xaaytene ka a ollin dalattene qara xaaten malla; awwe koda Yaahiwwe'e i'issi reexxiten; semmalla awwe Waaqa i'ishina sake.”

³⁰ Parraytaadiiyyi Muuse ka samayta kide, “juppoota kutta'e kooten; ma ana Yaahiwwe kapopa fayyado; takka punu diissatan ishina teyaay.”

³¹ Muuse ka Yaahiwwe kapopa tiitaawe ka ishi kide, “Oo, samayse juppoota kutta'e kode ka waaqadda warqeeta issi kodade.

³² Semmalla amma juppootaaysho ishootta diishe, a taakiti maskapase xaayti a kara maxxada orraayti taafatte kara maxxiyyo alle haqe.”

³³ Yaahiwwe ka Muuse kide, “Nama ana ishin dape maxxaadin maskapiyyo kara haqa.

³⁴ Amma xa'e ka aane ka porase an ke lele opa samayse marra'e; tin erkampattootiyyo ke turan desa anta. Ma xoori kuyyaata an samayse qatta'a deenooyye, juppootaaysho minannen ishootta qatta'a.”

³⁵ Pahanasene a innayya okkatta a warqeeta a Arooni kode tura'e wa samayse kode minanne Yaahiwwe ka samayse qara'e erkannaata qeede.