Mataafa Sooketa 26 - Mataafa Qulqulloota

Tukkanase a Waaqa

¹ Tukkanose kaaranta kudani a xaynaata paxaara qora talpa oppa shippamte ka rufta moonta pahato ka a awla isho a tiima oppa dawamtenne koota. Harmitta ka pahana kirupeeli kaarantaddosen quda sira.

² Kaarantaddosen piisa a olimina caaden. Derumtaaysho a dikla kunda lakki sette koddo paldumtaaysho a dikla afuri koddo.

³ Kaaranta keni oli quda heeddishe ka kaaranta keni a ata hase oli quda heeddisheew.

⁴ Ka kaarantaddasene olquda heddisheneti kaamara qarandesa ohaata moonta pahatoppa jifeewwa rakkumaya qara heddishe ka a ata hase a pila qarae asseew heeddishe.

⁵ Ka kamaara kaaranta takka minandesa jifeewwa rakkumaya kunda ken heeddishe ka a lammatta minandesa asseew jifeewwa rakkumaya kunda keni heeddishe ka jifeewwosen oliminopa kattishe.

⁶ Ka tukkanose akka takka koddo'e, rakkumampaya xoorrawwa kunda keni warqeetoppa kode ka kaarantaddosen qaqqapsiisampayaan ollopa qaqqapsiise.

⁷ Ka akka tukkanase qaraxata ishin dekane'e nyirfa tela oppa kaarantadda kudanka takka kode.

⁸ Kaarantaddosen piisa a oli mina'ew caaden; deruma kaaranta takka dikla kunda sessa ka paldumtaadi a dikla afuri koddo.

⁹ Kaarantadda keni pora takka olquda heeddishe ka kaarantadda lehi olquda heeddishe ka tukkanaseti fuula tura kaarantase a lehatta qeppishe ka qarandelaaw uwwishe.

¹⁰ Ka tukkanaseti paka takkanne kamaara a kaarantaseti minandesa jifeewwa rakkumaya kunda ken kode ka qinda pilaatinni kamaara minandesa asseew jifeewwa rakkumaya kunda ken kodeew.

¹¹ Ka sipla a pooroppa rakkumaya xoorrawwa kunda keni kode ka akka kaarantadda a tukkanoseti takka kodane'e, ishootta lakki piisa sipla a pooran qaqqapsiise.

¹² Paka kaarantase tukkana qara haseeti qeede ka tulta tukkanoseti qara xata raa'ishe.

¹³ Kaarantose a tukkanoseti qaraayye a xawwi hasno ka dikla takka takka a paka paka kayno, a qinda qindan rarra'en ka tukkanose uwwishen.

¹⁴ Ka tukkanose qara deka'e kollaya laahadda a pahashene ka qalameeta tiimatin daatene kode ka asseew kollaya a tela a pahashen kode ka qaran dekeew.

¹⁵ Ka tukkanose kela'e, tuudda kolalta kode.

¹⁶ Tuuda takka derumtaadi a dikla kudani koddo; kappuma tiitaawwataadi a dikla ka paka koddo.

¹⁷ Tuuddosen akka ollopa qapamane'e, a kara qotamen ka saantosetin tuuddosen a tukkanoseti piisa asseew kode.

¹⁸ Ka tukkana karaayye qinda tupattatinni tuudda kunda lakki kode.

¹⁹ Ka ishootta kela'e dakara pirreeta oppaayye kiriyya kunda afuri kode ka akka tuudda olkaropa kalane'e, ishootta piisa kela'e, loqqa lakki lakki kode.

²⁰ Ka tukkana karaayye qinda qutattatinni tuudda kunda lakki kodeew.

²¹ Ka tuuda piisa kela'e loqqa lakki lakki kode ka dakara pirreeta oppaayye kiriyya kunda afuri kode.

²² Ka tukkana karaayye qinda dumaatatin tuudda lehi qa'ew.

²³ Ka tukkanaseti qeppeelliyya lakki a tuultan caati'i, tuuda takka takka qa'ew.

²⁴ Tuuddosen a qeppeelliyya lakki, xati paayyatte haka illiti'i, a oli quda caaden ka jifeeta takka takkan mattexata qaqqapsiisamen ka qinda lakki piisan asseew kode.

²⁵ Semmalla tuudda sette a kinnaaden ka tuuddosen sette mina'ew kiriyya lakki lakki olloppa'e kiriyya kudanka lehi a dakara pirreeta oppa kodame ka caadenew.

²⁶ Ka tuuddasene tukkana kela paka takkan caati'i jeela kolalta oppa tarkowwa keni kode.

²⁷ Ka tuudda a paka takkan caati'i, tarkowwa keni kode ka tuudda xati kamman paka qinda dumaatatin qateeti'i, tarkowwa keni kodeew.

²⁸ Tarkoota otanta, a paka takkaayye desa a pila opa arta tuudda qarandesa deraatto.

²⁹ Tuuddadosen quda warqeetan uwwishe ka akka tarkowwasene qapane'e, tuuddosen quda xoorrawwa a warqeeta kodeew; ka tarkowwosen nefo warqeetan uwwisheew.

³⁰ Tukkanose akeekase an irroota qara ke akkishe qara daape.

³¹ Rufta moonta pahato ka a awla ka a tiima isho xaynaata paxaara a qora talpa oppa shippamteppaaye kaaranta dawe; harmitta ka pahana a kirupeeli qara pujo.

³² Ka tuuddasene kolaltoppa kodame afuri a warqeetan quda uwwishene ka qaqqapsiisampayaan qaqqapsiisene ka kiriyyasene afuri a dakara pirreeta oppa kodene kara dishene qara xata rarraa'ishe.

³³ Ka kaarantaddasene rakkumampayasene a xoorrawwa qara xata rake ka taapotase a maakkitta qeede ka kaaranta kamman tultoppan xaaye; kaarantose ka porase qulqullaawe isho kaatasene akata qulqullaawe olikela reexo.

³⁴ Ka kaatasene akata qulqullaawe karaayye taapotase a maakkitta qara'e dufanasene a diissata xaaye.

³⁵ Ka tukkanase kelaayye kaatasene akata qulqullaaweti lakoppanne qinda qutatta oppa tarabbeesa xaaye ka qinda tupatta oppa wa a qara ipsa xaaynaane xaaye.

³⁶ Ka xarrase a tukkana tura'e, rufta a moonta pahato ka a awla ka a tiima isho xaynaata paxaara a qora talpa oppaayye kaaranta dawe ka oppa sira puje.

³⁷ Kaarantoseti tuudda a kolalta keni kode ka warqeetan quda uwwishe ka qaqqapsiisampaya a warqeetoppa kodame kaarantoseti kode ka kela kiriyya keni sipla a poora oppa kode.