Mataafa Sooketa 23 - Mataafa Qulqulloota

Seera qoota firteeta dukaata ka a taantetati desa daasame

¹ “Otoota darta pora in torran ka darta maakkumaanne ukkuttoota nama olli in parkuman.

² Orra leka quda in ooran ka olliiyyi neequmta an kodan; umma orra leka quda in ooran ka taanynya tura'e Firteeta dukaata quua'e darta in maakkuman;

³ Umma oto deexa murrittooyye teekolayta qara in qatan.

⁴ “Oto xorma taaki harreeta paarkaalaatti a mayyaaqte akkitooyye, tiitayshe ka ishopa oorshe.

⁵ Oto harreeta nama a ke needdo'e fe'isan pi'aayye akka akkitaayye, opeela xa'issa'e isha qaarqaare diisheey, eyye in diishan ka kapa an aanan.

⁶ “Oto deexa murrittooyye, teekolayta qara firteeta dukaata qindandesa an quu'an.

⁷ Anti ukkuttoota namati dukaata an murri an cooy, dartan nama an xasasan ka nama dapa in qapnin ka hanqeellayta kodde in ishshan.

⁸ Nooddota taanynyada qara'e ilda lulinni ka afaa hanqeellaya nyapalinniiy, atti nooddota an teyyadan.

⁹ “Qoota ishina mattaayshina piita Kipsi kara kalayta kodditen ka wa kalayta dakaanna uptan malla, kalayta an miiddan.”

Qoota para tappatta isho a kuyyaata tappattati desa

¹⁰ “para lehi dula aylado ka ferado.

¹¹ Ma xoori para tappattatiiyyi piita nessishe ka rafshe; samaytaaytippaayye teekolaya ka wa oppa ca faddaden; a ishootta kela hasse, pinaana ka damen ka porra dishma wayneetaayti isho a qora ekerta kuli asseew kode.

¹² “Kuyyaata lehi kodaayti kodado, ma xoori kuyyaata tappattati akka xormaayti ka harreetaayti nessatto'e, orxaya a tikaaytippa dalade isho kalayta kuli ka nessado'e atti nessado ka koda takkan nefo in kodan.

¹³ “Waan anti ishina lele piisa qanqannissa dakkaysada, umma maxxada waaqadda pila pora in halan ikka afaassin oppa in dakaannin.

Xaysonessumaddasene kukutta sessa

¹⁴ “Paroppa'e sessaanne ana xaysonessuma ulfeessitan.

¹⁵ Xaysonessuma laaqqota a in pukeessammini ulfeessa; akkan ishin ajaje qara'e, leya hapiipi oppaayye xooraadi a qapame qara'e, kuyyaata tappa olkamma laaqqota a in pukeessammini damtan; leyoose oppaayye piita Kipsi kara sookteneey umma nama a kalisoota harkoppa in qapannin ana turopa in dehaannin.

¹⁶ “Wa duloppa aylaattene oppaayye oto qarpatta paayyota ana dehannittaneeyye, xaysonessuma a fera ulfeessa. “Piraampira para qaraayye, oto wa aylaattene kalsannittaneeyye, xaysonessuma a unta kalissa ana ulfeessaaw.

¹⁷ Paroppa sessaanne, diiraassin piisa ana Yaahiwwe turopa dehaadan.

¹⁸ “Diika horeetase ana kalisoota kalisse isho laaqqotase pukeessamte ollinnin lahan ka ana in dehayshan; umma hallaaka kalisootiyyo parraytopa in muknin.

¹⁹ “Unta a dullaassin oppa palaysannittan oppaayye, a heddaamte reexa ka ana Yaahiwwe Waaqaayshina qarpatta kalsha. So'a nuunna qolpayta aanna aayyaassoti oppa in xarshan.

Akka Waaqa samaytaadi' kippeeta isho dehaamta daashe

²⁰ “Tin anti erkampattoota poroppa ke tooytito ka piitase an ke qobbeesse oppopa ke kalisson ke turandesa erka.

²¹ Isheetta dakaye ka afaadi ajajame ka isheetta an falqan; qoota maxxiyyo isheetta qara co malla, ishin dapaytaayti ke in diissooy.

²² Ma xoori oton wa ke kiinitta'e qanqannissa dakayniiyyi ka waan ke ajajna kooniiyyi, anti nyaapaayti'i nyaapan kodda ka a ke qara xaana qara xa'a.

²³ Erkampattootiyyo ke turan desa anta ka piita Amoorata ka a Keettaata ka a Fersaata ka a Kene'aaneta ka a Ewwaata ka a Iyyapuusata oppopa ke kalissa; anti ka ishootta piisa fuulaayti tura alle pira.

²⁴ Waaqaddaassoti in sakatadan umma ishootta an waaqaysadan umma kollumaasso kamma an aanan, sekapaayye alle ishootta qitqitishshe ka dakaddaasso a dishadene alle faate.

²⁵ Yaahiwwe Waaqaayti waaqaysado; anti damtaayti isho pishaatti in ke saka ka paaqa otantaaytippaayye alle pashsha.

²⁶ Umma piitaaytippaayye iskatteeta a kara inna sooknaan taaki a xaayni in kinnin in kinnaatto; paraayti nefo in deraysha.

²⁷ “Anti orra atti oppopa kullinitto piisa qara'en tammaqta kata, ikka ke tura ririkkaawan ka akka nyaapaayti piisa tulta kato ka alle ke tura qaho koda.

²⁸ Ka ke turandesa erkannaata erka ikka Hiwaata ka Kene'aaneta isho Hittaata alle ke turaayye daanta.

²⁹ Ma xoori para takka opa'ew ishootta piisa alle ishin tura an daano; maana malla oton in daanaayye, piitase lulle hasta, pinaana ka ishin qara ollin koopaneey.

³⁰ Haka lekaannittan ka piisse lehannittan kara'e, mina desan lamaya lamaya ishin tura sossooksha.

³¹ Ka pakateeta a tiimati paayyatteeyye haka pakateeta Filisteemiti'i ka koommayte paayyatte haka kirra Efraatisi'i xeelaayti paldisha ka orra oppa kalo harkaaytippa kata; akka itturaayye alle ishootta daanta.

³² Ishootta taaki waaqaddaasso olliiyyi kodayteeta an kodadan.

³³ Akka ana qara juppoota kooto ke in koonini'i, piitose oppa kallaatta ishootta faani in kitto; oton waaqaddaasso'e waaqaysanniiyyi, dukaatanne turuura ke koddaneey.”