Mataafa Sooketa 2 - Mataafa Qulqulloota

Akkima Muuse dalade ka qohame

¹ Sitiiyyi kafa Lewi oppaayye nama takka ka aane ka Lewitteeta heme.

² Isheetta ka hitte ka inna diirta' xaayte ka akka xarjaalliyya inna' kodden akkite ka leya sessa dekte.

³ Ka ete leya sessa qaropa deka malaalteeyye, satara hammayla' qeette ka wa jaqqallaatin kara litte ka innasene kara' mukkisse ka kirra Appaayi kapa'e, xaasha kara' xaayte.

⁴ Alawta innaseneti ka lake desa qa'atte ka wa isha qara' kaya' tooyni.

⁵ Enenta Feri'ooni ka pisha jaqatta kirroppopa lekkatte; orxayaadi a tuparra ka kirrase kapandesa anni. Isheetta ka xaasha kara satarasene akkite ka akka ishin ishi' deeto'e, orxayteetaadi erkite.

⁶ Ka ete satarasene tura panteeyye, innasene akkite; innaseene ka pooyni, ikka suraysatte ka kiite, “Ha hellaasene a Iproota oppaayye takka.”

⁷ Alawta innaseneti ka enentase a Feri'ooni' kiite, “Hela in aana ka iskatta Iproota oppaayye iskatteeta innoosen ke' luukisso ke' hala?”

⁸ Enenta Feri'ooni ka alawtase a innaseneti' kiite, “Aane hale.” Alawta innaseneti ka ante ka aayya opa innaseneti' haleete.

⁹ Enenta Feri'ooni ka iskatteetaseti' kiite, “Innoosen qeede ka ana' luukshe, xaayyaattin ke' daashaay.” Iskatteetase ka innasene' qeette ka luukissa paayyite.

¹⁰ Innasene ka kuttaden; Aayyaasso ka qeette ka Enenta Feri'ooni kapopan deete; ikka inna Enentase a Feri'ooni kodde. Isheetta ka kiite, “Pishaappan isha qeede” ka “Muuse” kiite ka maxxa ishi' koote.

Akkima Muuse piita Midiyaami opa paqe

¹¹ Muuse ete kuttadeeyye, kuyyaata takkaayye orraaysho oppopa aane ka akkima orra Kipsi irreetan koda kokkoka ishootta kodacciisno akke ka a Kipsitta takka orraaysho oppaayye nama takka qiino akke.

¹² ka iskapandesa tooye, nama ka isha kapa in kinnin; ikka Kipsittase ishshe ka tahaayta kara' juute.

¹³ Kuyyaata lammattati ete aaneew, Iproota lakki oli peeqni ikka akkeew. Ka a ishin dape' kide, “Maana'e innaassin qiini?”

¹⁴ Namase ka ishi oorshe ka kide, “Ata ayno ino qara' mukissampayta ka taanynya ke kode? Hela akkima Kipsittase ikasse mina'e ana ikassaawwe?” Muuse ka tammaqe ka dikade ka kide, “Into waasene an kode i'upnaysamene?”

¹⁵ Feri'ooni ete sede dakayeeyye, Muuse ikassa fade; Muuse ka oori Feri'ooni tura alle' qahe ka piita Midiyaami opa alle' paqe. Ka eeyye kala ka takkaayye ela pisha kapa' qaa'e.

¹⁶ Qeesitta takka a Midiyaami tuparra tappa qapa; tuparrasene ka xelloota a kahirra ka a telalla a aappaayshoti pisha ikissa elase opa de'en. Ka pisha oraapen ka mirkoppa immaken.

¹⁷ Sikmaya takkan ka de'en ka tuparrasene alle' daanni. Muuse ka xa'e ka tuparrasene qara sikmayasene' dawre; ka kaharraasso isho telallaassoti pisha ikshe.

¹⁸ Ete aappaaysho Raaku'eeli kapopa tiitaaweneeyye, isha i'ishootta' kide, “Awwe atta irra qara kalten?”

¹⁹ Ishootta ka ishi' kidene, “Kipsitta takka sikmaya kela inon pahe ka pisha ino' oraape ka xellootinno kuli ino' ikshe.”

²⁰ Aappaaysho ka ishootta' kide, “Ka kuli namoose ayshaayye ca? Maana'e alle isha diissen? Hala ikka ino olli damta damo.”

²¹ Muuse ka Raaku'eeli olli kallaatta owsade. Isha ka Enentaadi Sibbaara Muuse' hemitta' daashe.

²² Sibbaara ka ishi inna diirta' xaayte. Muuse ka kide, “Anti piita hapta oppa an kalayta” Ka innaseneti maxxa kode ka kide, “Kerishoomi.”

²³ Parra lekaya kamma, nuqusa Kipsi ka to'e, Isira'eeleta ka karpishshumase ishootta qara' kaye minan quujanni. Ka qaarqaarsa akkatta' ullupni. Ullupittaaysho a karpishshuma malla ullupnaan ka Waaqa kapa' dakaade.

²⁴ Waaqa ka quujattaaysho' dakaye ka kodayteetase' xaadi a Aprihaami ka Hisaaqi isho Yayqoopi olli kodade, matte oorsade.

²⁵ Waaqa ka samayta Isira'eeli akke ka qootaayshoti desa dikade.