Mataafa Sooketa 18 - Mataafa Qulqulloota

Akkima Yotoori Muuse kapopa aane

¹ Namase a Miitiyaami Waaqopa orra qinsanno Yotoori sottohase a Muuse, wa a Waaqa Muuse isho samaytaadi a Isira'eeliti kode ka akka Yaahiwwe piita Kipsi kara ishootta sookshe piisa dakaye.

² Ete Yotoori sottohase a Muuse iskatteetase a Muuse isase a Muuse turan isha kapopa oorshe Sipaara isho

³ Hellaadi a xaayte lakki qeede ka Muuse kapopan de'eyye, Muuse ka kide, “Anti piita a haptaati an kalayta ka innaadi a kuutati maxxa kode ka kide, “Kershoomi.”

⁴ Ka kideewwe, “Waaqa aappinno qaarqaarsiyyo ka harka Feri'ooni kela anan pahe.” Ka kussitta maxxa kode ka kide, “Eli'eseri.

⁵ Yotoori sottoha Muuse ka iskatteetase a Muuse isho hellaadi lakki qeede ka irrootase a Waaqa kapaayye koommaytase a Muuse oppa safare oppopan de'e.

⁶ Yotoori ka Muuse nessa erke ka kide, “Tin anti sottohaayti iskatteetaayti isho hellaatti lakkin qeede ka ke kapopa deena qaraayye ca.”

⁷ Muuse ka sottohase xaadi teyyatta turopa sooke; ka ishi kaareeta oorshe ka isha dinkade ka nakayta oli qara kaassaden ka tukkana kelopa kullen.

⁸ Muuse ka Isira'eeletan paha malla wa Yaahiwwe Feri'ooni isho Kipseeta qara kode piisa ka rakkoota poroppa ishootta qara kayte ka atta akka Yaahiwwe kara ishootta sookshe, piisa Yotoori sottohase xaadi torre.

⁹ Yotoori ka Isira'eeleta piita Kipsi kara sookissa'e paxaarumta a Yaahiwwe ishootta kode piisa dakaye ka xasoode.

¹⁰ Ka kide, “Yaahiwwe sede harka Feri'ooni isho a Kipseeta kela ishin sookshe ka harka Kipsi kela samaytaadin pahe a ulfeessamo!

¹¹ Yaahiwwe qoota Kipseetase karpuman Isira'eeleta iskelopa miite qara sede piisa kode malla, akkima waaqadda pila qaropa qapo amma oori in upnaade.”

¹² Yotoori sottohase a Muuse ka kalisoota a kupannitto isho kalisowwa a pila Waaqa kalshe; Arooni ka fuula Waaqa tura'e, sottohase a Muuse Yotoori olli damta dama'e, saarra Isira'eeli piisa qeede ka ollin de'en.

Akkima Muuse taanynyada shuume

¹³ Parraytaadiiyyi Muuse ka samayta deexa kuti'e; teykante paayyatte haka kalaakalati samayta ka isha tura qa'anni nakaye.

¹⁴ Sottohase xaadi ka wa Muuse samayta koona piisa tooye ka ishi kide, “Ata maana samayse piisa kooni? Maana'e atti patta kutiite, samayse ka teykanti paayyatte haka kalaakalati ke tura qa'anni?”

¹⁵ Muuse ka sottohase xaadi kide, “Waan malla asse koona, qoota samayta fiqaata Waaqa upnaatta ana kapopa deeno malla.

¹⁶ Oto deexa qapaneeyye, ana kapopanne deeni, anti ka arta nama lakki otantoppaayye deexa a qapan murri ka akka taanteta isho seera Waaqa upnaadane kooni.

¹⁷ Sottohase xaadi yotoori ka ishi kide, “Wa koonitta in paxaaran.

¹⁸ Ke isho samayse ke olli co isi yaalinnittan; kodoose ke qara co akata kokkoki, umma atti patta xawwaati koda a ettanisso.

¹⁹ Semmalla amma dehaama an ke daanno dakaye. Waaqa ka ke olli caado; atti pakka samayta oppa'e fuula Waaqa tura qa'atta ka deexaaysho isha tura dehassa.

²⁰ Ka taantetaadi isho seeraadi ishootta kollissa ka saanta oppan anta ishootta faanitto ka wa koda ishootta parpaaccisnitta ishootta upnassa.

²¹ Semaliiyyiiw orra ettanissa qapo ka Waaqa fuurro ka amanammo ka nooddota needdo samaytose piisa oppa reexe; ka shaalaqadda ka motoloqadda ka amsalaqadda isho assiralaqadda ishootta kode ka samayta qara ishootta shuume.

²² Ishootta ka awta piisa samayta deexa muren ka deexa kokokkoka keepan de'en ka deexa nunukkulla iskelanxata dikkishen. Qoota ishootta haadese ke qara seman malla, koda nefo ike qara sholla'aada.

²³ Oton asse kootaayye ikka fiqaata Waaqa koddiniiyyi, yaalan isi a miiddito; samayse piisa ka xasan tikkaasso opa kala.”

²⁴ Muuse ka sottohaadi dakaye ka wa ishi kide piisa kode.

²⁵ Ka samayta piisa oppaayye orrase ettanissa qapo reexe ka shaalaqadda ka motoloqadda ka amsalaqadda isho assiralaqadda kode ka samayta qara shuume.

²⁶ Ishootta ka awta piisa samayta firteeta daanni ka deexa kokokkoka Muuse turopan anni ka a nunukkulla iskelanxata dikkinni.

²⁷ Muuse ka sottohase xaadi Yotoori isiqara xaashe; ikka piitaadipa nakaytan kale.