Mataafa Sooketa 16 - Mataafa Qulqulloota

Menna isho Purkida

¹ Samayta Isira'eeli piisa ka Eliimiiyyi xa'e ka a Kipsi xa'eneeyye leya a lammatta ka kuyyaata kudanka kenattatiiyyi koommaytase a Siini otanta Eliimi isho otanta siina karaayye co kayen.

² Samaytase a Isira'eeli piisa ka koommaytose oppaayye Muuse isho Arooni qara qoojqooje.

³ Ka ishootta kide'e, “Kipsi karaayye an okta so'a kapa kutiininno ka akka heenattinno mina damminno oppaayye, Yaahiwwe kadi eyye'ew ino pire maana in kinnin? Akka samayse piisa doxan pira'e are koommaytoppopa inon deeten.”

⁴ Yaahiwwe ka Muuse kide, “Tin anti moonte xatan damta ishina roopsha; samayta ka kuyyaata mina sooka ka wa kuyyaatoppa ishi kayna pohada; anti ka akka seeriyyo tooytannaan ka tooytaanni in kinnin seden ishootta ekkaysada!

⁵ Kuyyaata lehattatiiyyi xoori a turan pohannaan qaropa a harka lakki pohaden ka wa pohadane ka ishin kalane piisa damta kodaden.

⁶ Muuse isho Arooni ka samayta Isira'eeli piisa kidene, “Awwe shishshipeeyye a piita Kipsi kara ishin sookshe, akka Yaahiwwe kodde upnaattan.

⁷ Yaahiwwe qoojqooja a isha qara qoojqoojten idakayeey, parri teykanteeyye ulfeena Yaahiwwe akkitan; ino allu an opa ayno akka ino qara qoojqoojnittan.”

⁸ Muuse ka ishootta kideewwe, “Yaahiwwe qoojqooja a isha qara qojqoojten qoota dakaye malla, oto awwe shishshipeeyye so'a ka parri teykanteeyye damta ishina daashooyye, akka isha Yaahiwwe kodde upnaattan; ma allu ata ino an opa ayno, akka ino qara qoojqoojnittan? Ha sede a qoojqoojnittan Yaahiwwe qara qoojqoojnittan diisheey ino qaran”

⁹ Muuse ka Arooni kide, “Samayta Isira'eeli piisa lele ka kide, ‘Yaahiwwe qoojqoojaayshin idakayeey, isha turopa dehaada!”

¹⁰ Ete Arooni samaytase a Isira'eeli piisa haasawannooyye, ikka koommaytanxata tooyyaden ka ulfeena Yaahiwwe oraaraappa akken.

¹¹ Yaahiwwe ka Muuse kide,

¹² “Qoojqooja samayta Isira'eeli in dakayeey, ishootta lele ka kide, ‘Awwe shishshipeeyye a letta in dummin turanne, so'a damtan ka oto paritooyye damta damtaneew ka paktan; ka akkan anti Yaahiwwe Waaqaayshin kodde upnaattan.’”

¹³ Halkeessetiiyyiiw purkida ka de'e ka safaroppa immake; ete pariteeyyeew tadahata ka safarase kapandesa immakaatte.

¹⁴ Ete tadahatase tawteeyye koommayse oppaayye wa qaqqaaha ka a''ata ka laaqamen ka piita qara akkaanni.

¹⁵ Samayta Isira'eeli ete sede akkeeyye, qoota turan in upnin malla i'olli kide, “Ata sene maana?” Muuse ka ishootta kide, “Ha ini damtase a Yaahiwwe akka damtane'e, ishina daashe.

¹⁶ Yaahiwwe ishina ajaje ka kide, ‘Matta mina nama wa dama mina ca pohado. Nama takka orra tukkanaadi kela kalo mina'e, a kura komori takka takka poho.’”

¹⁷ Samayta Isira'eeli ka sede qara kode; a demo xoori ikoopsade; deemo ka qajisade.

¹⁸ Ma xoori ete kura komortin kurraaneeyye, a koopsade qara in hasene, umma a shakkisade ishi in qajne; wa nama matta mina pohade ka a damo mina'ew caaden.

¹⁹ Muusi ka ishootta kide, “Sede kelaayye nama takka nefo parri in hattisannin!”

²⁰ Ma xoori ishootta oppaayye a demo wa Muuse kide in dakayne ka kela hattisaden ka parri muksaden; ikka parraytaadiiyyi punaatootte ka xaccatte; Muuse ka ishootta qara miirode.

²¹ Teykanta teykanta'e, nama ka wa isha kayna mina ca'ew pohanni; oto atoota awditooyye a piita qara haste ka liilli.

²² Kuyyaata lehattatiiyyi ikka nama mina'e kura komori lakki lakki pohaden; saarra samayta ka de'en ka sede Muuse lelen.

²³ Muuse ka ishootta kide, “Ini wa sene a Yaahiwwe ajaje; parriiyyi kuyyaata qulqullaawte a Yaahiwweey, kuyyaata nessuma. Semmalla awweew a xarsannittan xarsada ka a laaqqannittan laaqqada ka a ishin kela hasse parripa muksada!”

²⁴ Ikka akka Muuse ishootta kide mina'e, a ishootta kela hasse parripa muksaden, umma in xaccanne umma in punaatoonne.

²⁵ Muuse ka ishootta kide, “Awweew dama ka pira; awwe kuyyaata nessuma a Yaahiwwe, awwe piita qara we takkan nefo a akkattan.

²⁶ Kuyyaata lehi ollopa pohattan; kuyyaata tappatta xoori qoota kuyyaata a nessuma koddite malla, we takkan nefo a akkattan.”

²⁷ A kodditoma kuyyaatase a tappattatiiyyi, a deemo pohatta'e sookeneew; umma we takkan nefo in akkanne.

²⁸ Yaahiwwe ka Muuse kide, “Haka aytamitti'i ajajiyyo ka seeriyyo tooytaatta tiittan?

²⁹ Tooya! ana Yaahiwwe kuyyaata nessuma ishina kode, akka semmalla kuyyaata lehattatiiyyi damta a kuyyaata lakki kayto ishina daashe; kuyyaata tappattatiiyyi nama a pora oppa co oppa tawo ka lakopa in sooknin.”

³⁰ Samayta ka kuyyaata tappattatiiyyi nessade.

³¹ Samayta Isira'eeli ka damtaseti “Menna” kide ka ishi maxxa kode. Isheetta nefo a dalta timpilaala mina'e ati ka akka laaqqota a takman laaqqen mina marmaddaawni.

³² Muuse ka kide, “Yaahiwwe i'ajaje ka kide, ‘Awtan Kipsi kara ishin sooksheeyye, xeltada itturopa deena akka damtose an koommaytoppa ishin damshe akkane'e, Menna kura komori takkan qeede ka eeyye xaaye.”

³³ Muuse ka Arooni kide, “Menna kura komori takkan qeede ka okta kara xaaye ka akka xeltada itturopa deenaati eeyye jarto'e, fuula Yaahiwwe tura xaaye.”

³⁴ Arooni ka akka Yaahiwwe Muuse ajaje qara'e, akka Mennasene tooytamane'e taapotase a maakkitta tura xaaye.

³⁵ Samayta Isira'eeli ka haka piitase xaadi a kara kallaado xeelase a Kene'aani kayno kara'e, para kunda afuri Menna dame.

³⁶ Kura koomori takkan kura ifi qudaayye kuma kundatta.