Mataafa Sooketa 12 - Mataafa Qulqulloota

Akka erkannaata toota' tarpite

¹ Yaahiwwe ka piita Kipsi karaayye Muuse isho Arooni kide,

² “Leyoose, leyaaddappaayye a leyaa paayyota ishina koddo ka, paroppaayye leya paayyota ishina koddo.

³ Samayta Isira'eeli piisa sede lela; leyoose oppaayye kuyyaata kundattatiiyyi, nama atoolaadi isho a toolaaysho mina laaha takka takka qeedo.

⁴ Oton toolaadi laahose damo qajanni pahataayye, a kantoppaayye ishootta kapa deha ollin qootaden; toola takka matta nama mina'e laaha daman ka piran reexatta ishootta parpaaccisni.

⁵ Nuunnayya a reexattane nuunnayya a kaharrta taaki telteeta kodda i'ettanshan; ma xoori laaha taaki qolpayta apara takka pire ka toobuma in qapnin koddo.

⁶ Leyoose oppaayye haka kuyyaata kudanka afrattati eeyye qapada. Awwse oto letta dummittooyye, samayta Isira'eeli piisa a qalado.

⁷ Ka diika qeedo ka tikase a kara so'asene damammaaneeyye xarra turaayye qora a xarra a qinda qindan ca isho manturayta quda daato.

⁸ Ka halkeesse oppaayye so'asene waatado ka laaqqota a in pukeessammin isho mida haddaawnaatin damo.

⁹ Ma xoori so'a heenda taaki a xarshene in daman; ma mattaadi ka kamajimajaadi isho hoppattaadi kuli waatada ka dama.

¹⁰ Umma so'a takkan nefo ishin kela in hasnin ka in muknin; oton a muka'e caayye, alle apittan kupa.

¹¹ Oto dammittaneeyye mehaddaassin kalsada ka surraappa hidada ka xopaassin kalsada ka uleetaayshin harkoppa qapada ka jarjartan dama; sede xaysonessuma a qaran tarpeeta a Yaahiwweey.

¹² “Anti halkeesse oppaayye piita Kipsi oppannen tarpa ka nama isho horeetoppaayye a paayyota delade piisa pira; ka killowwa piita Kipsi piisa qara farata; anti an Yaahiwwe.

¹³ Diikoose tikka a kara kittaneeti'i, milikkita kodda; oton diikoose akkooyye anka ishin qaran tarpa; oton Kipseeta pirrooyye, umma xaayshin erkannaata ishin qara in kayto.

¹⁴ Kuyyaase ka kuyyaata a matte oorsanittan ishina koddita; akka kuyyaase xeltada itturopa deena piisa karaayye xaysonessuma a hasa in qapnin a Yaahiwwe kodattan ka ulfeessitan.”

Xaysonessuma a laaqqota a in pukessammini

¹⁵ Waaqa ka ishootta kideewwe, “Kuyyaata tappa kara'e laaqqota an pukeessammini damtan; kuyyaata paayyotatiiyyi, tikkaassin kara alle haddaya ma'issan; kuyyaata a paayyotati paayyatte haka kuyyaata tappattati'i, nama wa a haddaya kara ca damo, Isira'eletoppaayye alle'e daanama.

¹⁶ Kuyyaata paayyota isho a tappattatiiyyi xora a qulqullaawe kodattan; umma kuyyawwosen oppaayye koda takkan nefo a kootan, ma damta patta kodattan.

¹⁷ Qootan kuyyaase oppaayye xelaayshin a oranna piita Kipsi kara sooksho malla, xaysonessuma a laaqqota kara haddaya in qapnin ulfeessa ka sede taanteta kodada ka xelta itturopa deenitto piisa karaayye a hasa in qapnini koda ka ulfeessa.

¹⁸ Leya a paayyota oppaayye a kuyyaata kudanka afratta dummitto paayyatte haka kuyyaata kunda lakki takkatta dummitto kara'e laaqqota a kara haddaya in qapnini damtan.

¹⁹ Kuyyaata tappa kara'e haddaya tikkaassin kara in caannin; nama a piita kara delade taaki a haptitta kodde, nama haddaya dame piisa a Isira'eeleta kara alle daanamo.

²⁰ Wa kara haddaya caane takkan nefo in daman; tikka a kara kallaannittan piisa karaayye laaqqota a oppa haddaya in qapnin dama.”

Xaysonessuma qaran tarpeeta a paayyota ulfeessame

²¹ Kammadesa Muuse ka qimaya Isira'eeli ollopa hale ka ishootta kide, “Toollaassin mina'e issi'i laahadda reexa ka laahase a qaran tarpeeta qalada.

²² Marranta a hansabitta qeeda ka diikase saahinoppa co oppan qappada ka qorasene paka pakan ca a xarra isho manturayta qudan daata; umma haka parinitto'e, ishin oppa nama takka nefo tika kara in sooknin.

²³ Yaahiwwe Kipseeta lessaata'e piitaaysho oppan tarpaay, oto qorasene paka pakan ca a xarra lakki isho manturayta quda diika akkooyye, Yaahiwwe tikoose kapanne tarpa, umma akka erkampatootase a toota tikkaassin karopa kullito ka ishin pirto in kodo.

²⁴ Ishin isho hellaassin ka taantese tampeeta kodattan ka haka paraparati tooytaattan.

²⁵ Ka akkan turan ishina kippeeta daashe qara'e, oto piitase a Yaahiwwe ishina daanno oppopa kaltaneeyye, taantese tooytada.

²⁶ Ka oto hellaassin ishin kaassannaan ka kiinaane, ‘Taantese kodammitto maana kideetaayye’

²⁷ Ishootta oorsha ka kida, ‘Qoota Yaahiwwe Kipseeta qara erkannaata qeede ka tikka Isira'eeleta a Kipsi kara ca qaran tarpe ka ishin pahe malla, ini kalisoota a qaran tarpeeta a Yaahiwwe.’” Samayta ka xata kide ka sakatade.

²⁸ Samayta Isira'eeli ka kale ka akkimase a Yaahiwwe Muuse isho Arooni ajaje qara kode.

Akkima qaramma piita Kipsi erkannaatan piramen

²⁹ Yaahiwwe ka olliqqootta halkeetta oppaayye inna a qaarta a Feri'oonise sufaaneta qara kuti'eti, paayyatte haka inna qaarta a nama a piita kela hidameeti piisa pire; ka horeeta kulippaayye qaramma piisa alle pire.

³⁰ Feri'ooni ka saarraadi isho samayta Kipsi piisa ka halkeette mukittaappa xa'en. Qoota tika a karaayye inna in toonin in kinnin malla, ullupitta pooyta kuttayta ka piita Kipsi kara xaani.

³¹ Feri'ooni ka halkeesse qudaayye Muuse isho Arooni halaacciise ka ishootta kide, “Ishin isho Isira'eeleta xa'a ka samaytiyoppa alle sooka! Ka akka kiiten mina'e aana ka Yaahiwwe waaqaysada.

³² Akka kiiten mina'e xellootaayshin a kahirra ka a tela isho a okkaya teyyada; ka alle aana ka ana kuli saka.”

³³ Kipseeta ka akka Isira'eeleta irra qara piitaaysho kara sookto'e, ishootta jarjarisse ka kiite, “An ino piisani pirammo kapaayye alle sooka.”

³⁴ Semmalla samayta ka pukeessaasso a ata in palinin qeede ka meehase a pukeessa karopa ollopa oorshe ka japarraan quda mare ka xashshiyya qara qaqqapade ka haade.

³⁵ Samayta Isira'eeli ka akkima Muuse turan ishootta lele qara kode. Ka Kipseeta qaraayye sira dakara pirreeta ka a warqeeta isho a ohawwa kaassade.

³⁶ Yaahiwwe ka fuula Kipseeta tura akka Isira'eeleta jaalatamto kode, ikka wa kaassadene piisa ishootta daashen; seminan Isira'eeleta ka teyanta Kipseeta pootatte.

Akka Isira'eeleta Kipsi kara sookte

³⁷ Samayta Isira'eeli ka katama Raamsetiiyyi sooke ka Suukootipa anta xa'e; ishootta hellaa isho iskatta maliiyyi diira nama kuma dippa leh mina'e caan.

³⁸ Ishootta olliiyyiiw samayta pila ika lekayta isho xelloota a kahirra ka a telalla isho a okkaya kuttayteeta ka ishootta olli sookte.

³⁹ Ikka pukeessasene a Kipsi kara haadadene laaqqota akara haddayan qapniniti kodaden ka laaqqaden; qoota piita Kipsitiiyyi jarjartan daanamen malla, pukeessaasso in paline umma eta oppa damta kodadane in teyne.

⁴⁰ Isira'eeleta eta oppa piita Kipsi kara kallaatte, para dippa afuri ka kunda sessa kayni.

⁴¹ Ete parase dippa afuri ka kunda sessa dikkadeeyye, samayta Yaahiwwe piisa ka piita Kipsi kara sooke.

⁴² Halkeesse a oppa sooken, qoota halkeetta oppaayye Yaahiwwe samaytaadi qara tooye ka piita Kipsi kara sookshe koddite malla, xeltada a itturopa deena piisa karaayye, Isira'eeleta piisa asseew ulfeena Yaahiwwe'e halkeesse oppa tooyanni rafta.

Taanteta a ishin xaysonessuma a qaran tarpeeta ulfeessammaan

⁴³ Yaahiwwe ka Arooni isho muuse kide, “Taanteta a ishin xaysonessuma a qaran tarrpeeta ulfeessitan sede; haptitta damta a qaran tarpeeseti in dammin.

⁴⁴ Karpishsha a kaajan piddatten, oto dawra qara ishi murtan kammaayye, dameeta i'ettansha.

⁴⁵ Ma xoori xaykitta taaki orxayta a xaayyaden dameeta isha parpaaccisni in kitto.

⁴⁶ Damta a qaran tarpeeta a tika kara kodamte kara'ew damamto diisheey, lakopa in sooknin; umma laftaadi nefo in qepnin.

⁴⁷ Samayta Isira'eeli piisa a xayso nessumoosen ulfeesso.

⁴⁸ Haptitta ishin oppa kalo, oton xaysonessumoosen a qaran tarpeeta a Yaahiwwe ulfeessa heenaayye, hellaadi a diira piisa a dawra qara muraden; sitiiyyi ishin oppa dikama ka dehaada ka xaysonessumoosen ulfeessa; ma nama dawra qara in murannin, damtose a qaran tarpeeta in dammin.

⁴⁹ Isira'eelitta a piita kara dalade isho haptitta ishin oppaayye kalo, a olturaayye seerose takkaaw qapnaaden.”

⁵⁰ Isira'eeleta piisa ka wossen a Yaahiwwe Muuse isho Arooni ajaje piisa koote.

⁵¹ Halkeessetiiyyi Yaahiwwe ka kita kitaan piita Kipsi kara Isira'eeli sookshe.