Mataafa Sooketa 11 - Mataafa Qulqulloota

A kundatta: erkannaata a qaramma Kipsi lesse

¹ Yaahiwwe ka Muuse kide, “Amma, erkannaata pila takkan Feri'ooni isho Kipsi qara qeedaaw. Sekkammaayye oori Feri'ooni ka akka antane alle ishin diisha; oto ishin diinnooye, ishin piisa alle daana.

² Samayta Isira'eeliti lele ka kide, “Diira ka iskattanne nama kantittaadi qaraayye a sira dakara pirreeta isho a warqeeta kaassado.”

³ Yaahiwwe ka akka Isira'eeleta Kipseeta tura jaalatamto kode. Muuse ka piita Kipsi piisa karaayye fuula saarra Feri'ooni isho a samayta piisa tura'e nama ulfeessame kodde.

⁴ Muuse ka kide, “Yaahiwwe ikiini, ‘Oto olliqqootta a halkeetta kaytooyye, piita Kipsi oppannen tarpa.

⁵ Inna qaarta a Feri'oonise suafaaneta qara kuti'e paayyatteeyye haka inna qaarta a orxayteeta orra kela yooqa yooqnittooti'i, hellaa a diira a qaramma kodde piisa alle piita Kipsi kara pirama; horeetoppaayye wa xorma kodde ka paayyota delade piisa ka le'an.

⁶ Piita Kipsi piisa karaayye, ullupitta kutta a turan apari in dakaannin ka itturopa kuli in dakaannin ka xa'a.

⁷ Qinda Isira'eeleta isho a horeetaayshoti desa xoori, kuta nefo ishoottoppaayye qoji in kido; sede nefo Yaahiwwe akka Kipseeta isho Isira'eeleta arta kara reexa kode akka upnaattan malla.’”

⁸ Muuse ka kideewwe, “Saarrosen xaayti piisa ka ana kapopa de'an ka ana kaareta oorshan; ka kidane, ‘Ke isho samaytaayti a ke quda co piisa atara alle ino qara aana; antikka oori sitiiyyi aana.” Sekkammaayye Muuse ka miira kuttan Feri'ooni tura sooke.

⁹ Yaahiwwe ka Muuse kide, “Qoota kodaddaayyo a orra qawwanna piita Kipsi kara kuttumtan akkaatta parpaaccisnaan malla, Feri'ooni ishina'en dakayo.”

¹⁰ Muuse isho Arooni ka Feri'ooni tura kodaddoosen orra qawwanna piisa koden; ma xoori Yaahiwwe karitta Feri'ooni kokkonnayshe; ikka akka Isira'eeleta piitaadi kara in sooknini dawrade.