Mataafa Sooketa 10 - Mataafa Qulqulloota

A settatta: erkannaata torrayta

¹ Sekammaayye Yaahiwwe ka Muuse kide, “Anti akkan milikkitaddosen xayyo ishoottoppa akkisho'en karitta a Feri'ooni isho a saarraadi kokkonnaysheey, atti Feri'ooni kapopa aane.

² Waaqa malla sede kode, akkiman anti Yaahiwwe kodde akka upnaattan ka waan Kipseeta qara kode ka milikkitadda an ishootta qara akkishe, hellaassin isho oopaddaassina torritan malla.”

³ Muuse isho Arooni ka Feri'ooni kapopa aanen ka ishi kidene, “Yaahiwwe Waaqa Iproota ikiini, ‘Haka aytamiti ana tura isi shakkissa tiitta? Akka ana waaqaysadane'e, samaytiyyo diishe.

⁴ Oton akka in sooknini samaytiyyo dawriniiyyi, tin parri seeyyen torrayta piitaaytippopa qeeda.

⁵ Ikka piitaayti piisa qara uwwisha umma piita kelaayye in akkaatto; ka wa apteenta kela hase piisa pira ka qora dullaattippa dehe piisa luuqqisha.

⁶ Ka tikkaatti ka a saarraatti isho a samaytaayti a Kipsi piisa kara imma ka; haka aappadaassin ka aakkadaassin piisse Kipsi qara daladene paayyatte haka awweti'i wa ishootta apari turanne in akkinini ka koddan.’” Muuse ka tiitaawe ka Feri'ooni kapa alle kale.

⁷ Saarra Feri'ooni ka Feri'ooni kidene, “Hela akka piitoose xanno a Kipsi pannitto ke akkaanni in kitto? Haka aytamiti namoose ino tura turuura kodda? Samayse diishe ikka sooko; ka Yaahiwwe Waaqaaysho waaqaysado.

⁸ Sekkammaayye Muuse isho Arooni ka Feri'ooni turopa qeedamen; ikka ishootta kide, “Aana ka Yaahiwwe Waaqaayshin waaqaysada; ma opa ayno anni?”

⁹ Muuse ka ishi kide, “Qootan Yaahiwwe xaysonessuma ulfeessino malla, namaayno a shakka ka a qime ka hellaanno a diira ka a tuparra ka xellootinno a kahirra ka a tela isho horeeta piisan qeedanna ka ishin sookna.”

¹⁰ Feri'ooni ka ishootta kide, “Ishina aana, Yaahiwwe ka ishin olli caado! Ma oton iskatta isho hellaanne annittaneeyye, akka neequmta dikatten eeyye akkaanniiy, anti an ishootta'en faqqato.

¹¹ Ishin oppaayye a diira patta aanen ka Yaahiwwe waaqaysaden; wa kaassannittane sedewweey.” Muuse isho Arooni ka oori Feri'ooni tura alle daanamen.

¹² Yaahiwwe ka Muuse kide, “Akka torrayta piita Kipsi qara de'o'e ka miissa piisse oppaayye co piisa ka wa apteenta kela hase piisa piro'e, harkaayti opeela moontopeela qapo.”

¹³ Semmalla Muuse ka uleese xaadi piita Kipsi qaropa qapade; Yaahiwwe ka halkeesse isho kuyyaase kumma akka xayxayta a qinda piirtota piisse qaropa dawo kode; ete parri pariteeyye xayxayse ka torrayta haade.

¹⁴ Torraytase ka piita Kipsi piisa qara de'e ka piita Kipsi piisa qara kuti'e ka tupa desa nyoqnyooqni. Umma torrayta asse kutta turan apari in deene umma itturopa in de'o.

¹⁵ Torraytase ka piita piisa qara uwwishe; piita piisa ka tukkante ka dishma dullaappa co piisa dame ka dalta qoyra a apari apteenta kela hasse piisa pire; umma piita Kipsi karaayye qoyra taaki dishma a ilaawa takka nefo apari in hasne.

¹⁶ Sekkammaayye Feri'ooni ka Muuse isho Arooni jarjartan halaaccise ka ishootta kide, “Yaahiwwe Waaqaayshin isho ishin qara'en juppoota kode.

¹⁷ Semmalla amma juppoose pattaaw takkan ana diisha! Ka akka erkannaase a toota ana qara alle maysho'e, Yaahiwwe opa qinsada.”

¹⁸ Muuse ka Feri'ooni kapa sooke ka Yaahiwwepa qinsade.

¹⁹ Yaahiwwe ka xayxaytase a qinda piirtota qeede ka xayxayta kokkoka a qinda dumaata opa tiitayshe ikka torraytase haade ka pakateeta a tiima oppopa tuqe; umma piita Kipsi kara'e torrayta takka nefo apari in hasne.

²⁰ Yaahiwwe xoori karitta Feri'ooni kokkonnayshe; Feri'ooni ka akka Isira'eeleta in sooknini dawre.

A sakalatta: erkannaata tukkanta

²¹ Sekkammaayye Yaahiwwe ka Muuse kideewwe, “Akka tukkanta a nan kiite piitase a Kipsi qara deeto'e, harkaayti moontopeela derayshe.”

²² Muuse ka harkaadi opeela derayshe; haka kuyyaata sessaati'i tukkanta a nan kiite ka piita Kipsi piisa qara deete.

²³ Kuyyaase sessa kara'e Kipseeta ka olli in akkinin umma nama poraadippa leehe takka nefo in co. A kodditoma porra oppa Isira'eeleta kalto piisa oppaayye la'ayta caade.

²⁴ Sekkammaayye Feri'ooni ka Muuse halacciise ka ishi kide, “Aana ka Yaahiwwe waaqaysada; iskattaayshin isho hellaassin kuli a ishin olliiw aanen; ma xellootaayshin a kahirra ka a tela isho a okkaya pattaaw are hasso.

²⁵ Muuse ka ishi kide, “Akkan Yaahiwwe waaqinno'e kalisowwa kalinno ka kalisoota kupannitto kuli kalinno'e, ke ino horeeta daashape ka?

²⁶ Horeetinno kuli ino olliiw anta; umma takka nefo are an diinno. Yaahiwwe Waaqinno waaqaysatta'e horeetinnoppaayye an dehanno caada; umma hakan eyye kayno maliiyyi horeeta a xaame akkan Waaqa kalisoota kalinno ammaaw upnaatta an ettaninno.”

²⁷ Maa xoori Yaahiwwe karitta Feri'ooni kokkonnayshe; umma Feri'ooni samaytase sookissa in heennaanne.

²⁸ Feri'ooni ka Muuse kide, “Ana tura alle aane! Ka akka lammatta ana tura a akkaannini isi tooytaado. Amma desa kuyyaata ana turan akkaattooyye ittoota.”

²⁹ Muuse ka ishi kide, “Akka kiite qara'e a koddito, anti kara lammatta ke turanne an akkaado!”