Mataafa Sooketa 1 - Mataafa Qulqulloota

A Isira'eeleta kipsi kara kittooyye miiddota ishootta qara' kayte

¹ Maxxada hellaa Isira'eeli a toollaasso ollin Yayqoopi olliiyyi piita Kipsi opa paqe sene.

² Roopeeli ka Simooni ka Lewi ka Yihuta

³ Yisaakoori ka Saapilooni ka Piiniyaami

⁴ Taani ka Niftaalemi ka Kaati isho Aseeri.

⁵ Sanynyeeta Yayqoopi olopa dikootaaysho kunda tappa; ma xoori Yoosefi' turanneew piita kipsiti ca.

⁶ Yoosefi isho hellaasso ka le'en; xeltose ka piramte.

⁷ Ma xoori sanynyeeta Isira'eeli olli dalte ka horte ka a kuttati kokkonnaatte ka piita Kipsi piisa immakte.

⁸ Kipsi kara'e nuqusa haaraya a qoota Yoosefi desa in upnin ka xa'e;

⁹ ka samaytaadꞌ kide, “Tin Isira'eeleta a kuttati lekte ka dikootan ino qara jaalte; hupnaaysho ka ino fuurinniiyy;

¹⁰ semmalla akka qara'ew in leknin ka oto orana ino qara' xa'ooyye nyaappinno quda in koddinin ka ino in torpinini'i ka ennoow piitoppa alle'en tawnini'i, xooya ka mala takka ishootta' dawna (faana)”

¹¹ Ka oori koda hupnatin ishootta miidda'e saarra a ishootta kodacciisa ishootta qara' shuumen; Isira'eeleta ka katamadda Fitoomi isho Raamise kidamma a kara meeha kattinaane Feri'ooni' qupte.

¹² Ma xoori oto Kipseeta a kuttati Isira'eeleta miiddinittooyye, Isira'eeleta a kuttati sekapa lekiniiw ka piita qara koopaan anni. Kipseeta ka a kuttati ishootta fuurte.

¹³ Ka karpuman Isira'eeleta kodacciisa paayyite.

¹⁴ Ka dooqqeta diitaccisaanne ka tuupeta laaqacciissaanne ka koda dullaappa ika lekayta kodacciissaanne koda kokkokan ishootta payyahisse ka kodaaysho piisa oppaayye suraysatta mali karpuman ishootta kodacciisen.

¹⁵ Nuqusa Kipsi ka xaaysattowwa Iproota a Siibaarra ka Fuuha kidammaati' kide,

¹⁶ “Oto iskatta Iproota' xaaysannittaneeyye, oton inna diirta'e dalada alle ishsha; oton enentaayye a caatto.”

¹⁷ Xaaysattowwasene xoori Waaqa fuuren ka waasene a nuqusa Kipsi ajaje koda diishen ka hellaasene a diira akka caadane' koden.

¹⁸ Nuqusase a Kipsi ka xaaysattowwasene hale ka ishootta' kide, “Maana'e akka hellaasene a diira caadane' kooten?”

¹⁹ Xaaysattowwasene ka kidene, “Ha iskatta Iproota iskatta Kipseeta minan, ishootta' qoota kokokkoki malla a xaaysattowwa ishootta kapa in kaynin turanne xaayni.”

²⁰ Semminan Waaqa ka xaaysattowwaseneti wa paxaara' kode. Samaytase ka lekaatta ka kokkonnaattaan aane.

²¹ Qoota xaaysattowwasene Waaqa fuuren malla, Waaqa ka ishootta' toolla daashe.

²² Nuqusa Kipsi ka samaytaadi piisa ajaje ka kide, “Hella diira a Iproota a dalanna piisa kirra Appaayi karopa kata. Hellaa iskatta' xoori a caaden.”