Mataafa Rutti 4 - Mataafa Qulqulloota

Po'esi ka Ruutti heme

¹ Po'esi ka xarra katama turaayye, porase a orra ishshaarritta ollopa anno oppopa aane ka eeyye kuti'e. Sekkammaayye ete kafittase a Elimeleki, isase a Po'esi lello, ise lehanda mina qate ka de'e. Po'esi ka ishi kide, “Innaanno! Me intoonno arepa desa xooye ka areppa qa'e.” Isha ka aane ka kapa qa'e.

² Po'esi ka qimoota oppaayye nama kudani haleew ka ishootta kide, “Areppa qaa'a.” Ikka qaa'en.

³ Po'esi ka namase lehanda mina qateeti kide, “Nuhaamini, isase piita Mo'apiti desa kalte, dulase a innaanno a Elimeleki kanni.

⁴ Anti nefo ka fuula a qimoose ka orroose are qaa'e tura'e, akka duloose piddatto ke upnassa fade. Oton piddatta heentaayye piddado, oton a heenniniiyyi xoori, anti ke kamma desan caay, olkela oorshe ka ana' lele.” Isha ka oorshe ka kide, “Ana piddada.”

⁵ Po'esi ka ishi oorshe ka kide, “Awta duloose Nuhaamini qara piddannittooyye, maxxa innassina a to'e dakaytissa'e, Mo'apitteetase Ruutti a diirtaadi qara in kinnini ollinni teyyatta.”

⁶ Aappoose ka oorshe ka kide, “Qoota tikumiyyo ana turaayye mihisso malla piddatta an ettanshooy, attiiw piddado ka maxxa innassina dakaytishe.”

⁷ Xatta piita Isira'eelitiiyyi kolluma aataasso oppaayye, nama takka otoon paata kanniiyyi tookni purinniiyyi, xopa iskelaayye sookinni ka namase piddanno tookni pursannooti daanni. Ini nefo akka olli kalene akkinni.

⁸ Aappase ka oori loqaadi kela xopa sookshe ka Po'esi daashe ka kide, “Piitoose atti piddado.”

⁹ Po'esi ka qimootase ka orra ishootta kapandesa co piisa kide, “Awwe akkan kodayteeta Elimeleki ka a Keliwooni isho a Mehalooni koddite piisa Nuhaamini qaraayye pidde, ishina a maakkiyya.

¹⁰ Akkimose mina'e, akka maxxa Elimeleki toolaayshoti orroppa in pannini'i, maxxa innassina a to'e dakaytissa'e, Mo'apitteetase Ruutti, haantota Mehalooni iskatteetiyyo koddita. Wossen piisa'e ishina awwe maakkiyyaayyo kodditan.”

¹¹ Qimoota ka orra a ishootta kapandesa co piisa ka kidene, “Aa! Keeton ino an maakkiyya. Iskatteese tikaaytippa deenitto, akka Raaheeli ka a Liyya Yayqoopi hellaa lekaya xaayen mina'e a tumma dalto, atti'iw, katama Efreemi oppa dakaado ka a Petelehemi oppa kurra teye.

¹² A sanynyeeta a iskatteese oppaayye Waaqa ke daanno qudanne, tikaayti a qeetto ka isase a Ti'imaari Yihuta xaayte mina'e, akka tika a Faaresi mina koddito.”

Sanynyeeta Po'esi

¹³ Sekkammaayye oori Po'esi ka Ruutti heme, Waaqa ka ishootta inna daashe ikka inna diirta xaayte.

¹⁴ Iskatta ka Nuhaamini kide, “Waaqase awwi oopase ke qara tooyo ke daashe a ulfeessamo! Innoosen nefo a piita Isira'eeli oppaayye dakaaden.

¹⁵ Haantotase a innatti isase ke jaalannitto hama tappa qara ke qapta. Ka amma nefo ke opa xaayte. innoosen nefo, xasa ke oorshan ka qimuma kelaayye ke qara tooyan.”

¹⁶ Nuhamini ka innasene haddunte ka amppattootaadi koddite.

¹⁷ Iskatta kanta ka kide, “Ha inna hama'e Nuhaamini dalade.” Ka maxxa ishi koden ka kidine Iyyopeedi. Iyyopeedi aappa opa Issayi, Issayi kan aappa opa Taawwiti.

¹⁸ Xelta a Faaresiiyyi paayyatte ka haka Taawwititi kitto; Faaresi Esroomi xaaye

¹⁹ Esroomi ka Araami xaaye Araami ka Aminaatapi xaaye

²⁰ Aminaatapi ka Na'asooni xaaye Na'asoni ka Salmooni xaaye

²¹ Salmooni ka Po'esi xaaye Po'esi ka Iyyopeedi xaaye

²² Iyyopeedi ka Isseyi xaaye Isseyi ka Taawwiti xaaye.