Mataafa Rutti 3 - Mataafa Qulqulloota

Ruutti Po'esi opa hemamte

¹ Awta takkaayye Nuhamini ka Ruutti kiite, “Innaayyo, akka hemamto ka tikuma fayya qapnaatto'e, kadin diirta ke' fadda kiiteyye ipaxaari.

² Po'esise a orxayaadi a tuparra kapa patteeta pattate, ha sanyeetinno. Isha raawwaayye awtaappa poorta teehada.

³ Semmalla atti dakintaayti jaqado ka shittoota fidado ka mehaddaatti oppaayye a paxaara kalsado ka pora ishi poorta tehanno opa aane. Kapanno, haka damta ka ikkayta dikkissanno kara'e isha turannen akkaadan.

⁴ Ka pora oppa mukno qanqanissa tooye ka oto muko ka oppa tawo kammaayye, loqqa qaraadela ohaataadi ela qape ka eyye loqqaadi kammeela ishi mukke, kammae wa koota isha ke lelaay.”

⁵ Ruutti ka isheetta kiite, “Iyya, wa ana' kiite pisan koda.”

⁶ Ka porase a poorta tehammo opa ante ka we piisa akka Nuhaamini isheetta kiite qara' koote.

⁷ Po'esi ete eetota eetade ka ikkayta dikkisade kammaayye, xasa ishi dakaade ikka aane ka tooreta a poorta kapa muke. Ruutti ka oori porase a isha oppa mukepa lokkooti ante ka loqqaadi qaradela ohaataadi ela qapte ka loqaadi kapa mukkite.

⁸ Ete otomalaappa kayteeyye, ete impase ka qinda orrooyye, iskateeta loqqaadi kammeela mukke, ikka upnaade ka tammaqe.

⁹ Isha ka kaassade ka kide, “Ata atti a ayno?” Isheetta ka ishi oorisse ka kiite, “Poqallaay, ha anti an orxayteetase xaayti Ruutti. Atti qoota lehanda ino mina qatto malla, i'ana lattaay kayla ohaataayti ana qudan kaye.”

¹⁰ Pooesi ka ishi oorshe ka kide, “Innaayyo, atti koda a paxaara a xatta koote qaran, ise a amma koote jaale. Diirta faddata'e xayyoolayta a teyantoode taaki hiyyeessa reexatta i'ettanissa ma asse a koone. Sanynyuma tooytatteey, a Waaqa ke' sako!

¹¹ Amma nefo innaayyo in fuuran! Wa ana kaassatte pisan ke' kodaay. Ha atti akka qalpeeta fayya qapto orra katamoosen kara kalo piisa upa.

¹² Akkima kiite mina'e, anti akkiman sanynyeetayshin kode dukaata. Ma xoori a sanyuman ana desa deha ka ishin mina' qato ka ke laado ca.

¹³ Amma haka parinitto'e are muke ka parri teykanten aappose kaassadaay. Oton isha ke quda oora saleeyye, ipaxaariiy, a ooro. Oton itiiteeyye, anti akkan ke quda ooro'en maxxa Waaqatin xasa ke' kalliiy are'ew muke.”

¹⁴ Isheetta ka oori haka parinitto'e loqqaadi kapa' mukte. Po'esi akka Ruutti eyye mukte nama takka nefo akka in upnaannini fade. Isheetta ka oori a para in qinnin turan xaate.

¹⁵ Ka ishi kide, “Intoonno ohaataayti qapadooy!” Isheetta ka afatte. Ikka kiilota kunda lakki mina kitto ishi' kure ka tultoppa isheetta kaakkishe ka isha mattaadi qinda katama opa aane.

¹⁶ Isheetta ete tikoppa kayteeyye, Nuhaamini isheetta kaassatte ka kite, “Ata innaayyo, waasene akkamma ante hela atta kodden?” Ruutti ka wa Po'esi ishi kide ka kode piisa ishi lelte.

¹⁷ Ka kiiteewwe, “Isha i'ana kide, ‘Harka lulletin an ke an kalsho’ Ka poortose piisa ana' daashe.”

¹⁸ Nuhamini ka isheetta kiite, “Innaayyo, Po'esi awweseeyye haka wessen piisa dikkisho mali jawi in kidooy, atti duupattaan asado.”