Mataafa Rutti 2 - Mataafa Qulqulloota

Ruutti akka dula Po'esippopa patteeta sookatte

¹ Nuhaamini aappa takka teyantoolayta kodde ka kurra kutta qapo, a daltayta opa Elimeleki kodde Po'esi kidammo qapta.

² Ruutti ka Nuhaamini kiite, “Aayye, ana dulla oppa orra fera ferro opa aano ka nama ana suraysado kapaayye patteeta faddado.” Nuhamini ka isheetta kiite, “Innaayyo, aane.”

³ Isheetta ka ante ka a isqara in upnin maliiyyi dula aappa takka Po'esi kiinaan a daltayta Elimeleki kodde oppopa ante ka eyye ferampaya kammaayye patteeta faddata paayyite.

⁴ Kuyyaasetiiyyi, Pooesi ka katamasene a Petelehemiti desa dulaadippopa aane, ka orxayasene xaadi fera ferraati kide, “A Waaqa ishin olli caado.” Ishootta ka ishi oorshen ka kidene, “A Waaqa ke' sako.”

⁵ Po'esi ka Rutti duloppa akke ka saarase a ferampaya kaassade ka kide, “Ata ini enenta ayno?”

⁶ Saarase ka ishi oorshe ka kide, “Ha ini Mo'apitteetase Nuhaamini olli deete.

⁷ Ha isheetta i'ana naappatte ka kiite, ‘Ana hiddannoosen a ferampaya ferraane kapandesa patteeta faddado.’ Antika isheetta kide, ‘Faddado’ Ikka haka teykante paayyite, patteeta faddatta qudaaw kitta. Ka amma nessatta kaatta kela xata kiite.”

⁸ Pooesi ka Ruutti kide, “Innaayyo, we'en ke dehaama. Ihini, patteeta pattatta'e dula pila opa in aanane ma are'ew tawe ka orxayaayyo a tuparra kapanneew caado.

⁹ Ka pora oppa hamiyya fera ferraan iskatta ka ishootta kammeela poorta pohono kamma' oore ka patteeta faddado. Hamiyya nefo akka ke in faddannini'i, in ishootta dehaameey, atti'iw, oto deepottooyye aane ka pishasene a ferampayaayyo oraapene muddado ka ikke.

¹⁰ Isheetta ka oori tura kilpiippite ka kiite, “Atti atta ana hapte deete dikatte ka asse ana suraysatte?”

¹¹ Po'esi ka isheetta kide, “A aappa ke qara to'e desa paayyite akka haqqitotaayti Nuhaamini qara tooyte ka toolaayshin ka piitaayshin alle diisse ka piita hapta opa olli deete pisan dakaye.

¹² Wa koote piisa kapa'e a Waaqa ke' daasho. Waaqa Poqalla a Isira'eeli, ise a kaattaadi kela koorsatta deete, a yaalaayti kapa'e kuttumtan ke' oorsho.”

¹³ Ruutti ka kiite, “Poqallaayyo! Amma ikkiti ana suraysatta kammaawwe kitta, kadin punu orxayaattippa an takka mina'en qannin nefooyye, haasa fayyatinni ana kokkonnasseey, in ke kalataysanni.”

¹⁴ Ete piifa kayteeyye, Po'esi iRuutti kide, “Innaayyo, piifaapa xooye ka laaqqota ereerotan usado.” Isheetta ka ante ka ferampaya kapa'kutiite. Isha ka maanqa waatame isheetta' daashe ikka damte ka duttante ikka kela kuli haste.

¹⁵ Piifa kammaayye, Ruutti ete patteeta faddatta ela xaanittooyye, Po'esi orxayasene xaadi a hamiyya'e qanqannissa dehaame ka kide, “Kadi punu otanta marrana oppandesa pattannittaayye we isheettaen kidan.

¹⁶ Ka oto fera ferrittaneeyyeew, marrana kuli kara titiirra ka ishi' diisha ikka pohatto umma isheetta'en miiroodan.”

¹⁷ Ikka poortase haka dumaatati pattatte tumte ikka kiilota kudanka lakki mina kitto kayte.

¹⁸ Isheetta ka poortase kaakkatte ka tikopa ishin kalte. Nuhamini ka wa pattate akkite. Ruutti ka oori damtase piifaadi kela haste ishi daasse.

¹⁹ Nuhamini ka isheetta kaassatte ka kiite, “Ata awwe dula aynoppopa patteeta ante? namoose asse ke suraysade a Waaqa ishi sako.” Ruutti ka Nuhaamini kiite, “Ha anti dula aappa takka Po'esi kiinaan oppan pattoota pattade.”

²⁰ Nuhamini ka Ruutti kiite, “Waaqa a shorokumaadi orra a co ka a le'eti pirama in qapnin, a Po'esi sako. Ha isha kafinno ka aren sanynyeeta a lehanda ino mina qatto oppa isha takka.”

²¹ Sekkammaayye Mo'apitteetase Ruutti ka kiite, “Ha isha, i'ana kide, ‘Haka fera piisa dikkannaan kara'e, orxayaayyo kapa in sekaadan.’”

²² Nuhamini ka Ruutti kiite, “Innaayyo, kadi orxayaasene xaadi a tuparra kapa'ew tawnitta ike' paxaari, maana malla, oton dula orra pila oppopa anta hamiyya ike faddata ettanshaneey.”

²³ Semmalla Ruutti ka haka fera a poorta ka a kappa dikkannaan kara'e, orxayaasene a tuparra a Po'esi kapan caattaanne patteeta pattatte ka eyye'ew Nuhaamini olli kallaatte.