Mataafa Rutti 1 - Mataafa Qulqulloota

Toola Apemeleki piita Mo'api opa paqe

^1-2 Xatta a poqalladda piita Isira'eeli mukinnaaneeyye, sitiiyyi piitaaysho a Isira'eeli ka loosatte. Efraatitta takka Apemeleki kiinaan ka lootase turaayye, katamasene a Peetelehemi piita Yihuta kara akkaannaati desa, iskatteetaadi Nuhaamini ka hellaadi lakki a diira, Mehalooni ka Kelewooni ollin xa'en ka piita Mo'api opa alle paqen.

³ Sekkammaayye oori Apemeleki ka to'e. Iskateetase xaadi Nuhaamini ka hellasene xaadi a diira lakki patta ollin haste.

⁴ Se kammaayye oori, hellasene xaadi ela kiden ka tuparra a piita Mo'api oppaayye Orfa ka Rutti hemen. Ka para kudan mina kitto ollin kallaaden.

⁵ Parase kudan kammaayye oori, Mehalooni ka Kelewooni ka le'eneew. Nuhaamini ka oori diirtaadi ka hellaadi lakki dapte ka isi pattan haste.

Nuhaamini haantotase a innaadi Ruutti ollinni piita Isira'eeli opa kalen

⁶ Nuhaamini a piita Mo'api kittooyye, akka Waaqa samaytase xaadi a Isira'eeli opa tooyyade, piitaaysho ka hirsatte ikka dakayteeyye, haantowwasene a hellaadi lakki ollinni piitaadipa kalta dikatte.

⁷ Isheetta ka haantowwasene a hellaadi ollin porase a ishi kalan desa xa'en ka porase a Yihuta qapaden.

^8-9 A pora qara caaneyye Nuhaamini i'ishootta kiite, “Hellaayyo, qoota ana ka diirrasene xaayshin le'e kamma yaalten malla, a Waaqa ishina' daasho. Anti nefo in ishina' sake, Waaqa a ishina faroota fayya daasho ka diirta paxaara ka tikuma a fayya ishina' daasho. Anti in ishina kiini, pisantiiyyi tikkaassin opa kala ka ayyadaassin kapa kallada.” Ka oori ishootta dinkite. Ishootta ka nessa kuttishen ka harmo pooyyen.

¹⁰ Ka isheetta kideneewwe, “Aayye, ha ino ke ollin samaytaayti kapopa kalla diisheey, alle desa an oorro.”

¹¹ Isheetta xoori i'ishootta kiite, “Hellaayyo, ata maana ana olli kootan? Hela! Hellaa ishin hema'en arepadesa hemama ka xaaya ettansha? Inna! In kodditooy, alle desa oora.

¹² Hellaayyo, alle tiitaawa. anti akka an hemammini'i in kere. kadin hemama ettaninna ka kuyaase are kittoppaayye hemama ka hellaa adiira xaaya nefooyye,

¹³ hela hemitta alle diissan ka helloosen asattane? hellaayyo, sede wa koddaa'enneey, alle desa oora. ha hellaayyo! aishin qaran qaptoe karitta ana kara kupanni. ha poqalla ana payyahashe anka kallaatiiyyoppa harka haqade.”

¹⁴ ishootta ka nessa kuttaatin ka a lamattaati pooyen. sekkammaayye, Orfa ka nuhaamini dinkite ka ishi nakayta oorisse ka alle tiitaawte. Ruutti xoori, isheetta olli anta piisatte ka quda' kokte.

¹⁵ Nuhaamini ka Ruutti kiite, “Xelitteetase xaayti Orfa piitaadipa ka waaqaddasene xaaysho a ishi qinsannaane opa oorteey, atti kuli isheetta olli oore.”

¹⁶ Isheetta ka oorisse ka kiite, “Aayye, akkan ke kapa alle aano'e anan payyahashan, ha anti pora opa annitta opan ke olli aana, ka pora oppa kallaannittoppa ke olli kallaada, orraayti ka orriyyo kodda, Waaqaayti ka Waaqiyyo kodda.

¹⁷ Pora oppa toonitto oppa'ewwen to'a ka pora hawlammitto oppa'ew hawlama. Toota maliiyyi wa ke kapa ana pursha takka nefo in caan. Oton ke kapan pursama, a Waaqa erkannaataadin ana pashsho.” Kiite ka xaxatte.

¹⁸ Nuhaamini ka ete akka Ruutti isheetta qudopa kiite ka isheetta quda' kokte upnaatteeyye, alle jaw kiite.

¹⁹ Ishootta ka lakkantiiyyi haka Petelehemiti aanen. Ete Petelehemi kayeneeyye, piita piisa oppa qawwaawe. Iskatta ka kiini, “Hela ini Nuhaamini?”

²⁰ Isheetta ka ishootta kiite, “Waaqase we piisa ettaninno kallaatiyyo haddaysheey, Maara ana kida ma Nuhaamini ana'en kidan.

²¹ Ha koyyaale! Waaqase we piisa ettaninno ana payyahashe ka asse ana jeersheey, anka tooliyyo piisa ollin anne, Waaqa ka harka luletin ana kalsheey, Nuhaamini ana'en kidan.”

²² Oori Nuhaamini ka Mo'apitteetase a haantota innaadi koddite Ruutti ollin kalen ka a orra poorta fera payyinooyye Peteleheemi kayen.