Mataafa orra Lewi 2 - Mataafa Qulqulloota

Kalisoota unta

¹ Nama oton Yaahiwwe'e kalisoota unta kalinniiyyi, a daamma nukkulla dehaysho; ka oppa sayteeta ekerta piisho ka tankarta qara xaayo.

² Ka hellaasene a diira a Arooni qeesewwasene kapopan de'o; qeesitta ka daammase sayteetan lahame qara harka kara kusso ka quda tankartase piisa qeedo ka akka kalisoose Yaahiwwe kalsamte ishin matte oorsadane'e kalisoota a Yaahiwwe alaawnitto ka isha xasannitto a apittan dehaannitto kodo ka porase a kalisoota qara kupo.

³ Kalisootase a unta kela hasse, Arooni isho hellaadi a diira a teyyaden. Sede nefo qoota kalisoota a Yaahiwwe apittan dehaatte kela hasse malla a akata qulqullaawteey.

⁴ Oton kalisoota a unta a kisa qara laaqene dehanniiyyi, laaqqota a kara sayteeta lahen a daamma paxaara oppa laaqqamte a kara haddaya in qapnin taaki laaqqota qaqqaaha a daamma paxaara oppaayye laaqamte a quda sayteetan daaten ikka karaayye haddaya in qapnin koddito.

⁵ Oton kalisoota unta'e payqa piita qara laaqqammiiyyi, daamma paxaara a kara sayteeta ekerta lahen a haddaya kara in qapnin oppaayye laaqqamto;

⁶ ka laaqqose oppa moose ka qara sayteeta ekerta tuqe; sede kalisoota unta'ey.

⁷ Oton kalisootaayti a unta'e payqa sipla qara laaqqammiiyyi, daamma paxaara a sayteeta ekertatin lahen oppa laaqqamto.

⁸ Kalisootaayti a unta a saanta asse pahaton laaqqamte, Yaahiwwe kapopan xooye ka qeesitta daashe; qeesitta ka porase a kalisoota qaropa dehaysho.

⁹ Kalisoose akka Yaahiwwe kalsamte akka ishin matte oorsadane'e, qeesitta ka kalisootase a unta qudaayye shakkayteeta qeeda ka kalisoota a Yaahiwwe alaawnitto ka isha xasannitto a apittan dehaannitto koda ka porase a kalisoota qara dehaysha.

¹⁰ Kalisootase a unta kela haste, Arooni isho hellaadi a diira a teyyaden; sede nefo qoota kalisoota a Yaahiwwe apittan dehaatte kela hasse malla a akata qulqullaawteey.

¹¹ Kalisoota a unta a Yaahiwwe dehaannittan karaayye haddaya in kinnaannin; maana malla kalisoota a Yaahiwwe dehaannittan karaayye haddaya taaki takma apitta oppa kupeeta ishin parpaaccisni in kittooy.

¹² Sede kalisoota qarpatta a unta'ey, Yaahiwwe kalissa i'ettanissan; ma xoori kalisoota a alaawnitto koddeeta ka porase a kalisoota qara kupeeta ishin parpaaccisni in kitto.

¹³ Kalisoota unta a dehannitto piisa kara'e sookitta kate; kodayteese a Waaqa olli kodatte'e sookittase milikkita koddino, kalisootaayti a unta karaayye in dapannin; kalisoota a dehaannitto quda'ew, sookitta dehaysheew.

¹⁴ Oton kalisoota qarpatta a unta'e Yaahiwwe dehanniiyyi, maanqa waate ka riite.

¹⁵ Ka sayteeta ekerta qara tuqe ka tankarta qara xaaye, sede kalisoota unta'ey.

¹⁶ Qeesitta ka maanqase waatame ka riitame ka sayteeta a ekertatin lahame qudaayye shakkayta kusso ka quda tankartase piisa qeedo ka kalisoose Yaahiwwe kalsamte akka ishin matte oorsadane'e, Yaahiwwe'e a apittan dehaannitto kodo ka kupo.