Mataafa oppa' Ooreta 9 - Mataafa Qulqulloota

Rakkoota a Waaqa ajajama diissata minan deenitto

¹ Samayta Isira'eelitiiyyi, dakkaysado! atti kuttuma isho kokkonnuma'e samayta a ke qaropa qapo ka katamadda kukutta a kawwattaaysho lettoppa kaynitta sookissa'e ka piitaaysho qapatta'e, awwe Yurtaanoosi tuullita.

² Sanynyeeta Enaaqi akkima irreelaya ka hupnampaya kodden i'upta; a qootaayshoti desa kiinaane, “Ayno sanynyeeta Enaaqi tura qa'ada?” Akka dakayte.

³ Semmalla Yaahiwwe Waaqaayti isase apitta kupno paho isha ke turandesa tarpaay upnaado; isha ke turandesa ishootta pira ka iskelopa ishootta oorsha; akka Yaahiwwe kippeeta ke daashe qara'e, atti ka ishootta sookissa ka irra qara ishootta pirta.

⁴ Yaahiwwe Waaqaayti oto samaytase alle sooksho kammaayye, ukkuttumaaysho minanne alle ke tura ishootta sookinniiy, in dikadan ka in kidane, “Hanqeellumaayyo malla Yaahiwwe piisse lehatta anan de'e.”

⁵ Wa malla piitaaysho qapatta karopa kallitta, hanqeellumaatti taaki karittaayti a taanteta qapo mallan; ma Yaahiwwe Waaqaayti wa malla ke tura alle ishootta sookinna, ukkuttumaaysho malla ka kippeetase a aappadaassin a xatta Aprahami ka Hisaaqi isho Yayqoopi xaxa kale immaka malla.

⁶ Semmalla Yaahiwwe Waaqaayti wa malla piisse paxaara akka qapatto ke daanna, akka hanqeellumaatti minan in koddinin upnaado; atti a samayta xolma kokkonnannooy.

⁷ Koommaytoppaayye atta akkima Yaahiwwe Waaqaayti miirasse matte oorsado, umma pakkanna sede in teyman; haka a piita Kipsiti xaate ka poroose are co kayte kara'e, Yaahiwwe falqa tupa kitta.

⁸ Ka irroota Siinaatiiyyi Yaahiwwe miirasse, ikka ke qara miirode ka ke pira harmisade.

⁹ Eten anti dakaddaasene qaqqaaha, dakaddaasene a kodayteetase a Yaahiwwe ishin olli kodade qeeda irrootase qaropa fayyadeeyye, an damta an dammin ka pisha an ikkinin maliiyyin kuyyaata kunda afur ka halkeetta kunda afur pire.

¹⁰ Yaahiwwe dakaddaasene qaqqaaha lakki qara'e seera harkaadin poje ka ana daashe; kuyyaase a ollopa xorteneeyye, seerase a Yaahiwwe irroose qaraayye apitta kara xata ishina haasawade piisa ka dakaddaasene qaqqaaha qara ca.

¹¹ Ete kuyyaatase kunda afur ka halkeettase kunda afur piramteeyye, Yaahiwwe ka dakaddasene qaqqaaha a kodayteeta lakki ana daashe.

¹² Sekammaayye Yaahiwwe ka ana kide, “Irroose qara xa'e ka jarjartan opa xata lekkado; samayse xaayti a piita Kipsi kara sookisse, neequmta kode ka nyaleey; ka saanta an anti ishootta ajaje qara jarjartan maqqeey, ka pahana killoota issi tumadeey.”

¹³ Semaliiyyiiw Yaahiwwe ka ana kide, “Anti samayse in akke ka akka samayta a xolma kokkonnanno kodde nefo upnaadeey,

¹⁴ ana diishe anka ishootta piro ka alle piita qara maxxaaysho pashsho ka samayta kokkonnuma ka lekuma ishootta qaraayye jaallo ke karaayye sooksho.”

¹⁵ An tiitaawe ka irrootase qara lekkannooyye, irroose ka apittan kupanni; anka harkaayyo lakkippaayye dakaddaasene qaqqaaha a kodayteeta lakki qapa.

¹⁶ Anka tooye ka akkima Yaahiwwe Waaqaayshin qara juppoota kooten akke; akka pahana nuunnayya okkatta killoota tumatten ka saanta a Yaahiwwe ishin ajaje qaraayye alle jarjartan maqqiten.

¹⁷ Anka dakaddaasene qaqqaaha lakki an harkaayyo lakki oppa qapa fuulaayshin tura piitopa dakke ka pappaqshe.

¹⁸ Yaahiwwe miirassaanne neequmtase a fuuladi tura kooten isho juppootase xaayshin piisa malla, anka a deyyo mina'ew damta an dammin ka pisha an ikkinin mali kuyyaata kunda afur ka halkeetta kunda afur fuula Yaahiwwe tura pi'e ka ishina qinsade.

¹⁹ Ishin patissa'e Yaahiwwe qoota miirode ka a kuttati aare malla, anti miiraadin fuure; ma xoori isha amma ikki'i ana dakaye.

²⁰ Yaahiwwe qoota Arooni qara a kuttati miiroode malla, isha patissa kuli'i harmisade; anti ka isha qinsade;

²¹ ka pahanasene a nuunnayya okkatta a juppootaayshina qeede ka apittan kupe; ka yooqe ka daamma kode ka pishasene irroote xata urqina qara tuqe.

²² Akka Tapi'eera ka Masaahi isho Qiprooti- hataawwa kara'e Yaahiwwe miirassinew.

²³ Yaahiwwe ete Qaadesi parne ishin xa'innooyye, i'ishina kide, “piitose oppopa kala ka piitase an ishina kippeeta daashe qapada.” Ishina xoori ajajase a Yaahiwwe Waaqaayshina qara'e tiyya' xaaten. Umma a amanne; umma nessaadi'i, a ajajamme.

²⁴ Anti hakan ishin upnaade paayyatte, Yaahiwwe qara tiyya xaana tupa kittan.

²⁵ Yaahiwwe akkima ishin pashsho qoota turan haasawade malla, anka kuyyaase kunda afur ka halkeesse kunda afur fuula Waaqa tura pi'e ka ishina qinsade.

²⁶ Ka Yaahiwwe opa qinsade ka kide, “Oo Yaahiwwe Poqallaayyo samayse xaayti a mattaaytiti kodatte ka kuttumaattin furatte ka harkase xaayti kokkokan piita Kipsi kara sookisse alle in pashshan.

²⁷ Orxayasene xaayti Aprihaami ka Hisaaqi isho Yayqoopi matte oorsado; ka xolma kokkonnassa a samayseti ka ukkuttumaaysho isho juppootaaysho weti in dikan.

²⁸ A taakkiti samayse a oppa ino sookisse ikida, “Yaahiwwe piisse a ishootta kippeeta daashe oppopa qoota ishootta kalissa malaale ka ishootta needdade malla, akka koommaytoppa piro'e ishootta sookshe.”

²⁹ Ma xoori ishootta, ha samaytase xaayti a mattaaytiti kodatte ka hupnase xaayti kutta ka harkase xaayti kokkokan sookisse.