Mataafa oppa' Ooreta 8 - Mataafa Qulqulloota

Dehaama a qoota piitase a kippeeta qapattaati desa daasame

¹ Akka caattan ka lektan ka piisse a Yaahiwwe aappadaassina a xattati xaxa kale karopa kaltan ka lehattane'e, ajajadda an awwe ishina daanna piisa qanqannissa tooytada

² Yaahiwwe Waaqaayshin akka ajajaddaadi tooytinittan taaki tooytini a kinnin wa ishin kara ca upnaatta'e ka ishin ekkaysatta'e ka ishin xata shakkissa'e ka parroosen tarpe kunda afur kara'e atta akka koommayse oppaayye ishinan aane piisa matte oorsada.

³ Ishin doxissaanne ka mennasene a ishin isho aappadaassin a xatta a upnini ishin damissaanne xata ishin shakkishe; wa malla sede kode nefo, akkima nama dama pattan kallaanni in kinnin ka qaaleta afa a Yaahiwwe oppa sookte piisan kallaanno ishin kollissa malla.

⁴ Parroose kunda afur kara'e, umma mehaddaassin a kalsattene in kerine umma loqqaassin in qaqapaajne.

⁵ Semmalla Yaahiwwe Waaqaayshin akkima nama innaadi dehaammo mina'e akka ishin dehaame isi karanxata upnaada.

⁶ Semmalla isha tura fuuraanne ka saantadaadippan antaanne ajajadda a Yaahiwwe Waaqaayshina tooytaada.

⁷ Yaahiwwe Waaqaayshin piita paxaara a irrowwa isho naabba kara kirrada ka fishanna isho ella pisha paadinan oppopa ishin kalsha.

⁸ Ka piita oppaayye kappa ka poorta ka dishma wayneeta ka dalta hilteeta ka a roomaani ka a ekerta isho takma oppa puren oppopa ishin kalsha.

⁹ Isheetta piita a oppa we takkan nefo a dapnin, a oppaayye dama damtan ikka ishina in qajnini; isheetta piita a oppa dakadaadi kara sipla caanno; akka irrowwaadi kela sipla a tiima qotattan ka teytan.

¹⁰ Oto damtan ka duttantaneeyye, Yaahiwwe Waaqaayshin isase kappatayteetase a piita ishina daashe kalataysada.

Dehaama orra Waaqa teymino daasame

¹¹ Ajajaddaadi ka tampewwaadi ka taantewwaadi an awwe ishin ajajna tooytatta diissatanne akka Yaahiwwe Waaqaayshin a teyminini'i, isi tooyytada.

¹² Oto damtan ka duttantaneeyye ka tikka papaxxaara qupattan ka kara kallaatta paayyitaneeyye,

¹³ xellootaayshin a lo'alla ka a kahirra isho a telalla ka ishina hortooyye, warqeetaayshin isho dakara pirreeta ka ishina koopan annooyye, wa a qaptane piisa ka qara ishina padaawammaan annaaneeyye,

¹⁴ akka isi a peepeta ka Yaahiwwe Waaqaayshin isase piita Kipsiti karpishshuma kela ishin sookshe a teyminini tooytaada.

¹⁵ Isha koommayse palda ka orra fuurinno a koola maaka isho kitatta oppa caan oppanne ishinan de'e; ka piita a kokte a pisha oppa in kinnin oppaayye shila paqni in kinnin kara ishina pisha paadishe;

¹⁶ ka ishin xata shakkissa'e ka ekkaysatta'e ka piraampira qaraayye a paxaara ishina koda'e koommaytoppaayye mennase a aappadaassina a xatta in upnin ishin damshe.

¹⁷ Semmalla akka issi'i a kiinini, “Hupninno isho kokkonnumaannonnen teyantose kodane.” Tooytada.

¹⁸ Ma xoori akka awwe koddite mina'e akka kodayteetase a aappadaassina a xattati xaxa kale immako'e, akka teyanta kodattane'e a hupna ishina daanno akka Yaahiwwe Waaqaayshin kodde matte oorsada.

¹⁹ Oton asu Yaahiwwe Waaqaayshina teymitan ka waaqadda pila waaqaysattan ka ishootta sakatatta'e ishootta kamma antaneeyye, dukaatan akka pattane'e, awwen turadesa ishina lelli.

²⁰ Oton qaaleta a Yaahiwwe Waaqaayshinati'i a ajajammi a kinniniiyi, akkima samaytase a Yaahiwwe ishin tura alle patinna mina'e, ishina kuli asseewwe pattan.