Mataafa oppa' Ooreta 7 - Mataafa Qulqulloota

Akka Isira'eeleta kene'aaneta sookisso

¹ Yaahiwwe Waaqaayshin oto piisse a lehatta karopa kallittan oppopa ishinan aanooyye ka mankistewwa lekaya a ishin qaran qapto kukutta ka kokokkoka tappa, Hittaata ka Kerkersaata ka Amoorata ka Kene'aaneta ka Feresaata ka Hiwwaata isho Iyyapuusata alle ishin tura sookshooyye.

² Ka harkaayshin oppopa ishootta tuukkooyye, akka ishootta puttaneeyye, alle ishootta pira; umma ishootta olli kodayteeta in kodadan ka ishoottan suraysadan.

³ Olloppa hemitta in qapnaadan ka tuparraassin hellaasso a diiraati hemitta in daashan; umma hellaassin a diiraati tuparraasso in heman.

⁴ Maana malla hellaatti ana kamma alle tiitayshan, ikka waaqadda a pilaati sakatadaneey; miira Waaqa ka ishin qara xa'a ka irra qara ishin pashshaay.

⁵ Ma xoori ishootta qara asse koda: porraasso a kalisoota alle poota ka dakaddaasso a killanna oppa faata ka olaahiyyaasso a killoota asheera oppa quura ka pahana killowwaasso a xefadene apittan kupa.

⁶ Maana malla ishina Yaahiwwe Waaqaayshina a samayta xawwi reexxameey. Yaahiwwe Waaqaayshin ka samayta piita piisa oppa akka qoottotaadi a kokkoka kodditane ishin reexadeey.

⁷ Ha Yaahiwwe wa malla ishin jaalade ka samayta piita oppa ishin reexade, qoota samayta pila qaropa lekuma jaalten mallan; ma laadi lekumtanne samayta piita kelopa kittan.

⁸ Ma ha wa malla Yaahiwwe harka kokkokan ishin sookshe ka piitase a karpishshuma isho harka Feri'ooni a nuqusa Kipsi oppa ishin furade, qoota Yaahiwwe ishin jaalade ka xaxasene aappadaassin a xattati xaxade tooyte malla.

⁹ Semmalla Yaahiwwe Waaqaayshin akkima Waaqa kodde upnaada; ha isha Waaqa amaname. A isha jaalanna ka ajajaadi tooytannaati'i, kodayteetaadi ka xoonasene xaadi pirama in qapnini haka xeltada a kumati tooytini.

¹⁰ Ka a isha needda patissa'e, ildaappadesa qara haalota pooyyini; umma a isha needda qara haalota pooyya jarinni in co.

¹¹ Semmalla ajajadda ka taantewwa isho tampewwa a awwe ishina daanna koda'e, qanqannissa tooytada.

Saka Waaqa ajajama kela deeno

¹² Kadin tampewwosene dakkaysannittan ka tooytattan koonittaneeyye, Yaahiwwe Waaqaayshin kodayteese xaadi a aappadaassin a xattaati xaxade isho xoonasene xaadi pirama in qapnini i'ishina tooyta.

¹³ Isha i'ishin jaalada ka ishina saka ka ishin leksha ka piitase a akka ishina daasho'e aappadaassin a xattati xaxa kale oppa akka hellaa xaayattane koda; ka wa duloppa akkannittane, untaayshin ka dalta wayneetaayshina isho sayteetaayshin a ekertati saka; ka xellootaayshin a lo'alla ka a kaharra isho a telalla ishina horsha.

¹⁴ Samayta piisa qaropa eeppisamtan; umma ishin oppaayye diirta taaki iskatta a xaayni in kinnin in caado; umma horeetaayshin oppaayye maxeena in caado.

¹⁵ Yaahiwwe paaqa piisa alle ishin qaraayye tawsha; umma paaqaddasene nenneeqa a piita Kipsi a uptane takkan nefo ishin qara in qeedo, ma a ishin needda qara'e qeeda.

¹⁶ Samayta a Yaahiwwe Waaqaayshin ishin turopa tuukkino piisa alle pira; umma ishoottan suraysadan umma waaqaddaasso in waaqumsadan, turuura ishina koddaneey.

¹⁷ Oton iskaranxata dikannittan ka kiinittane, “Samaytose ino qaropa kokkonnuma jaalliiy, attan ishootta sookissa ettaninnaayye?”

¹⁸ Ishootta tura in fuuran; ma Yaahiwwe Waaqaayshin wa Feri'ooni isho piita Kipsi piisa qara qeede fayya matte oorsada.

¹⁹ Erkannawwa kukutta ka milikkitadda orra qawwanna isho daxxowwaanne a Yaahiwwe Waaqaayshin akkima hupnase xaadi kutta ka harkase xaadi kokkokan piisse kara ishin sookshe, ildaassinan i'akkiten; Yaahiwwe Waaqaayshin samaytase a fuurrittan piisa qara'e asseew koda.

²⁰ Semaliiyyiiw a ishin kela pahe ka in leenini ka deddekade, haka pirammaan kara'e, Yaahiwwe Waaqaayshin heenta ishootta qaropa diisha.

²¹ Yaahiwwe Waaqaayshin Waaqase kutta ka fuurammo, qoota otantaayshin oppa co malla, ishootta in fuuran.

²² Yaahiwwe Waaqaayshin lokko lokkooti samayse ishin tura sooksha; umma takka kapa'ew ishootta sookissa ishina in parpaaccisto; maana malla pinaana a koommayta'e ishin qara koopaay.

²³ Yaahiwwe Waaqaayshin xoori, haka pirammaane'e yaaqyaaqta kutta ishootta qara kata; ka kuli ishin turopa ishootta tuukka.

²⁴ Ka nuqussaasso kuli ishin turopa tuukka; akka piita qaraayye maxxaaysho patissaan; umma haka ishootta patinnittan kara'e, nama a ishin tura qa'atta ettansho in caado.

²⁵ Killannasene a xefadene apittan kupa; umma warqeeta taaki dakara pirreeta a killannosen quda co, in xajeelan ka issi in teyyadan; a taakati a turuura mina'e oppa qapamtaney; maana malla Yaahiwwe Waaqaayshin turaayye sene wa jippame'ey.

²⁶ Amma killannosen jippame tikaayshin opa in kalsadan a taakati xaaysho mina'e a pata kodditaneey; ishootta wa pata'ey, a kuttati ishootta ifatta ka jippeeta ishin faani.