Mataafa oppa' Ooreta 6 - Mataafa Qulqulloota

Ajaja a piisa qaraayye qapo

¹ Piitase a tuullitan ka qapattan oppaayye akka tooytattane'e ajajadda ka taantewwa isho tampewwaasene akkiman ishin kollisho'e a Yaahiwwe Waaqaayshin ana ajaje sene.

² Sede nefo ishin ka hellaassin isho oopaddaassin akka paraayshin deraado'e, haka kittaneeyye Yaahiwwe Waaqaayshin fuurtane'e akka taantewwa ka ajajadda an ishina daannaati ajajamtane ishin faani.

³ Semmalla samayta Isira'eelitiiyyi, dakkaysada! Waaqa aappadaassina a xatta akka ishina kippeeta daashe qara'e, piisse aanna isho takma oppa puren oppaayye akka ishina ettanto'e, akka a kuttati lektane'e seeradi a daashe qanqannissa tooytaada.

⁴ Samayta Isira'eelitiiyyi dakkaysada! Yaahiwwe waaqinno takkayta pattan Yaahiwwe.

⁵ Yaahiwwe Waaqaayti karittaayti piisan ka isi piisan ka hupnaayti piisan jaalado.

⁶ Ka ajajjaddosen an awwe ke daanna iskara qapado.

⁷ Ka hellaatti kollishe ka oto tikaayti kara kutiitooyye taaki poroppa annittooyye taaki muknittooyye taaki xaanittooyye, oppa o'oore ka torraado.

⁸ Ka milikkita kodado ka harkaayti mina sukkado; ka akka matte oorsatto'e, fuuloppa hiddado.

⁹ Ka qora xarra tikaayti ka kullaysuma xarra paleetaayti quda taafado.

Ajajama diissata minan Dehaama daasame

¹⁰ Yaahiwwe Waaqaayshin piisse akka a aappadaassina a xatta Aprihaami ka Hisaaqi isho Yayqoopi daasho xaxa kale oppopa oto ishin kalshooyye, ka katamadda kukutta ka papaxxaara a ishina a qupnini,

¹¹ ka tikka a ishina wa papaxxaaraatin a immaknini ka qaawwa a pisha a ishina a qotannini ka dishmada wayneeta isho a ekerta a ishina a dishannini ishina daashooyye, akka damtan ka duttantaneeyye,

¹² Yaahiwwese karpishshuma piita Kipsi kela ishin sookshe akka a teyminini'i, isi tooyytaada.

¹³ Yaahiwwe Waaqaayshin tura fuura ka isha patta waaqaysada ka maxxaadin xaxada.

¹⁴ Ka waaqadda pila a orra ishin kapandesa kalooti kamma pora in aanan.

¹⁵ Akka miira Yaahiwwe Waaqaayshina ishin qara in xaanin ka piita qara ishinan patinnini'i, tooytaada; maana malla Yaahiwwe Waaqaayshin isase otantaayshin oppaayye kalo yo'ampayta Waaqa'ey.

¹⁶ Akka pora “Masaahi” kidammo oppa Yaahiwwe Waaqaayshin ekkaysatten mina'e, isha in ekkaysadan.

¹⁷ Ajajadda ka dehaama isho taantewwasene a Yaahiwwe Waaqaayshin ishina daashe qanqannissa tooytaada.

¹⁸ Akka ishina ettanto'e piitase Yaahiwwe aappadaassin a xattaati daassata xaxa kale oppopa akka kaltan ka qapattane'e, fuulaadi tura wa qajeele ka a paxaara koda.

¹⁹ Akka Yaahiwwe ishina kippeeta daashe qara'e, ishina ka nyaapaayshin piisa alle isi turaayye sookissan.

²⁰ Eta a itturopa deenaatiiyyi, oto hellaassin ishin kaassannaan ka kiinaane, “Dehaamose ka taantewwosen isho tampewwosen a Yaahiwwe Waaqinno ishina daashe maana'e ishina daasheyyee?”

²¹ Ishootta lela ka kida'e, “Piita Kipsi kara ino an karpishshadda a Feri'ooni; Yaahiwwe ka hupnase xaadi kuttanne kela ino sookshe.

²² Yaahiwwe ka ildaanno tura'e, piita Kipsi ka Feri'ooni isho toolaadi qara'e, milikkitadda isho daxxowwa a kukutta ka orra fuurinna kode.

²³ Ka akka piitase aappadaanno a xattati daasha xaxa kale oppopa ino kalsho'e ka ino daasho'e eeyye kara ino sookshe.

²⁴ Akka ino ettanto ikka a awwe mina awta piisa ino caaysho'e, akkan ino Yaahiwwe Waaqinno fuurro ka taantewwosen piisa tooytaanno'e, Yaahiwwe ino ajaje.

²⁵ Semmalla akka isha ino ajaje qara'e, oton in fuula Yaahiwwe Waaqinno tura'e ajajaddosen piisa qanqannissa kooneeyye, sede isheetta ino hanqeelluma kodda.”