Mataafa oppa' Ooreta 5 - Mataafa Qulqulloota

Seera kudani

¹ Muuse Isira'eeleta piisa ollopa hale ka ishootta kide, “Isira'eleteeyye, taantewwa isho tampewwa an awwe ishin tura dehanna dakkaysada ka kollada ka qanqannissa tooytaada.

² Yaahiwwe Waaqinno irroota Siinaatiiyyi ino olliiyyi kodayteeta kodade.

³ Umma Yaahiwwe kodayteese aappadaanno patta olli in kodanne ma, inosene awwe are tarra qara ca piisa kuli olli kodade.

⁴ Yaahiwwe irroota qaraxata apitta karaxata fuule desa ishina haasawade.

⁵ Ishina qoota apittase fuurten ka irrootase qaropa a fayyannin malla, anti ka qaaletase a Yaahiwwe ishina lela'e, awse Yaahiwwe isho ishin otantoppa qa'ade; Isha ka kide,

⁶ ‘Anti an Yaahiwwe Waaqaayshin a piita Kipsiti karpishshuma kela ishin sookshe.

⁷ Ana maliiyyi waaqadda pila in qapnaadan.

⁸ Wa moonta quda ca taaki piita qara ca taaki pisha kela ca oppaayye, we takkan nefo pahanaassotin in xefadan ka killoota in kodadan;

⁹ ka tura in kilpiippadan ka in waaqaysadan; anti Yaahiwwe Waaqaayshin an yo'ampayta Waaqa ka a ana needda haka xelta sessa ka a afuriti juppoota a aappadaassoti malla hellaasso qattaaniiy.

¹⁰ Ma xoori a ana jaalanna ka ajajiyyo tooytannaati'i, haka xelta kumaddaati'in xoonasene xayyo pirama in qapnini akkinni.

¹¹ Anti Yaahiwwe nama a maxxiyyo patta xa'inno an qatta'o mali an diinni an cooy, maxxiyyo a Yaahiwwe Waaqaayshina patta in xaashan.

¹² Akkiman anti Yaahiwwe Waaqaayshin ishin ajaje qara'e, kuyyaata a nessuma Waaqa ana xawwi reexxa ka ulfeessa.

¹³ Kuyyaata lehi kara kodaayshin piisa koda ka dikkisada.

¹⁴ Kuyyaata tappatta xoori, ana Yaahiwwe Waaqaayshina'e, kuyyaata nessumaey akka orxayaassin a diira ka a iskatta a xaayshin mina'ew nessadane'e, ishin isho hellaassin a diira ka a tuparra ka orxayaassin a diira ka a iskatta ka xormadaassin ka harreewwaassin ka horeetayshin piisa ka kalayta a ishin kara kalo koda takka nefo a kootan.

¹⁵ Xatta piita Kipsi kara ishin kuli akka karpishshadda kodditen, anti Yaahiwwe Waaqaayshin ka hupnase xayyo kutta ka harkase xayyo kokkokan kara ishin sookshe matte oorsada; se minanne anti Yaahiwwe Waaqaayshin ka akka kuyyaata a nessumiyyo ulfeessitane ishin ajaje.

¹⁶ Piita an anti Yaahiwwe Waaqaayshin ishina daasho oppa'e, akka paraayshin ishina deraado'e ikka ishina ettanto'e, akkan anti Yaahiwwe Waaqaayshin ishin ajaje qara'e, aappaayshin ka aayyaassin ulfeessa.

¹⁷ Nama in ishshan.

¹⁸ In sharmuutuman.

¹⁹ In hatan.

²⁰ Nama qara'e darta in maakkuman.

²¹ Iskatteeta a la'ayyo ka tikaadi ka dulaadi ka orxaytaadi ka orxayteetaadi ka xormaadi ka harreetaadi isho waadi a qapa takkan nefo in xajeelan.

²² Ajajase a Yaahiwwe irroota qaraxata apitta ka urratta isho tukkanta nan kiite karaxata nessa kuttan xoraayshin piisa hasawade sede; umma wa a qara padaawe in caan. Ka dakada qaqqaaha lakki qara poje ka ana daashe.

Samayta akkima fuure

²³ Ete irrootase apittan kupannittooyye, akka tukkantase karaxata nessa dakayteneeyye, ishin ka saarra kaffaassina isho qimayaassin pisanne ana kapopa deeten.

²⁴ Ka kiitene, ‘Yaahiwwe Waaqinno ulfeenaadi isho kuttumaadi ino akkishe, anka apitta karaxata nessaadi dakayne; akkima Waaqa nama olli haasawanno nama ka caatta ettaninno awwe in akkine.

²⁵ Oton ikki'in nessa a Yaahiwwe Waaqinno dakayninnaayye in leena; apittase kutta ka ino piraay, ka kuli maana'en leena?

²⁶ Akkiman ino dakayne ka ikki caattaan kinno mina'e, to'ampayta nama a nessa caattampayta Waaqa a apitta karadesa isha haasawanno dakaye ka caade hela ikinnaada?

²⁷ Atti isha kapopa dehaado ka wa a Yaahiwwe Waaqinno ke lela piisa turaayye ino lelew; in dakayna ka koonaay.’

²⁸ A ana haasawannittaneeyye, Yaahiwwe idakaye ka ana kide, ‘Wa samayse ke haasawade in dakaye; wa kidene nefo likkeeta.

²⁹ Akka kammopa ishootta isho hellaassoti ettanto'e, ana tura fuura'e ka ajajiyyo tooyta'e, kadin awta piisa dikatta asse paho qapnaanniiyyi atta paxaari.

³⁰ Aane ka ishootta kide, Tukkannaassin opa alle tiitaawa.

³¹ Piitase an akka qapadane ishootta daanno karaayye, akka tooytadane'e, ajajadda ka taanntewwa isho tampewwasene a ishootta kollissa piisan ke lelaay, are ana kapa jare.’

³² Semmalla wa Yaahiwwe Waaqaayshin ishin ajajna koda'e, qanqannissa tooytaada; umma kapaayye akkitta ka pittittopa in kidan.

³³ Piita a qapattan karaayye akka caattane'e, ikka ishina ettanto'e, paraayshin ka deraado'e, saanta a Yaahiwwe Waaqaayshin ishin ajajno pisa oppan aana.”