Mataafa oppa' Ooreta 4 - Mataafa Qulqulloota

Muuse akka Isira'eeleta ajajamto'e dehaame

¹ Sekkammaayye Muuse ka samayta kide, “Samayta Isira'eelitiiyyi, akka caattan ka piitase a Yaahiwwe Waaqase a aappadaassina ishina daanno oppopa kalta ka qapatta ettanissane'e, taantewwa isho tampewwa an awwe ishin kollinna dakaya ka koda qara nakaysha.

² Umma waan ishin ajajna qara'en padaawan; umma qara in qajishan; ma ajaja a Yaahiwwe a Poqallaassina an ishina daanno tooytaada.

³ Yaahiwwe wa irroota Pe'oori qara kode ildaassinanne akkiten; Yaahiwwe Waaqaayshin irroose a Pe'oori qaraayye orra ishin oppaayye killoose pa'ali kamma aane piisa pire.

⁴ Ma ishina Yaahiwwe Waaqaayshin quda koke xoori, tin piisani awwe ikki caattaan kittan.

⁵ Piisse a karopa kaltan ka qapattan karaayye, akka kootane'e, Yaahiwwe Waaqiyyo akka ana ajaje qara'e, anti taantewwa isho tampewwa in ishin kollishe.

⁶ Semmalla qanqannissa tooytaada, fuula samayta pila turaayye sede ookumaayshin ka upnaassina akkinniiy; oto taantewwasene piisa dakayaneeyye ikka ishina kidane, ‘Samayse asse kutta dukaata'en ookka ka upnampaya.’

⁷ Ata oton isha qinsanninno piisaayye akka Yaahiwwe Waaqinno a ino deha kodde mina'e, samayta kutta a pila a waaqaddaasso asse ishootta dehaane a xaame caaw?

⁸ Akka seerose an awwe ishina daanno hanqeellawe mina'e, samayta kutta a pila a taantewwa isho tampewwa a asse hanqeellaawe qapo a xaame ca?

⁹ Wa akkitene akka a teyminini'i, haka kittane'e ikka karittaayshin kara in pannini'i, isqara tooya ka qanqannissa tooytaada; ka hellaassin isho oopaddaassin sedeew kollisha.

¹⁰ Kuyyaase a oppaayye Yaahiwwe ana kide, ‘Haka piita qara caaneeyye akka ana fuureta kolladan ka hellaasso kuli kollishane'e, samayse ana turopa hale!’ Ishina ka irroota Siinaatiiyyi fuula Yaahiwwe a Waaqaayshin tura qa'atten matte oorsada.

¹¹ Ete irrootase urratta poora isho tukkanta a nan kiitin qara dekamteeyye, apitta a'illi lettoppa kayno ka qara opaynooyye ideeten ka irroose kela qa'atten.

¹² Yaahiwwe ka apittase kara xata ishina haasawade; akka nessa a haasawade dakayten. Umma nessa patta diisheey, pahanaadi a akkine.

¹³ Ka akka kootane'e, kodayteetaadi ishina salishe; kodayteese nefo seerase kudani, ikka dakadda qaqqaaha lakki qara poje.

¹⁴ Oto Yurtaanoosi tuullitaneeyye piitase a qapattan karaayye akka kootane'e, Yaahiwwe ka akkan taantewwa isho tampeewwa ishin kollisho'e, awseti ana ajaje.

Killowwa waaqaysatta akka dawrame

¹⁵ Kuyyaase a Yaahiwwe irroota Siina qara apitta karaxata ishina haasawadeeyye, pahana weti a akkineey, qanqannissa isi tooytada!

¹⁶ Semmalla akka pissa diirta taaki a iskattatinni pahana killoota takkan nefo xefattaan isi a nyalinnini'i tooyytada.

¹⁷ Ka asseew pahana pinanta a piita qara kittooti taaki a xampirteeta a moontan xa'annittooti,

¹⁸ taaki awa piitandesa titmannaati taaki murkuja pisha kela kalo in xefadan.

¹⁹ Akka moontandela a tooyyannin ka piirtota ka leya isho hiikka ka wa moontandela ca piisa oto akkitooyye, wossen a Yaahiwwe Waaqaayshin samayta a piita a pila piisa qootteeti sakatattan ka Waaqaysattaan kamma a dapnini'i, isi tooytaada.

²⁰ Xaayshin xoori akka awwe koddite mina'e, Yaahiwwe piitase a Kipsi poroodase apitta oppa sipla tummaan paho kara ishin sookshe ka samaytaadi ishin kodade.

²¹ Semaliiyyiiw Yaahiwwe ishin minanne ana qara miirode ka akkan Yurtaanoosi an tuullinini'i ka kappatayteetase a piita akka lehattane Yaahiwwe Waaqaayshin ishina daanno oppopa an kallini'i xaxade ka ana dawre.

²² Semmalla anti Yurtaanoosi an tuullo ma piisse oppa'en to'a; ishina xoori ituullitan ka kappatayteetase a piita qapattan.

²³ Akka kodayteetase a Yaahiwwe Waaqaayshin ishin oli kodade a teyminini'i, isi tooytada ka killootase a Yaahiwwe Waaqaayshin dawre, we takkan nefon pahanaayshan ka in xefadan.

²⁴ Maana malla Yaahiwwe Waaqaayshin yo'ampayta Waaqa, a apitta mina paata kupnooy.

²⁵ Oto piitase oppa a kuttati jartan ka hellaa xaayattan, oopadda kuli ka ishin qara daladaneeyye, akka killoota we takkan pahanassaan ka xefattaan nyaltaneeyye ka isha tanassa'e, fuula Yaahiwwe Waaqaayshin tura neequmta kootaneeyye,

²⁶ piisse a kirra Yurtaanoosi tuullitan ka lehattan oppaayye, akkima irra qara pattan anti awwe piita isho moontan ishin qara maakitta haleeni; umma piitase oppa a kuttati a jartan ma ipiramtan ka dapattan.

²⁷ Yaahiwwe samayta piitadda a pila oppopa ishin pasisha; samayse a piitadda pila a Yaahiwwe oppopa ishin pasisho kara ishin a peela hasa, akka shakkattan.

²⁸ Akka eeyye kara killowwa a qora ka a dakadda a nama harkan xefe, a paata akkini in kinnini ka paata dakayni in kinnini ka paata dammi in kinnini ka paata alaysanni in kinnini Waaqaysattan.

²⁹ Ka eeyye karaayye Yaahiwwe Waaqaayshin pora faataneew; oto karitta piisa ka isi piisan isha faataneeyye, i'isha teytan.

³⁰ Itturopa oto wossen piisa ishin qara kayan akka miiddamtaneeyye, Yaahiwwe Waaqaayshin opa tiitaawtan ka ishi ajajamtan.

³¹ Yaahiwwe Waaqaayshin qoota diissampayta Waaqa kodde malla, alle ishina in diisho umma alle ishin in pashsho; umma kodayteese xaadi a appadaassin a xattati xaxa kale in teymo.

³² Haka Yaahiwwe piita qara nama uume paayyatte ka a ishina a dalannin turan qoota eta a tarpeeti desa intoonno qoradaay! Ka piita isho moonta nefo kaassadaay! Hela wa asse kutta ka asse paha i'apari kodden ka dakaaden opanka upane?

³³ Akka ishina dakayten mina'e, samayta Waaqa apitta kara xata ishootta haasawade ikka dakaye ka caade hela i'apari ca?

³⁴ Hela akka Yaahiwwe Waaqaayshin piita Kipsi kara ildaassin tura kode piisa mina'e, Waaqa ekkaysumaddaanne ka milikkitadda orra qawwannaatinni ka daxxowwaanne ka orannaanne ka harkaadi a kokkoka ka hupnaadi a kutta isho wa kukutta ka orra tatammaqinaatin samayta takka xaadi kodatta'e, a aane ka samayta a piita pila kara samayta sookshe, Waaqa a pila i'apari caawwe?

³⁵ Yaahiwwe akkima isha patta Waaqa kodde, isha mali Waaqa pila ka in kinnin akka upnaattane'e se piisa ildaassin tura akkishe.

³⁶ Akka ishin dehaamo'e moonte xata nessaadi ishina dakaytishe ka piita qara apittaadi a kutta ishina akkisheew akka apittase kara xata nessaadi dakayten.

³⁷ Qoota aappadaassina a xatta jaalade ka ishootta kamma sanynyeetaysho reexade malla isha mattaadi'i hupna a kuttan piita Kipsi kara ishin sookshe.

³⁸ Sde nefo akka awwe koddite mina'e, akka samayta a lekuma ka kokkonnuma ishin qara jaallo ishin tura daano ka akka qapattane'e, piitaaysho ishina daasho malla.

³⁹ Semmalla illi moontanne ka are piitanne Yaahiwwe akkima Waaqa kodde awwe upnaada ka karitta kara qapada; a pila in cooy.

⁴⁰ Semmalla akka ishin isho ishin kamma hellaassin kuli ettanto'e, piitase a Yaahiwwe Waaqaayshin ishina daanno oppa'e, paraayshin ka ishina deraado'e, awta piisa taantewwaadi isho ajajaddaadi an awwe ishina daanna tooytada.”

Katamadda a nama tarshan nama ishshe karopa qaha

⁴¹ Sekkammaayye Muuse ka Yurtaanoosiiyyi qinda piirtotatin katamadda sessa reexe.

⁴² Sede nefo wa malla asse kode a turan olli paarkalummaata in qapnin mali nama a tarshan nama ishsho akka karopa qaho ka oto katamaddoosen oppa takka karopa qahooyye issin paho malla.

⁴³ Katamasene Apeseeri koommaytoppa irroota qara ca, kafa Ropeeli'i daashe; ka katamasene kele'adi kara ca a Raamooti, kafa Kaati daashe ka katamasene Paasaani karaayye ca a Koolaani, kafa Minaase daashe.

Akka Muuse seera Waaqa olkela la'ayshe

⁴⁴ Sede seerase a Muuse Isira'eeleta tura dehayshe.

⁴⁵ Awta Isira'eeleta Kipsi kara sookteeyye, dehaama ka taantewwa isho tampewwa a Muuse ishootta tura dehayshe sene.

⁴⁶ Sede nefo a Yurtaanoosiiyyi qinda piirtotatin katama a Petipe'oori kapa safarteeyye isheetta daashe; porose a oppa safaren nefo, turanne Siihooni nuqusase a Amoorata a katama Hasepooni mukinnooti; Muuse isho Isira'eeleta ka a Kipsi kara sooken kamma isha puten.

⁴⁷ Ka asseew Yurtaanoosiiyyi qinda piirtotatin piitaadi isho piita Paasaani a Ooki a nuqusase a Amoorata kuli qeedeneew.

⁴⁸ Piisse nefo kirrase a Arnooni kapa katama a Aro'eeriti xaani ka qinda qutattatin irrootase a Siriyooni Hermooni kidammitto kayni.

⁴⁹ Ka Yurtaanoosiiyyi qinda piirtotatin piita a kitto piisa karopa qapanni ka qinda tupattatin pakateeta sookitta kayni ka qinda piirtotatin irroota Piska kela kayni.