Mataafa oppa' Ooreta 34 - Mataafa Qulqulloota

Toota Muuse

¹ Muuse ka laka Mo'aapi oppa xa'e ka irroota Neepo qaropa aane ka irrootase katama a Iyyaarkoti qinda piirtotatin kitto a Pisikaati kuuta qaropa fayyade; Yaahiwwe ka piitase piisa ishi akkishe; isheetta nefo Kele'adi paayyatte haka Taaniti'i,

² ka Niftaalemi piisa ka piita Efreemi isho a Minaase haka pakateetase qinda dumaatetati kittoti'i, piita Yihuta piisa,

³ ka Nekeepi isho lakaadi ka naaba Iyyaarkoti ka Iyyaarkose “Katama Sampaapa” kidammittooyye xaate ka haka piita So'ariti kitto piisa ishi akkishe.

⁴ Yaahiwwe ka Muuse kide, “Piitase an Aprihaami ka Hisaaqi isho Yayqoopi xaxade ka kippeeta daashe ka kide, ‘Sanynyeetayshina'en daasha.’ In ke akkishe; akka ildaattin akkite; ma a tuullito ka karopa a kalto.”

⁵ Orxaytase a Yaahiwwe Muuse ka akka Yaahiwwe ishi kide qara'e piita Mo'aapi oppa to'e.

⁶ Ikka piita Mo'aapitiiyyi naabase Peetipa'ori minaadesa co kara isha hawle; ma xoori haka awweti'i pora oppa mookame nama a upo takka nefo in co.

⁷ Muuse a to'eyye paraadi dippa ka kunda lakki; ma xoori ildaadi in lulle umma hupnaadi in nukkullaanne.

⁸ Isira'eeleta ka haka Muuse pooyeta ka isha nyarraaha dikkinnitto kara'e, laka Mo'aapi oppa kuyyaata kunda sessa isha pooyte.

⁹ Qoota Muuse turan isha qara harkaadi qapade malla, Iyyaasu inna Newe ka hapura ookumaatin immakaade; samayta Isira'eeli piisa ka isha afa dakaye; ka wa Yaahiwwe turan Muuse ajaje piisa kode.

¹⁰ Umma sekkammayye xuumampayta a Muuse paho a Yaahiwwe fuule desa isha haasawade Isira'eeli kara in xaane.

¹¹ Akka nuqusa piita Kipsi ka saarraadi qara ka piitaadi pisa oppa kodo'e, daxxowwasene isho milikkitaddasene a Yaahiwwe Muuse erkeeyye kode paha a kode, nama takka nefo in co.

¹² Umma hupnase kutta ka kodaddasene kukutta ka orra fuurinna a Muuse Isira'eeli tura kode paha, nama kode takka nefo in co.