Mataafa oppa' Ooreta 31 - Mataafa Qulqulloota

Iyyaasu akka pakka Muuse oppa reexame

¹ Muuse ka samayta Isira'eeli piisa haasawatta kammaaw caade;

² ka ishootta kide, “Anti pariyyo dippa ka kunda lakki kaye, umma a xatta mina'e ishin mukissa an ettansho; Yaahiwwe nefo i'ana kide, ‘Kirroose a Yurtaanoosi a tuullito.’

³ Yaahiwwe Waaqaayti isha ke tura qatta ka aana; ka ke turaayye samayse pira, atti ka piitaaysho lehatta; akka Yaahiwwe haasawade mina'e, Iyyaasu ka ke tura qatta ka ken tuulla.

⁴ Yaahiwwe akka nuqussasene a Amoorata Sihooni ka Ooki isho piitaaysho pashshe mina'e, asseew ishootta pashsha.

⁵ Yaahiwwe ka ishin turopa ishootta tuukka; ishina ka waan anti ishin ajaje piisa ishootta qara kootan.

⁶ Kokkonnaada ka maxanyuma fayya qapnaada; umma ishootta tura in fuuran ka in tammaqan; maana malla Yaahiwwe Waaqaayti isha mattaadi ke olli aana; umma alle ke in diisho ka alle ke in kato.”

⁷ Kammadesa Muuse ka Iyyaasu hale ka fuula samayta Isira'eeli piisa tura ishi haasawade ka kide, “Piitase a Yaahiwwe akka ishootta daasho aappadaassina a xattati xaxade ka kippeeta daashe karopa samayse olli anta ka akka lehadane kootaay, kokkonnaado ka maxanyuma fayya qapnaado.

⁸ Yaahiwwe mattaadi ke turandesa aana ka ke olli kinnaada; umma alle ke in diisho ka alle ke in katooy, in fuuran umma in tammaqan.”

Akka seerase para tappa oppa takkan nappapamo

⁹ Muuse ka seerose taafe ka hellaasene a Lewi qeesewwasene taapotase a kodayteeta Yaahiwwe haana isho saarra samayta Isira'eeli piisa daashe.

¹⁰ Sekkamma Muuse ka ishootta ajaje ka kide, “Parase a tappattati piraampira qara etasene a oppa leqa piisa diisammaan opanka xaysonessuma a shaakka ulfeessinaan oppaayye,

¹¹ oto Isira'eeleta piisa fuula Yaahiwwe Waaqaayti tura'e pora ishi reexade oppa akka akkaannittooyye, seerose ishootta tura nappape.

¹² Akka pisani dakkaysadane'e ka Yaahiwwe Waaqaayshin tura fuuraan kallaadane'e ka qaaleta seeroseti qanqannissa tooytaadane'e, diira ka iskatta ka hellaa isho kalayta a katamaatti oppa kalo piisa ollopa hale.

¹³ Piisse a kirra Yurtaanoosi tuullitan ka lehattan karaayye haka kittaneeyye, hellaassin a seeroose in upnini ka dakayen ka Yaahiwwe Waaqaayshin fuura kolladen.”

Dehaamta a piraampira a Waaqa Muuse daashe

¹⁴ Yaahiwwe ka Muuse kide, “Tin kuyyaata a oppa tooto idehaatteey, Iyyaasu hale ka akkan isha ajaja daasho'e, ollin tukkaniyyo turopa dehaada;” Muuse isho Iyyaasu ka ollin aanen ka tukkanase a Yaahiwwe turopa dehaaden.

¹⁵ Yaahiwwe ka tukkanase qara'e tuuda urrattatin lekkade; tuudase a urratta ka tukkaneeyye xarroppa qa'ade.

¹⁶ Yaahiwwe ka Muuse kide, “Tin, atti dehaynittoppa'e akka aappadaassina mina toota; samayse ka xa'a ka killowwa a piitase a karopa kalo kara caati sakatattaan nyala; ka alle ana diisha ka kodayteeta an isha olli kodade alle poota.

¹⁷ Awsetiiyyi miiriyyo ka akka apitta mina ishootta qara opaya; anka alle ishootta diisha ka fuuliyyo ishootta tura quu'a ikka piraman; neequmta isho rakkoota lekayteeta ka ishootta qara kayta ikka awse kidane, ‘Ha wa malla rakkoose piisa ino qara kayte, Yaahiwwe alle ino diishe.’

¹⁸ Qoota killanna opa tiitaawaan neequmta koden malla anti ka fuuliyyo alle ishootta tura quu'a.

¹⁹ Semmalla amma masmuurese taafada ka samayta Isira'eeli kollisha; ka akka ishootta qara ana maakkitta koddito'e ikka dawaden.

²⁰ Piitase a aanna isho takma oppa puren an aappadaasso a xattati xaxade ka kippeeta daashe karopa oton ishootta kalshooyye, ikka daman ka dudutanan ka kakappadan kammaayye, ana jippan ka kodayteetiyyo pootan ka killanna opa tiitaawan ka ishootta waaqumsadan.

²¹ Oto neequmta ka rakkoota a kutta ishootta qara kaytooyye, masmuurese afa sanynyeetaaysho oppa in teymamto ma maakkitta koddita ka ishootta qara maakkumta; maana malla piisse an ishootta xaxade ka kippeeta daashe karopa an ishootta an kalinnin turan, wa a koda dikadene in upaay.”

²² Muuse ka awsi'iw masmuurese taafe ka samayta Isira'eeli kollishe.

²³ Yaahiwwe ka Iyyaasu innasene a Newe ajaje ka ishi kide, “Piitase akkan ishootta daasho'e samayta Isira'eeliti xaxade ka ishootta kippeeta daashe karopa ishoottan kaltaay, kokkonnaado ka maxanyuma fayya qapnaado; anti ke ollin caay.”

²⁴ Ete Muuse qaaleta a seeroseti piisa mataafa kara taafe ka dikkisheeyye,

²⁵ Lawaatase taapotase a kodeeta Yaahiwwe haanitto ajaje ka ishootta kide,

²⁶ “Mataafose a seera qeeda ka akka ishin qara maakkitta koddito'e, taapotase a kodeeta Yaahiwwe Waaqaayshin kapa xaaya.

²⁷ Tin, a atta kitto akkima falqoolaya ka kamtoollaya kodditen in upa; an in toonin ka ishin kapa cooyye oto Waaqa qara falqoolaya kodditeneeyye, oton to'o desa atta falqoolaya kodditaneew?

²⁸ Akkan ishootta haasawado ikka dakayane'e, aana ka akkan moonta isho piita ishootta qara maakkitta halo'e, saarra a kaffaassina isho taanynyadaassin piisa ana turopa xora hala.

²⁹ Oton to'o kammaayye akkima a kuttati nyaltan ka saanta an ishin ajaje qara alle maqqitan in upa; qoota neequmtaayshinan Yaahiwwe miira nyarissan malla, neequmta ishin qara kaya.”

Masmuureta Muuse

³⁰ Muuse ka qaalewwa a masmuureseti xora samayta Isira'eeli piisa tura haka piraampirati nappape ka ishootta dakaytishe ka kide.