Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Mataafa oppa' Ooreta 30 - Mataafa Qulqulloota


Saka oto Waaqopa tiitaawaneeyye akkannaan

1 Oto sakoose isho jiijoosen an ke tura xaaye piisa ke qara kaynaaneeyye akka samayse a Yaahiwwe Waaqaayti oppopa ke pasishe oppa matte oorsattooyye,

2 ke isho hellaatti ka akkan awwe ishin ajajno qara'e karittaayshin piisan ka isi piisan Yaahiwwe Waaqaayshin opa tiitaawtan ka ajajaadi tooytannittaneeyye,

3 Yaahiwwe Waaqaayti amma ke suraysadaaw ka samaytase a piita a opppa ke pasishe oppaayye amma ollopa ke oorsadaaw ka teyantaayshin ishina oorshaaw.

4 Kadi punu piita qara pora akata seka opa daanamtaayye, Yaahiwwe Waaqaayti eyyeeyye kuli ollopa ke oorsha ka ke tiitaysha.

5 Ka piitase a aappadaassina oppopa ke kalsha ka a aappadaassina qaran qapto'e, ke teyantaysha ka ke leksha.

6 Akka caatto'e ka Yaahiwwe Waaqaayti karittaayti piisan ka isi piisan jaalatto'e, Yaahiwwe Waaqaayti ke isho sanynyeetaayti'i karitta isha afa dakayno daasha.

7 Yaahiwwe Waaqaayti ka jiijoosen piisa nyaapase xaayti ke needdo ka ke miino qaropa tiitaysha.

8 Atti ka amma Yaahiwwe afa dakaytaaw ka ajajase xaadi an amma ke daanno piisa tooytaattaaw.

9 Yaahiwwe Waaqaayti ka wa kodannitta ka hellaa a xaayannitta ka lekuma lo'allaatti isho unta a dulaaytippa palaysannitto piisan a kuttati ke teyantaysha; Yaahiwwe ka akka aappadaassina a xattatin xasoode mina'e ke teyantassaan xasooda.

10 Sede nefo oto Yaahiwwe Waaqaayti afa dakaynitto ka ajajaadi ka taantewwaadi a mataafoose a seera kara taafame piisa koonittooyye ka Yaahiwwe Waaqaaytipa karittaayti piisa ka isi piisan tiitawnittooyye asse koddita.


Toota isho caatta oppa takka reexatta

11 Ajajose an awwe ke daanno akata ke kapa in sekan.

12 Akkan dakayno ka koono'e, “Ayno kamma moontopa fayyada ka ino qeeda?” Akka a kiinini'i, isheetta moonteeyye in kitto.

13 “Akkan dakayno ka koono'e, ayno pakateeta tuulla ka ino qeeda?” Akka a kiinini'i, isheetta pakateete afa disiti in kitto.

14 Ma ha qaalese akata ke kapa dehi; ka akka kooto'e afaatti ka karittaayti kara kitta.

15 Tin anti awwe caatta ka toota ka a paxaara ka a neeqa'en fuulaayti tura xaaye.

16 Yaahiwwe Waaqaayti jaalattaanne ka saantadaadi oppan antaanne ka ajajaadi ka taantewwaadi ka tampewwaadi tooytattaanne, oton ajaja a Yaahiwwe a Waaqaayti tooytannittooyye, piisse a karopa kalto ka lehannitto oppaayye ke saka.

17 Ma xoori, oto karittaayti alle tiitaawooyye akka a ajajammi a kinniniiyi ka killanna pilaati sakatatta isho waaqaysatta sassapamtooyye,

18 akka patto'e anti kuyyaase a awwetiiyyin ke lelle; piisse a kara kallaatta ka lehatta Yurtaanoosi oppan tuullinitto kara a kuttati a jarto.

19 Akkiman toota ka caatta ka saka isho jiija fuulaayti tura xaaye, anti awwe piita ka moontan ke qara maakitta haleeni; semmalla ke isho sanynyeetaayti akka caattane'e caatta reexada.

20 Yaahiwwe Waaqaayti jaalado ka isha afa dakaye ka isha quda koke; maana malla ini caattaay; piitase a Yaahiwwe aappadaassina a xatta Aprihaami ka Hisaaqi isho Yayqoopi xaxade ka ishootta kippeeta daashe kara'e akka parra leka ishin kallaattaay.

ကြှနျုပျတို့နောကျလိုကျပါ:



ကြော်ငြာတွေ