Mataafa oppa' Ooreta 3 - Mataafa Qulqulloota

Akka Ooki nuqusase a Paasaani putame

¹ Sekkammaayye anka tiitaawne ka pora Paasaani qapanne ka anne; Ooki nuqusase a paasaani ka xelaadi a oranna piisa qapade ka Edire'i karopa ino torpa tuule.

² Ma xoori Yaahiwwe i'ana kide, “Anti isha ka xelaadi a oranna isho piitaadi harkaayshin oppa'en daasheey, isha in fuuran; waasene a Siihoni nuqusase a Amoorata katama Hesepooni mukinno qara kootene isha qara kodaaw.’

³ Semmalla Yaahiwwe Waaqinno ka Ooki nuqusase a paasaani isho samaytaadi piisa harkinno oppa daasheew; anka ishootta piisa pirre, umma takka nefo kela an hattinne.

⁴ Sitiiyyi katamaddaadi piisa qaran pirre. Umma katama a ino kela hase takkan nefo in caan; seeminan anka katamaddasene kunda lehi a Ooki a nuqusase a paasaani piita Arkoopi kara mukinna piisa qara pirre.

⁵ Katamaddoosen piisa kawwatta a dedderatinni kapa qorramen ka xarrada a torpampayaan dufamma qapan; paleewwa a kapaayye kawwatta in qapnini lekaya ka caan.

⁶ Anka akkan Siihoni nuqusase a Hasepooni qara koone mina'e, ishootta piisa pirre; ka katamaddaasso kara diirraasso ka iskattaaysho isho nyooqawwaasso piisa pirre.

⁷ Ka horeetaysho isho waan katamaddaasso kara poojne piisa issi teyyanne.

⁸ Semmalla anka nuqussoosen lakki a Amoorata qaraayye Yurtaanoosiiyyi qinda piirtotatin kirra Arnooniti paayyatte haka irroota Hermooniti'i, piita a kitto piisa qeenne.

⁹ Sidoonata, irroose a Hermooniti'i, ‘Siiriyoni’ kiini; Amoorata xoori ‘Seniiri’ isheetta kiinika haleeni.

¹⁰ Saanta asse pahatonne katamaddasene Pattaappa ca piisa ka awrajjaddaasene a Kele'adi isho a paasaani piisa haka katama Asaaleka isho a Edire'i isasene piitase a Ooki nuqusase a paasaani mukinno piisa qara pirre.

¹¹ Sanynyeeta Refaaymeeta oppa a peella hase Ooki nuqusase a paasaani patta; looshshaadi siploppa kodamen; ishootta derumaasso dikla sakali ka paldumaasso dikla afuri. Ka haka ammati katama Amoonatati Raapa kara caan.

Kaffa a Yurtaanoosiiyyi qinda a piirtotatin safare

¹² Sitiiyyi anka piitase an qapanne oppaayye, katamasene a Aro'eeri kirra Arnooni kapa caati paayyatte a qinda piita qutatta opa kitto isho piitase a Kele'adi kunkunnawwa qapto qudaayye paka takka ka katamaddaadi ollin kafa Roopeeli isho a Kaati daashe.

¹³ Ka kafa Minaase quda paka takka'e, piitase a Keleaadi kela hasse isho piitase a Ooki mukinno a paasaani piisa daashew. Isheetta nefo piitase a Arkoopi piisa kideeta. Haminta a Pasaani piisa piita Rafaaymeta'e kidammi.

¹⁴ Isase sanynyeeta Minaase oppa dalade Ya'iri ka piita Arkoopi piisa teyyade; ishootta nefo paasaanise haka xeela Keshuuri ka a Maa'ikkaati kitto; ka akka palewwosen maxxaadin halaamane kode; ikka haka awweti ‘Paleewwa Ya'iri’ kidammi ka halaammi.

¹⁵ Anka piita a Kele'adi hellaasene a Minaasi oppaayye Maakiri daasheew.

¹⁶ Ka kafa Ropeeli isho a Kaati'i, piita Kele'aaditi paayyatte haka naaba Arnooniti kitto daashew; xeelaadi qinda tupattatinni olli qootta a kirra arnooni'i kayni; ka qinda qutattatinniiw, kirrase a Yaapoqi xeela Amoonata quda co kayni.

¹⁷ Ka qinda dumaatatinni, piita Arapa ka a Yurtaanoosi isho piita a kapandesa kitto kuli karopaaw qapanni ka qinda piirtotatinniiw, pakateeta a Kelilaati paayyatte haka pakateetase a sookitta irroota Piska kela kitto kayni.

¹⁸ Sitiiyyi anka ishin ajaje ka kide, ‘Akka lehattane'e Yaahiwwe Waaqaayshin piisse i'ishina daashe; ma xoori ishin oppa orra oranna torpa kaye, a mehadda oranna hidado ka hellasene xaayshin samaytase a Isira'eeli turopa tarpo.

¹⁹ Ma xoori akka horeeta kuttayteeta qaptan in upaay, iskattaayshin ka nyooqawwaassin isho horeetaayshin katamaddasene an ishina daashe kara diisha.

²⁰ Ka Yaahiwwe akka ishin nessishe mina'e, haka hellaassin a Isira'eeli nessinno ikka Yurtaanoosi afa disiti piitase a Yaahiwwe Waaqaayshin ishootta daanno qapannaan kara'e, eeyye tawan. Sekkamma oori piisani piita an ishina daashe oppopa tiitaawtaneey.’

²¹ Sitiiyyi anka Iyyaasu hale ka ishi kide, ‘Yaahiwwe Waaqaayshin wa nuqussasene lakki qara kode ildaattin i'akkite; ka mankistewwa a oppopa annitta kuli asseew koda.

²² Yaahiwwe Waaqaayshin isha ishina torpaay, ishootta fuureeta ishin parpaaccisni in kitto.’

Muuse akka Kene'aanipa in kallini'i dawrame

²³ Sitiiyyi anka Yaahiwwe qinsade ka kide,

²⁴ ‘Oo Yaahiwwe Poqallaayyo, waasene kukutta ka orra qawwanna a itturopa koota oppaayye a paayyota patta ana orxaytaayti akkisse; ka allu waaqa a xaame piita ka moontan ca ka wossen kukutta ka orra qawwanna a koonitta koda ettansha?

²⁵ In ke qinsanniiy ana tuullo ka Yurtaanoosi afa disitiiyyi kappatayteetase a piita paxaara kunkunnawwa qapto isho irrowwa a Lipaanoosi akko.’

²⁶ “Yaahiwwe xoori ishin minanne ana qara miirode ka ana dakaya tiite; Yaahiwwe ka ana kide ‘Ikodditeey qootoseti desa lammatta ana qara an xaashan!

²⁷ Ma xa'e ka irroota Piska qaropa fayyado ka qinda qutatta isho a tupatta ka qinda piirtota isho a dumaata opa tooyyado ka ildaatti pattan piisse akke diisheey, Yurtaanoosi a tuullito.

²⁸ Ma a samayse tura qatto ka piisse a ildaattin akkite akka qapadane kodo, Iyyaasuuy, isha ajaje ka isha kokkonnayshe ka japeesse.’

²⁹ Semmalla ino ka naabase an kara safarre isase katama Petipe'oori turaayye co kara jarre.”