Mataafa oppa' Ooreta 26 - Mataafa Qulqulloota

Qarpatta isho harka kudan oppa takka a Waaqa kallo

¹ Piitase a Yaahiwwe Waaqaayti akka lehatto ke daanno karopa oto kaltooyye ka qapattooyye ka kara kallaatta paayyitooyye,

² piisse a Yaahiwwe Waaqaayti ke daanno oppaayye wa palaysannitta ka ferannitta piisa qaraayye, qarpatta qeede ka satara karopa ollopa oorshe ka porase a Yaahiwwe Waaqaayti akka maxxaadi oppa halaamo reexado opan aane.

³ Ka qeesitta a siti koda qara co kapopa dehaado ka ishi kide, “Piitase a Yaahiwwe aappadaanno a xattati xaxade karopa akkiman kale, anti awwe fuula a Yaahiwwe Waaqaayti tura'en upnaanni.”

⁴ Qeesitta ka harkaaytippa sataroosen qeedo ka porase a kalisoota a Yaahiwwe Waaqaayti tura xaayo.

⁵ Atti ka fuula a Yaahiwwe a Waaqaayti tura haasawattaaw ka kiita, “Aakkinno a xatta Sooritta a pora kotaanno ka toolaadi ollin piita Kipsi opa aanen ka eeyye kalayta kodden; ka samayta kuttayta ka a kokkoka ka a leka kodde.

⁶ Kipseeta xoori i'ino miiddite ka ino jeerisse ka akkan karpishshaddaasso koddino ka kela koda koono ino kitteessite.

⁷ Anka Yaahiwwe Waaqase a aappadaanno a xatta opa ullupanne; Yaahiwwe ka ullupittinno dakaye ka payyaahinno ka yaalinno ka miiddaminno akke.

⁸ Yaahiwwe ka hupnase xaadi kutta ka harkase xaadi kokkokan ka tammaqissa a kuttanne ka milikkitadda isho daxxowwaan eyye kara ino sookshe.

⁹ Ka poroose oppopa inon de'e; ka piitoose a aanna ka takma oppa puren ino daashe.

¹⁰ Tin amma oo Yaahiwwe, piitase a atti ana daasse oppaayye waan palaysade qaraayye qarpattan in ke de'e.” Ka oori satarasene fuula Yaahiwwe Waaqaayti tura xaaye ka Yaahiwwe Waaqaayti tura sakatado.

¹¹ Ke isho toolaayti ka waasene paxaara a Yaahiwwe Waaqaayshin ishina kode piisan xasoottan; Lawaata isho kalayta a ishin oppa kalo kuli ka ishin olliiw xasooda.

¹² Para sessatta a oppaayye wa feradene qara harka kudan oppa takka sookinnaan oppaayye, wa akkatte qara harka kudan oppa takka qeede; ka akka wa damane akkadan ka duttanane'e, Lawaata ka kalayta ka hellaa a aappadaasso qara le'ene isho he'aya daashe.

¹³ Ka oori fuula a Yaahiwwe Waaqaayti tura kide, “Qoottotase qulqullaawte in tikiyyo oppa sookshe ka akka ana ajajte piisa qara'e, Lawaata ka kalayta ka hellaa a aappadaasso qara le'ene isho he'aya qoote; umma ajajayti oppaayye takka nefo qaranne an tarpine; umma takka nefo an teymine.

¹⁴ An namiyyo a to'e pooyannooyye, qoottotase qulqullaawte qudaayye an damme; umma an nyaleeyye waan qara mayshe in caan, umma qaraayye kaarayya kalisoota an kalinne; afa a Yaahiwwe a Waaqiyyoti in ajajame; ka akka ana ajajte qara'e piisa kode.

¹⁵ Moonteeyye tikase a xaayti qulqullaawteeyye opa xata tooyyado; ka akka aappadaanno a xattati xaxatte qara'e, samaytase xaayti a Isira'eeli isho piitase a ino daasse isase a aanna isho takma oppa purene sake.”

Samayta a Waaqa reexame

¹⁶ Awwe Yaahiwwe Waaqaayti akka taantewwosen isho tampewwoosen tooytaatto'e ke ajajni; semmalla atti karittaayti piisan ka isi piisan qanqannissa ishootta tooytado.

¹⁷ Yaahiwwe akka Waaqaayti kodde, akka saantadaadi oppan anto'e ka taantewwaadi ka ajajaddaadi isho tampeewwaadi tooytaatto ka afaadi dakayto awwe i''upnasse.

¹⁸ Yaahiwwe kippeeta a turan ke daashe qara'e akka samaytaadi ka qoottotaadi a kokkoka koddito'e ka ajajaadi piisa tooytatto'e awwe i'upnayshe.

¹⁹ Yaahiwwe Waaqaayti akka samayta a uume piisa qaropa kalata ka kurra ka ulfeenan ke jaalsho'e, atti ka kippeeta a turan ke daashe qara'e isha samayta a xawwi reexxame koddito i'upnayshe.”