Mataafa oppa' Ooreta 25 - Mataafa Qulqulloota

¹ Oto nama lakki oli piro ka taanynya turopa dehaadooyye, taanynya ka deexaaysho muraneeyye, a dapa in qapnini'i, a dukaata kalshen ka a ishin dape qara dapa muren.

² Namoose a qara dapa murame oton qidama parpaaccisniiyyi, taanynya, a piita isha mukkishen ka kessa qara oorshen ikka taanynya tura qidamo; ma a dapaadi mina kittow karafamo.

³ Umma qidamittaadi kunda afur qara in jaalin; oton sede qaropeela jaalliiyyi, innaassin a piita'e kojeessamaay.

⁴ Xorma unta tuma qara co tupa afaa in hidan.

Nama takka wa innaasso a to'eti koda parpaaccisnitta

⁵ Hellaa a diira a toola takka oto ollin kallaannaaneeyye ishoottoppa takka ka a inna diirta in xaayannin mali to'ayye, iskatteeta a innoosen xaaysho to'eti lakopa in sooknin ka nama pila opa in hemammin; ma inna opa diirtaadi a isheetta quda ooro ka isheetta teyyado.

⁶ Akka maxxa a innoosen xaaysho to'e Isira'eeli kara in pannini'i, inna a diirta a iskatteese paayyota isha xaayte, maxxa innasene to'eti halaaccisa.

⁷ Ma xoori oto inna opa namoose to'eti iskatteese a innaassoti quda ooreta in heenniniiyyi, iskatteese a innaassoti a mooraappopa qimaya turopa anto ka ishootta kiito, “Inna opa diirtiyyo akka maxxa innaassoti Isira'eeli kara in pannini kodeeta itiite; ka ana quda ooreeta kuli in heennaannin.”

⁸ Sekamma qimoota paleeseti ka namoose halen ka isha kaassaden; oton ikki'i isheetta quda ooreta tiinni ka kiini, “An heenooyye.”

⁹ Iskatteese a innaassoti a fuula qimaya paleeta tura isha turopa dehaatto ka loqtaadi takka kela xoptaadi sookisso ka ildaappa ishi tufatto ka kiito, “Nama a tika innaassoti kuttissa in heennin piisa qara a'asse koddito.”

¹⁰ Maxxaadi a Isira'eeli kara jeero ka kidamo, “Sanynyeeta a namase xopa kela sooksamene.”

Ajajadda a pila

¹¹ Diirra lakki oto oli qiinaaneeyye iskatteeta takkati ka diirtaadi awlito ka isase diirtaadi qiino kela dawra qaptooyye,

¹² isheetta in suraysadan ma harka tupa mura.

¹³ Akalaayti kara taasa ika lakki, a shakka ka a kutta in qapnaadan;

¹⁴ umma tikaaytippaayye taara kura ika lakki a shakka ka a kutta in qapnaadan.

¹⁵ Piita a Yaahiwwe Waaqaayti ke daanno karaayye akka paraayti ke deraado'e, taasa ka taara kura a dukaata ka a qajeele qapnaado.

¹⁶ Maana malla Yaahiwwe Waaqaayti orra a asse koono ka paata tamalmalinno piisa ifanniiy.

Ajaja akka Amaleqeeta alle pirane daasame

¹⁷ Apiita Kipsi kara sookteeyye wa Amaleqeeta poroppa ke qara koote matte oorsado;

¹⁸ a poroppa kafatte ka nukkullaatteeyye, ke qara'e xaate ka a ke kamma makke ka lokko lohna piisa lesse; umma Yaahiwwe tura in fuurre.

¹⁹ Semmalla piitase a Yaahiwwe Waaqaayti akka lehatto ke daanno karaayye, oto nyaapaayti a ke kapandesa kalo kela ke nessishooyye akka nama takka nefo matte ishootta in oorsannini'i, sanynyeese a Amaleqeeta piisa piita qara alle pire ka sede in teyman.