Mataafa oppa' Ooreta 23 - Mataafa Qulqulloota

Orra xoora samayta Waaqa oppa dawrame

¹ Nama qolpame taaki a saalaadi murame, xora samayta Yaahiwwe oppa in qapnaannin.

² Nama tiqaala dalade taaki sanynyeetaadi kadi punu haka xelta kudaniti caannaaneeyye, samayta Yaahiwwe oppa in qapnaannin.

³ Nama Amoonitta kodde taaki Mo'aapitta kodde, sanynyeetaadi kadi punu xelta kudan kaytaayye, xora samayta Yaahiwwe oppa in qapnaannin.

⁴ Maana malla a piita Kipsi kara sookte ka anta qara kittooyye, laaqqota isho pisha in qapanne ka ke mina mina'anayta in deene; ma laadi akka ishin jiijo'e Mosoppotaamiya karaayye katama Petooriti Pele'ami inna Pi'oori xaayyadeneey.

⁵ Ma xoori Yaahiwwe Waaqaayti Pele'ami'i in dakayne; Yaahiwwe Waaqaayti qoota ke jaalanno malla jiijasene sakopa ke purshe.

⁶ Haka kittooyye nakayta ka teyanta ishootta'en fadan.

⁷ Etoometa sanynyeetayshinaay, ishootta in jippan umma Kipseeta in jippan; piitaaysho kara'e kalayta koddite ka kallaatteey.

⁸ Oopaddaasso, xora samayta Yaahiwwe oppa qapnaatta i'ettanshan.

Qanqannuma a safara oranna

⁹ Oto nyaapaayti torpa tuulto ka safartooyye, nyala piisa kela isi tooyte.

¹⁰ Ishin oppaayye nama takka oton halkeette xorma isha kara urqa ikka nyalaayye, a safareeyye laka tulopa sooko ka eyye tawo.

¹¹ Ka oto dummittooyye dakintaadi piisa jaqado ka oto letta dumtooyye safaroppopa kalo.

¹² Pora oppopa dina antan safareeyye laka tula kodada.

¹³ Ka meehaayti a oranna olliiyyi kujummitta iskela qeedado ka oto dina annittooyye qaawa qudde ka kara utaawe ka qaropa piita oorshe.

¹⁴ Yaahiwwe Waaqaayti ke tooyta'e ka nyaapaayti ke turopa tuukka'e, qoota safaraayti oppa pora anno malla akka wa a dappaawna ke kara in akkinin ka ke qaraayye alle in tiitaawnini'i, safaraayti a nyala mali caado.

Seera ika lekayta

¹⁵ Karpishsha a poqallaadi kela qahe ka piitaayti oppopa de'e, poqallaadi turopa ishan tuukkan ka in daashan.

¹⁶ Katamaddaatippa takkan kara'e, pora a reexade ikka ishi paxaari oppa'e a ke kapa'ew kallaado diisheey isha in miiddan.

¹⁷ Hellaa a Isira'eeli a tuparra isho a diira akka orra killoota saksanno tika killoota kela sharmuutummo mina'e, ishina asse in kodan.

¹⁸ Yaahiwwe Waaqaayti kaaja a sharmuutuma kela de'e ixaccisanniiy, kaaja a sharmuutuma kela de'e kaaja a xasa daasattaati in kodan ka tika Yaahiwwe Waaqaayti kelopan in de'an ka ishi in kalshan.

¹⁹ Dalta kela dama malla, innaassina a piitati'i, kaaja taaki unta taaki wa pila daltan in leqeessan.

²⁰ Nama haptitta kodde'e, daltan leqeessa i'ettanissa; ma piitoose a lehatta karopa kallitto karaayye, Yaahiwwe Waaqaayti akka wa kodannitta pisa oppa ke sako'e, innaassin a piitati daltan in leqeessan.

²¹ Oto Yaahiwwe Waaqaayti xasa daasattooyye, Yaahiwwe Waaqaayti a kuttati'i ke qara fadaay, akka ke qara juppoota in oorrini irra qara daashe.

²² Ma xoori oton xasa a daasanniniiyyi juppoota ke in koddito.

²³ Wa heennaatti qara afaattin Yaahiwwe Waaqaayti in daasada kiite ka xasa daasatte qanqannissa dikkishe.

²⁴ Oton dula a dishma wayneeta a nama pila oppan tarpinittooyye, luukkataadi a heento mina kitto karittaaytippa dameeta i''ettanissa; ma takka nefo mehaddaatti kara in qapadan.

²⁵ Oton dula a nama pila oppan tarpinittooyyeew, maanqa yuuttanta ka riitatta i''ettanissa; ma unta la'ayyo in feradan ka ishinni in kaladan.