Mataafa oppa' Ooreta 22 - Mataafa Qulqulloota

¹ Xorma taaki kahirta a innaassina a piita oto mayyaaqto akka akkitooyye jawi in kidan; ma xoori qeede ka innaassina ishin kale.

² Oto punu innaassina a piita ke kapa in dehiniiyyi taaki oton horeeta a ayno akkima koddite a upniniiyyi ishin kale ka iskapa qape ka oto namaadi pora faano ishi daashe.

³ Oton harreetaadi taaki ohaataadi taaki wa a pila'e innaassina a piita kela pata akka teyte, piisa ishi oorshe; ka innaassina a piita qaarqaara in diishan.

⁴ Oton harreeta taaki xorma a innaassin a piita'e poroppa pi'e akka akkiteeyye, opeela xa'issa'e isha qaarqaare diisheey kapan in tarpan.

⁵ Iskatteeta mehadda diirta in kalsannin umma diirta mehadda a iskatta in kalsannin; Yaahiwwe Waaqaayshin orra asse koono ijippiniiy.

⁶ Oto poroppa annitto ka xampirteeta a saattaadippa hukukkaadi taaki a jiwjiwaadi qara qoyroppa taaki piitoppa kutiite akkitooyye, xampirteese isho jiwjiwaadi ollinni in qeedan.

⁷ Akka ke ettanto paraayti ka ke deraado'e, jiwjiwaadi teyyatta i'ettanissa ma aayyaasso tupa desa alle diishe.

⁸ Oto rookka haaraya qupannittooyye akka nama qaraayye in pi'inin akka ishin dapayta a nama ikassa isqara a qeennini'i, tula qara ishi oxinta kode.

⁹ Dulaayti a dishma wayneeta oppa'e, xotta ika lakki in aylaadan; oton i'aylitaayye xottoosen xaayti a dulaayti a dishma wayneeta oppa aylaatte isho luukkataayti a wayneeta piisa tika Waaqa opa daasammiiy.

¹⁰ Harreeta isho xorma olquda'en qaasan ka ishin qota in qotan.

¹¹ Ohaata a xaynaata qora talpa oppa shippamte isho a nyirfa kahaarra olloppa in dawan ka in uwwisadan.

¹² Ohaata a uwwisannitto qeppeelliyyaadi afur mina kayla kode.

Seera hemitta tooytaatta daasame

¹³ Diirta takka oto iskatteeta hemo ka olli muko ka kuli isheetta jippooyye,

¹⁴ ka maxxaadi pashsho ka isheetta jeersho ka xasasno ka kiino, “Enentase in heme ka olli muke umma milikkita a issin kinnaattaadi in dapeeyye”

¹⁵ Aappa a enentase xaaye isho aayyaasso a mooraappopa qimaya paleeta turopa milikkita a issin kinnaattaadi sookshen;

¹⁶ aappaaysho ka qimaya a paleetati kido, “Anti enentiyyon namooseti hemitta daashe, isha xoori i'isheetta jippe;

¹⁷ ka maxxaadi patinni ka qara haasawanni ka kiini, ‘Enentaayti qudae milikkita a issin kinnaataadi in dape.’ Ma enentiyyo akka issin kitto milikkitaadi are tooya!” Ka oori ohaatase a diika enentaayshoti oppa lahame qimaya paleeta tura afen.

¹⁸ Qimayasene a paleeta ka aappaase enentase heme qeeden ka shooraan juuben.

¹⁹ Ka qoota maxxa enenta Isira'eeli a issin kitto pashshe malla a dakara pirreeta dippan isha xortishen ka aappa opa enentaseti daashen; isheetta ka iskatteetaadi koddito; umma haka cooyye alle isheetta diissata in ettansho.

²⁰ Ma xoori oton wossenen dukaataayye, milikkita a enenta a issin kinnaattaadi ka in teyanniniiyyi,

²¹ enense a tika aappaayshoti kittooyyeewwen sharmuutitteeta ka Isira'eeli kara jeera qeetteey, xarra a tika aappaaysho oppopan aana; samayta paleeseti ka haka toonitto'e, dakaan isheetta dakko ka ishsho; ka seden Isira'eeli kara neequmta pashsha.

²² Diirta takka oton iskatteeta a nama pila olli muka ka qapamaayye, diirtose isheetta olli muke isho iskatteese alle leysha; ka seden neequmta Isira'eeli kara pashsha.

²³ Nama takka oto enenta a issin kitto a qapatamte a paleeta kara kitto irreetan olli mukaayye,

²⁴ namoose qoota enenta a nama pilaati qapatamte olli irreetan muke ka jeershe malla isheetta'ew ka paleeta kara akka orra isheetta awlo in ullupnin malla, ishootta lakki piisa moora paleeseti oppopa sooksha ka dakka ka leysha; ka seden neequmta Isira'eeli kara pashsha.

²⁵ Ma xoori namoose oton enenta a nama pilaati qapatamte pora oppa nama in kinnin oppa lakoppa irreetan sootadeeyye, a isha patta ishshamo.

²⁶ Ma enentoose qara we takka nefo in kodan; enenta ishin dapayta a isheetta qara toota qeedo in kooneey; ma koda a namoose kode, dapa a nama pila tura asatta ka ikassa mina paha.

²⁷ Maana malla namoose enentase qapatamte pora oppa nama in kinnin oppa irreetan sootadeey; kadi punu ullupnittaayye nama a isheetta awlo ka in kinniniy.

²⁸ Nama takka oton Enenta a issin kitto a in qapatammini akka ka irreetan sootada ka qapamaayye,

²⁹ namoose enentase irreetan sootade a aappa opa enentaseti'i, dakara pirreeta kunda ken daasho ka isheetta hemo; qoota isheetta irreetan sootade malla ikka iskatteetaadi koddito, umma haka co'e, isheetta diissata in ettansho.

³⁰ Nama takka nefo iskatteeta aappaayshoti olli in muknin ka in manynyeerummin ka aappaaysho in jeerinnin.