Mataafa oppa' Ooreta 20 - Mataafa Qulqulloota

Qoota oranna torpeetati desa

¹ Oto oranna tuullittooyye ka fartada ka sarakeelladda a oranna isho xela oranna a xaayti qara qapo akkitooyye, Yaahiwwe Waaqaayti isase piita Kipsi kara ke sookshe ke olli caay, in fuuran.

² Oto nyaapa torpa dehaattooyye, qeesitta a xela oranna turopa sooko ka xela haasawado

³ ka kido, “Isira'eleteeyye dakkaysada! Awwe nyaapaayyshin turopa idehaattineey, karittaayshin in tammaqnin ka in fuuran ka in xaran.

⁴ Maana malla Yaahiwwe Waaqaayshin isha ishin olli aana ka nyaapaashin torpa ka ishina putayma daashaay.”

⁵ Kamma desaaw a saarra xela orannaati kidene, “Nama tika haaraya qupade ka mashawwaata qara in kalinnin oton ishin oppa caayye akka orannaappa in toonini'i, nama pila ka tikaadi qara mashawwaata in kalsannini'i a tikaadipa alle tiitaawo.

⁶ Nama a wayneeta duloppa dishade ka luukkataadi in dammin oton i'ishin oppa caayye akka orannaappa in toonin, nama pila ka luukkataadi in dammini'i, a alle tiitaawo.

⁷ Nama a enenta damsade ka in heminin oton i'ishin oppa caayye, akka orannaappa in toonin, nama pila ka enenta a isha damsade in heminini'i a alle tikaadipa tiitaawo.”

⁸ Kamma desaaw a saarra xela orannaati haasawaden ka kideneewwe, “Nama a fuurro ka tammaqno oton i'ishin oppa caayye, akka onneeta a xela oranna a xaadi mina in xarinnini'i a ammaaw tikaadipa alle tiitaawo.”

⁹ Saarra oto xelase a orannaati haasawadan ka dikkishan kammaayye, a kitadda xelase a oranna qara ajajampaya shuumen.

¹⁰ Oto katama takkan torpa dehaattooyye akka nakaytan ke harka daasadane'e, paayyota ishootta kaassado.

¹¹ Oton ike owsaden ka ke harka daasadeneeyye, orra a katamoosen kara kalo piisa a koda kokkoka ke kela kodo.

¹² Ma xoori oto ke harka daasanni in kinniniiyi ka ke torpa heenaneeyye, katamoosen kapa mure.

¹³ Oto Yaahiwwe Waaqaayti ke turopa ishootta tuukkooyye, diira a katamoosen kara ca piisa koraatetan leyshe ka pire.

¹⁴ Iskatta ka hellaa ka horeeta isho wa ata hase a katamoosen kara ca piisa poojado; ka teyantase a saratte a Yaahiwwe Waaqaayti ke daashen xasoodo.

¹⁵ Ka katamadda a samayta Kene'aani kara kalo in koddinini, ka ke kapa akata seka piisa qara'e asseew kode.

¹⁶ Ma xoori katamaddoosen a samayseti isasene a Yaahiwwe Waaqaayti akka qapatto ke daanna qara'e, wa nessa qapa takkan nefo in hattishan.

¹⁷ Semmalla akka Yaahiwwe Waaqaayti ke ajaje qara'e, Hittaata ka Amoorata ka Kene'aaneta ka Fersaata ka Hiwwaata isho Iyyapuusata piisa pire.

¹⁸ Ataakati oto killannasene xaaysho waaqaysannaaneeyye, kodaddasene xaaysho jippame a koonaane'e ke kollishan, akka Yaahiwwe Waaqaayti qara juppoota kootaay.

¹⁹ Oto katama takkan qara pira torpinittooyye, katamaasene kapa mura'e ikka ke qara eta a kutta qeennaaneeyye, luukkataaysho'e qara damtaay, qoraadi erkahan alle in quuran; qoroosen orrase a kapa murteneey!

²⁰ Ma xoori haka katamoosen punnitto kara'e, qora a luukkataaysho damammi in kinnini a upta alle quureta ka mehadda orannaati kodatta i''ettanissa.