Mataafa oppa' Ooreta 2 - Mataafa Qulqulloota

Parrasene a samayta Isira'eeli koommayta kokeppa jare

¹ Akka Yaahiwwe ana lele mina'e anka alle tiitaawne ka qinda a pakateeta tiimatin desa koommaytoppopa anne; ka eta akutta kara'e, irroota Etoomi kapa tittiitaawne.

² Sekkammaayye Yaahiwwe ka ana kide,

³ “Piisse a kunkunnawwa kapa a kuttati tittiitaawteneey, amma oori qinda qutatta opa tiitaawa.

⁴ Samayta ajaje ka kide ‘Piitase kunkunnawwa qapto a Etoomi isase hellaasene xaayshin sanynyeeta Eesaawi kodde oppa kalan oppanne tarpitan ikka ishin tura fuuran; ma xoori a kuttati tooytaada.

⁵ Anti piitase a Etoomi kunkunnawwa qapto lehna'en Eesaawi daasheey, umma qudaayye a qittanta mina kitto nefo an ishina'en daashooy, ishootta qara oranna in xaashan.

⁶ Damta a damtan ka pisha a ikkitane kuli ishootta qara kaajaan piddada.’

⁷ Yaahiwwe Waaqaayshin koda harkaayshina pisa oppa'e ishina sake; ka koommayse asse kutta a oppan anten oppa ishin tooyte; paroose kunda afur piisa qoota Yaahiwwe Waaqaayshin ishin olli co malla, we takkan nefo a dapne.

⁸ Anka hellaasene xanno sanynyeetase a Eesaawi isasene piitase kunkunnawwa qapto a Etoomi kara kala kapan tarpine ka porase a Arapa Elaati isho Etsiyyoon- kapiriiyyi deeno alle diinne ka qinda koommayta Mo'api opa anne.

⁹ Yaahiwwe ka ana kide, ‘Anti piita Mo'api sanynyeeta Looti'in daashe; umma piitaaysho quda shakkayteeta nefo ishina an daashooy, ishoottan payyahashan ka oranna ishoottan xaxxaashan.’

¹⁰ (Xatta orra takka Emiimeta kidammo ka kokokkoka ka leka piita Mo'api kara kala; ka akka sanynyeeta Enaaqi mina dedderi.

¹¹ Ishootta akka a Enaaqeta mina'e Rafaaymeta kidammi; Mo'apeta xoori ‘Emiimeta’ kiini ka ishootta haleeni.

¹² Hoorata turan Etoomi kara kalta; akka Isira'eeleta piitase a Yaahiwwe isheetta daashe ikka lehatte kara koote mina'e, sanynyeeta Eesaawi ka alle kara ishootta daante ka lesse ka poraaysho oppa kutiite.)

¹³ Yaahiwwe ka ino kide, ‘Xa'a ka kirrase koke a Sereedi oppan tarpa!’ Anka xaane ka kirrase koke a Sereedi oppan tarpine.

¹⁴ Hakan Qaades- parne xaaneeyye paayyatte hakan kirrase koke a Sereedi tarpine kara'e, para kunda sessa sette ka pirame; akka Yaahiwwe turan qootaayshoti desa xaxade qara'e, diira a oranna torpa kaye a xeltoseti piisa ka safara kara piramen.

¹⁵ Haka safara kara ishootta piisa pirro kara'e, hupna Yaahiwwe ka ishootta qara xa'e.

¹⁶ Ete samaytoppa a oranna torpina piisa piramen kammaayye,

¹⁷ Yaahiwwe ka ana kide,

¹⁸ ‘Awweseeyye xelase a Mo'aapi katama Eeri kapa co tarpitan.

¹⁹ Oto piitase a Amooneta a sanynyeeta Looti kapa kaytaneeyye, ishoottan payyahashan ka oranna ishoottan xaxxaashan; anti piitaaysho quda shakkayteeta nefo ishina an daashooy.’

²⁰ (Xatta turanne qoota Rafaaymeta piisse oppa kallaatte malla piisse piitaaysho mina'e dikammi; Amoonata xoori ‘Samsuumeta’ kiini ka ishootta haleeni.

²¹ Ishootta nefo a Enaaqeta mina'e dedderi ka kokokkoki ka leki. Yaahiwwe ka Amoonata turaayye ishootta pire; Amoonata ka piitaaysho teyyatte ka oppa kutiite.

²² Xatta turan Yaahiwwe sanynyeese a Eesaawi piitase kunkunnawwa qapto a Etoometa kara kalto'e wa asse paha'ew kode; ka Hoorata a turan oppa kalto alle pire ka Etoometase haka awweti oppa kalto akka oppa kutiito kode.

²³ Eewwatase pakateetase kutta a Mediteraaniya kapa haka katama Kaasaati palewwa kara kaltoow, Qerteesetase piita Keftooriti deete ishootta pirteew ka piitaaysho oppa kutiite.)

²⁴ Eten piita Mo'aapi oppan tarpineyye Waaqa ka ino kide, ‘Amma oori xa'a! Ka anta paayya ka kirra Arnooni tuulla; tin anti Siihooni nuqusase a Amoorata a katama Hasepooni mukinno isho piitaadi harkaayshin oppa'en daasheey, isha torpa ka piitaadi teyyada.

²⁵ Awwe desan paayya ka qootaayshina desa orra a piita qara kalo piisa qara'e, tammaqta isho fuura tuqa; ikka qootaayshinaayye desa dakayan ka fuuraan xaran.’

Akka nuqusase Siihoni putame

²⁶ Sekammaayye anka koommayse a Qidemootiti desa akka Siihooni nuqusase katama Hasepooni mukinno'e nessa nakayta kaytishane orra erke ka kide,

²⁷ ‘Ino piitaayti oppan tarpino; pora kutta an qapanne pattoppannewwen anna. Umma akkitta ka pittittopa an kiino.

²⁸ Damta an dammo isho pisha an ikkina, kaajannonnen piddanna; ma ino loqqa pattan piitaayti oppan tarpino.

²⁹ Sanynyeeta Eesaawi a Etoomi kara kalto isho sanynyeeta Mo'api a Eeri kara kalto akka piitaaysho oppan ino tarpishen mina'e akkan Yurtaanoosi tuullino ka piitase a Yaahiwwe Waaqinno ino daanno oppopa kallo'e, atti kuli ino tarpisheew.’

³⁰ Ma xoori akka awwe koddite mina'e, qoota Yaahiwwe Waaqinno harkinno oppopa isha tuukko'e karittaadi ka dikattaadi kokkonnayshe malla, Siihoni nuqusa Hesepooni piitaadippan ino tarpissa in faane.

³¹ “Yaahiwwe ka ino kideewwe, ‘Siihoni isho piitaadi harkaayshin oppopa tuukka'e anti in xa'ey isha puta ka piitaadi teyyatta xa'a.’

³² Siihoni ka xelaadi a oranna piisa qapade ka ino torpa'e, Yahaasi karopa tuule.

³³ Yaahiwwe Waaqinno ka harkinno oppopa isha tuukke; ino ka isha ka hellaadi a diira isho xelaadi a oranna piisa pirre.

³⁴ Ka katamaddaadi piisa qara pirre ka patinne; ka diira ka iskatta a karaa kalo isho nyooqawwaasso piisa pirre. Umma takka nefo an hattinne.

³⁵ Waan issi teyyane, horeeta isho waan katama kara poojne patta.

³⁶ Katamasene a A'eeri naaba Arnooniti tula qara ca ka katamasene naaba kara caati paayyatte haka xeela Kele'aaditi'i, katama takkan nefo ino tura qa'atta in ettaninne; Yaahiwwe Waaqinno ka piisa harkinnoppa daashe.

³⁷ Ma xoori piita Amoonata ka xeela a kirra Yaapoqi ka katamadda a piitase kunkunnawwa qapto isho piitase Yaahiwwe Waaqinno akkan kapa an kaynini ino dawre takka nefo kapa an kayne.