Mataafa oppa' Ooreta 19 - Mataafa Qulqulloota

Katamadda a nama tarshan nama ishsho karopa qahana

¹ Muuse ka samayta Isira'eeliti kide, “Yaahiwwe Waaqaayti oto samayta a piitaaysho ke daanno alle pashshooyye, atti ka ishootta sookisso ka katamaddaasso oppa kutiitooyye,

^2-3 piitase a Yaahiwwe Waaqaayti akka qapatto ke daanno, pora sessa qoote ka karaayye katamadda sessa xawwi reexe; ka karopa porra kode; nama a tarshan nama ishsho piisa ka karopa qaho.

⁴ Qoota nama a turan nama qara miira in qapnin mali, tarshan nama ishsho ka issin paha eeyye karopa qahanoti desa wa koota sene:

⁵ Nama takka oto xelittaadi ollin qoyra mura muroppopa annaaneeyye, ikka erkahan qoyra murrooyye, sipla ka shukkayta kara shoro ka xelittase xaadi daysho ikka to'oyye, a katamaddoosen oppa takkan karopa qaho ka issin paho.

⁶ A taakati a haalota pooyyino a kuttati miirooda ka namoose nama ishshe kamma daana ka oton pora sekaayye isha qaqqaapa ka namase a turan miira in qapnin mali innaasso quda kale, toota ka isha parpaaccisni in kinnin ishshaay.

⁷ Semmallaawwen akka katamadda sessa xawwi reexto ke ajajni.

⁸ Yaahiwwe Waaqaayti akka aappadaassina a xatta xaxa kale qara'e, oto xeelaayti paldishooyye ka piitase a aappadaassina kippeeta daashe piisa ke daashooyye,

⁹ Yaahiwwe Waaqaayti jaalattaanne ka saantaadippan antaanne, oton ajajaddoosen an awwe ke daanna piisa tooytattaayye, katamaddoosen sessa quda'e a pila sessa padaawe.

¹⁰ Wa malla asse koota nefo, akka lehatto'e piita a Yaahiwwe Waaqaayti ke daanno karaayye, nama a dapa in qapnin akka patta in toonin, dapa nama ikassa ka ke qara in kinnaannin malla.

¹¹ Ma xoori nama takka oto innaasso a Isira'eeli qara needdumaan xa'oyye ka tura asado ka ishshooyye ka katamoosen oppa takkan karopa qahooyye,

¹² qimoota a katamoosen a ishshampayta oppa kalooti a isha kamma orra erkito ikka eeyye kara isha qeeden ka nama a haalota pooyyino isha daashen ikka kapa isha ishsho.

¹³ Umma isha in suraysadan; akka ke ettanto'e ishin dapayta a nama dapa in koonin ishsheeta, Isira'eeli kara pashshe.”

Xeela tuukeeta akka parpaaccisni in kinnin

¹⁴ Piitase a Yaahiwwe Waaqaayti akka qapatto ke daanno karaayye, piita a lehatto oppaayye, daka a xeela a orra xatta eyye dishe innaassina a piitaayshina tura in tuukkan.

Qoota maakkittati desa

¹⁵ Oton nama takka a pila qara'e dapa kodaayye, haasoosen olkela oorissa'e maakitta lakki taaki sessa parpaaccisni diisheey, takka patta in kayo.

¹⁶ Ukkuttoota nama kati dartan nama pila xasasaayye,

¹⁷ ishootta lakki a deexa qara ollin ca, a qeesewwa isho taanynyada sitiiyyi koda qara ca kapopa a fuula Yaahiwwe turopa dehaaden.

¹⁸ Taanynyada ka deexose kara qanqannisso qoren ka oton xasasampaytan dartampayta ka dartan innaasso a piitaayshoti xasaseeyye,

¹⁹ wa a innaasso a piitaayshoti qara dikade, isha qara koda; ka seden neequmta iskara pashshe.

²⁰ Orra ata hase ka sede dakaya ka fuura; umma wa neeqa a asse paha lammatta artaassin kara in kodan.

²¹ A napseeta ishshe kapa napseeta ishshe; ka a ilta joolshe kapa ilta joolshe; ka a ilkitta kate kapa ilkitta kate; ka a harka mure kapa harka mure; ka a loqta nama tupa qepshshe kapa loqta qepshe diisheey in suraysadan.