Mataafa oppa' Ooreta 18 - Mataafa Qulqulloota

Kalisootoppaayye qerayta a qeesewwa isho Lawaata daasammo

¹ Qeesewwa ka Lawaata se kideese kafa Lewi piisa Isira'eeleta olliiyyi qoottota taaki lehanda in qapan; ishootta kalisoota a Yaahiwwe dehannitto qudaayye daman; sede qoottotaaysho'ey.

² Ishootta hellaasso a piitaayshoti oppaayye lehanda in qapnaadan; Yaahiwwe akka ishootta kippeeta daashe qara'e, ishan lehandaasso.

³ Samayta a kalisoota kalinno, oton punu lo'alla taaki kahirra oppaayye kalisoota kalinniiyyi, qerayta a qeesewwa daasho: pilaashitta ka poqowwa lakki isho hoppatta.

⁴ Qarpattaayti a unta ka a taadeta wayneeta ka a sayteeta isho nyirfa a paayyota kahirra quda mujte, ishootta daashe.

⁵ Maana malla isha isho hellaadi akka maxxa a Yaahiwwen qa'adan ka haka paraparati ishi koda kodane'e, Yaahiwwe Waaqaayti kaffa a Isira'eeli pisa oppa ishootta reexadeey.

⁶ Katamaddaatti a Isira'eeli kara ca oppaayye, Lewitta takka oto xajeelta heennaaditin porase a Yaahiwwe reexade opa de'oyye,

⁷ akka hellaasso a Lewaata eyyeeyye qa'annaan ka fuula Yaahiwwe tura koda koonaan mina'e, a maxxa Yaahiwwe Waaqaaditin koda kodo.

⁸ Isha kadi punu teyanta toolaayshoti a katammitto quda kaaja qoottanna nefooyye, qeesewwa a pila olliiyyi qoottota qitteeta akkadaaw.

Kodadda a orra Waaqa amanni in kinnini kapa sekaatta

⁹ Oto piitase a Yaahiwwe Waaqaayti ke daanno karopa kaltooyye, waasene jippame a samayta eeyye kara kalo koona kodeeta in kolladan.

¹⁰ Nama innaadi taaki enentaadi kalisoota apittoppa kupno taaki so'ayta taaki tipampayta taaki marqina tooyampayta taaki haddampayta ishin oppaayye in caannin.

¹¹ Taaki kodkodampayta taaki a hapurra haasawsiisno taaki a kaarayya haleeno ishin oppaayye in caannin.

¹² Nama a sene koono, fuula Yaahiwwe turaayye a jippameey. Yaahiwwe Waaqaayti kodkoddoosen jippame malla samaytose alle ke turaayye sookinni.

¹³ Atti xoori fuula a Yaahiwwe Waaqaayti turaayye a qaja in qapnin kodde.

Xuumampayta a Muuse paho xa'a

¹⁴ Muusekka ishootta kide, “Samaytose a piitaaysho qapattan, so'aya isho tipampaya pora dakkaysanni; Yaahiwwe Waaqaayshin xoori akka asse a koonini'i i'ishin dawre.

¹⁵ Yaahiwwe Waaqaayshin xuumampayta ana paho hellaassin a piitaayshina oppaayye ishina xaashaay, isha dakkaysada.

¹⁶ Kuyyaatase a oppaayye xora kodameeyye irroota Siina kapaayye wa sene a Yaahiwwe Waaqaayshin qinsatten ka kiitene, ‘Akkan an leenini'i ino lammatta nessa a Yaahiwwe Waaqinno an dakaynin ka apittase kutta orra fuurinno an akkinini'i’ sedewweey.

¹⁷ Yaahiwwe ka ana kide, ‘Wa haasawadene ipaxaari.

¹⁸ Hellaasso a piitaayshoti oppaayyen xuumampayta a ke paho ishootta' xaasha; ka qaaletiyyo afaadi oppa xaaya; isha ka wa an anti isha ajajna piisa ishootta lela.

¹⁹ Ma a qaalese a isha maxxiyyon haasawanno dakayni in kinnin, ana isha qatta'a.

²⁰ Ma xoori xuumampayta a qaaleta an anti ishan ajajnini maxxiyyon haasawanno, taaki maxxada a waaqadda pilaatin haasawanno piisa alle ishsha.’

²¹ Ishina nefo oto karitta karanxata dikannittan ka kiinittane, ‘Qaaleta a Yaahiwwe in haasawannin attan upnaatta ettaninnaayye,’

²² oto xuumampayta takka maxxa Yaahiwwen haasawadooyye ikka in dikkannin taaki dukaata in koddininiiyyi, iskareela qeedeey tura in fuuran.”