Mataafa oppa' Ooreta 17 - Mataafa Qulqulloota

¹ Lo'alla taaki kaharraappa wa toobuma taaki qaja qapa, Yaahiwwe Waaqaayshina'e, kalisoota in dehayshan; sene isha tura wa jippame'ey.

² Katamadda a Yaahiwwe ishina daashe oppaayye, oton takkan karaayye diirta taaki iskatteeta kodayteeta a Yaahiwwe alle pootaneeyye ka fuula Yaahiwwe a Waaqaayshin tura wa neeqa koonaane ishin qapamaneeyye,

³ ka waaqaddasene a pila an dawre taaki piirtota ka leya isho hiikka sakatada ka ishootta waaqaysadaneeyye,

⁴ ikka ishina lelamta akka dakaytaneeyye, qanqannissa kamma qora; oton dukaataayye wa asse neeqa ka keeto Isira'eeli kara koddeneyye,

⁵ diirta taaki iskatteeta wa asse neeqa koote, katamaassin kara alle sooksha ka diirtase taaki iskatteetase dakaan dakka ikka tooto.

⁶ Namoose ikannaan oton maakkitta lakki taaki sessa isha qara maakkumaayye, alle ishsha diisheey maakkitta takka pattan nama in ishshan.

⁷ Oto ikannaaneeyye, harka maakkiyya'e paayyota isha xaptitta paayya; kamma samayta ka isha dakka ka seden neequmta alle issi oppa pashsha.

Akka deexa kokkoka murraan

⁸ Oton nama takka tarshan nama ishshe a pila ka a upooyye nama ishsheew, taaki takka hikkeetan tamaakkanni a pila ka deexa kokkoka deexanniiyyiiw, taaki nama a nama matayshe a pila ka meeha nyapalsheeyyeew deexa asse paho ka ishin oppa xa'a ka firteeta farata faaniiyyi ka ishin qaropa caayye, xa'a ka pora a Yaahiwwe Waaqaayshin reexade opa aana.

⁹ Ka Lawaata a qeesewwa koddite isho nama sitiiyyi taanynya kodde kaassada; ishootta ka deexose faraten.

¹⁰ Ka porase a Yaahiwwe reexade oppaayye wa ishina lelamma koda ka saanta a ishina akkinnaan qara we piisa qanqannissa koda.

¹¹ Ka seera a ishin kollinnaan isho tampeeta a ishina daannaan qara'e, we piisa koda; umma qaraayye akkitta ka pittitopa in kidan.

¹² Nama takka kadi isi jeejjadaayye ka qeesittase fuula a Yaahiwwe Waaqaayshin tura qa'anno ka ishi koda koono isho taanynyaseneti dakaya tiitaayye, alle ishsha; ka seden Isira'eeli karaayye neequmta pashsha.

¹³ Samayta piisa oto sede dakayooyye fuura ka wa asse paha kapa lammatta sekaada.

Dehaama qoota nuqusa shuumattaati desa daasame

¹⁴ Oto piitase a Yaahiwwe Waaqaayshin ishina daasho oppopa kaltooyye ka qapattooyye ka kara kallaatta paayyitooyye ka kiito, “Ino nefo akka samayta ino kapandesa co mina'en isi qara nuqusa shuumanna!”

¹⁵ Hellaa a piitaayshina oppaayye nama a Yaahiwwe Waaqaayshin reexado, nuqusa isqara shuumada diisheey, haptitta a Isira'eelitta in koddinin isqara in shuumadan.

¹⁶ Ma xoori nuqusoose fartada koopsatta isha parpaaccisni in kitto umma fartada koopsatta malla piita Kipsi opa orra erkatta isha parpaaccisni in kitto; maana malla Yaahiwwe akka piita Kipsi opa a tiitaawnini'i, i'ishina leleey.

¹⁷ Umma nuqusoose akka saanta Yaahiwwe qara isha in maqqinnini'i, iskatta lekayta hemeeta isha parpaaccisni in kitto; umma issi'i dakara pirreeta isho warqeeta koopsatta isha parpaaccisni in kitto.

¹⁸ Nuqusa oto sufaana qara kutiinooyye, a mataafoose a seera harka qeesewwa a Lewaata oppa tooytammo teyyado; ka issi'i mataafaadi karopa taafado.

¹⁹ Qaaleta a seeroseti ka a taantetoseti piisa tooytattaanne ka kodeetanne akka Yaahiwwe Waaqaayti tura fuureta kollado'e, mataafose a isha kapa tawo; ikka haka co'e, kuyyaata mina nappapado.

²⁰ Samayta Isira'eeli qara'e, isha isho sanynyeetaadi akka alka qara a kuttati nuqusumane'e, isha ajajose qaraayye qinda a kitta ka a pittitta opa in kiinin; umma isi in jeejjinin ka hellaa a piitaayshoti qaropeela isi in qapnin.