Mataafa oppa' Ooreta 16 - Mataafa Qulqulloota

Xaysonessuma a qaran tarpeeta

¹ Yaahiwwe Waaqaayti leya apiipi oppaayye piita Kipsi kara halkeette ke sooksheey, leya apiipi dikado; ka xaysonessumoosen a qaran tarpeeta a Yaahiwwe Waaqaayti ulfeesse.

² Ka akka maxxaadi oppa halaamo'e, pora Yaahiwwe reexade oppa'e xellootaayti a lo'alla taaki a kahirra taaki a telella oppaayye Yaahiwwe Waaqaayti kalisoota a xaysoneessuma a qaran tarpeeta qale.

³ Umma so'a a kalisooseti laaqqota a pukeessamten in daman; atti piita Kipsi kara qoota jarjartan qahate ka piisse kara sookte malla, akka haka kitto'e matte qapnaatto'e, kuyyaata tappa kara'e laaqqota rakkoota damta.

⁴ Kuyyaata tappa kara'e piitaayti piisa oppaayye haddaya takkan nefo in kinnaannin umma so'a kuyyaata paayyotati kalaakala qalta parripa in muknin.

⁵ Katama a Yaahiwwe Waaqaayti ke daasha takkan nefo kara'e, kalisoota a qaran tarpeeta qaleeta ke parpaaccisni in kitto.

⁶ Ma akka maxxaadi kara halaamo'e, pora a Yaahiwwe Waaqaayti reexado oppopa a letta dummittooyye eta a oppa piita Kipsi kara sookte pahaatiiyyi kalisootaayti a qaran tarpeeta qale.

⁷ Ka porase a Yaahiwwe Waaqaayti reexade oppa'e palayshe ka dame; ka oto pirtooyye tukkanaaytipa tiitaawe.

⁸ Kuyyaata lehi kara'e laaqqota a in pukeessammin dame; ka kuyyaata tappattati Yaahiwwe Waaqaayti waaqaysatta'e, xora hale ka oppa koda takka nefo in kodan.

Xaysonessuma a fera

⁹ Eta a oppaayye unta fera paayyannittooyye paayye ka itturandesa torpa tappa dike.

¹⁰ Ka a Yaahiwwe Waaqaayti ke sake kapa'e, kalisootaayti a karitta kareela heennaan daanitto kalissaanne Yaahiwwe Waaqaayti xaysonessuma a fera ulfeesse.

¹¹ Ka ke isho hellaatti a diira ka a tuparra ka orxayaatti a diira ka a tuparra ka Lawaata a katamaati oppa kalto ka kalayta ka hellaa a aappa in qapnini isho hiyyeettewwa a ishin oppa kala ollin akka maxxaadi kara halaamo'e, porase a Yaahiwwe Waaqaayshin reexade oppa'e fuula a Yaahiwwe Waaqaayshinati tura'e xasooda.

¹² Ka akka atti kuli xatta piita Kipsi kara karpishsha koddite matte oorsado ka taantewwosen qanqannisso tooytaado.

Xaysonessuma a shaakka

¹³ Oto untaayti kalsatto ka wayneetaayti diipatto kammaayye, xaysonessuma a shaakka kuyyaata tappa ulfeesse.

¹⁴ Ke isho hellaatti a diira ka a tuparra ka orxayaatti a diira ka a tuparra ka Lawaata ka kalayta ka hellaa a aappa in qapnini isho hiyyeettewwa a katamaati oppa kala ollin xaysonessumoosen oppa xasooda.

¹⁵ Ka porase a Yaahiwwe reexade oppa'e kuyyaata tappa kara'e Yaahiwwe Waaqa'e, xaysonessuma ulfeesse; maana malla Yaahiwwe Waaqaayti unta a ferannitto isho wa a kodannitta pisa oppa'e ke sakaay akka a kuttati xasootta.

¹⁶ Xaysonessuma a qaran tarpeeta ka a fera isho a shaakka oppaayye, diira piisa porase a isha reexade oppopa fuula a Yaahiwwe Waaqaayti turopa paroppa sessaanne dehaattan ka oto fuula a Yaahiwwe turopa dehaannittooyye harka luleetin in dehaadan.

¹⁷ Nama piisa ka akka Yaahiwwe Waaqaadi isha sake mina'e, wa ettaninna daasho.

Atta akka dukaata farata parpaaccisnitto

¹⁸ Katamadda a Yaahiwwe Waaqaayti ke daanna piisa kara'e, kaffa piisa'e taanynyada isho saarra shuume; ishootta ka samayta dukaata faraten.

¹⁹ Firteeta qindan desa in quu'an umma qatayma in kodan; nooddota ookka qara'e ilda patinniiy, ka afa hanqeellaya alle quu'iniiy, nooddota nefo in teyyadan.

²⁰ Akka caatto'e ka piitase a Yaahiwwe Waaqaayti ke daanno qapatto'e firteeta dukaata patta kammaaw aane.

Waaqadda pila waaqaysatta akka dawramte

²¹ Porase a kalisoota a Yaahiwwe Waaqaayti koonitto kapa'e, killoota asheerati olaahitta in qa'an.

²² Umma daka killana a Yaahiwwe Waaqaayti needdo, in qa'adan.