Mataafa oppa' Ooreta 14 - Mataafa Qulqulloota

Kollima pooyta a dawrame

¹ Ishina a hellaa Yaahiwwe a Waaqaayshina! Semmalla oto nama to'oyye issin hajan. Umma nyirfaassin a matta a fuula tura ca in kooshadan.

² Maana malla ishina a samayta Yaahiwwe a Waaqaayshinati xawwi reexxameey; Yaahiwwe ka akka qoottotaadi a kokkoka kodditane'e samayta a piita qara co pisa oppaayye ishin reexadeey.

Horeeta isho pinaana a damamma ka a damammi in kinnini

³ Wa nyale takkan nefo in daman.

⁴ Horeeta isho pinaana a damtane sene: okkaya ka kahirra ka tela

⁵ ka katamta ka kuumanta ka amparaayleta ka taaltaalta ka laallitta ka kappurashsha isho illikayta damtan.

⁶ Pinaana a kamajaasso lakki paqene ikka alallaane piisa dama.

⁷ Ma xoori pinaanasene alalta alalla taaki a kamajaasso lakki paqqene oppaayye, kaala ka kupalaata isho muutteta in daman; pinaanosen kadi punu alallaaneeyye, qoota kamajaasso lakki in paqnin malla a nyale a ishina kodden.

⁸ Umma so'a tuuyyata nefo in daman; kadi punu kamajaadi lakki paqeneeyye, qoota alalli in kinnin malla wa nyale'ey, pukkaadi nefo quda in qappadan.

⁹ Pinaana pisha kara kala pisa oppaayye, wa xoolla ka qoffolla qapa dama.

¹⁰ Ma xoori wa xoolla ka qoffolla in qapnini, ishina wa nyale'ey in daman.

¹¹ Xampira a in nyallini piisa dama.

¹² Ma xampiroosen are ca a damtan; ishootta nefo: kawwaarayta ka ollikama isho dikilo,

¹³ seyya ka allaatteta isho ikaaysho piisa,

¹⁴ ka qurrupayta isho ikaaysho piisa,

¹⁵ ka kucceeta ka purqulla ka fankala isho harpoora ka ikaadi piisa,

¹⁶ ka kulila ka punsukkayta ka lukkala aypo

¹⁷ ka shukkaleeta ka kuyso isho utuluqayta,

¹⁸ ka ayaapta a murkuja damayta ka qayaata isho shipinshipirraata.

¹⁹ Pannaattewwa xoolla qapa piisa ishina wa nyale'ey, in daman.

²⁰ Ma xoori wa a nyala in qapnini ka xoolla qapa dameeta i'ettanissan.

²¹ Ishina Yaahiwwe Waaqaayshina'e a samayta qulqullaaweey, horeeta isho pinaana a issin to'e in daman; ma kalayta a katamaassin oppa kalo diisha ikka damo taaki haptitta kateetta i'ettanissan; umma so'a a nyalqa a telalla, aanna aayyaassoti oppa in xarshan.

Seera a harka kudanippa takka daassata

²² Para para mina'e unta dulaaytippa ke palinitto qaraayye, harka kudan oppa takka sookshe.

²³ Akka Yaahiwwe Waaqaayti fuura kollatto'e, untaayti ka taadeta wayneetaayti ka sayteetaayti qaraayye harka kudan oppa takka qeede; ka xellootaayti a lo'alla ka a kahirra isho a telella oppaayye, a paayyota dalatte qeede ka akka maxxaadi oppa halaamo'e porase a Yaahiwwe Waaqaayti reexade oppa'e fuulaadi tura dame.

²⁴ Ma xoori oto Yaahiwwe Waaqaayti ke sakooyye akka maxxaadi oppa halaamo'e, porase a Yaahiwwe reexade, oto ke kapa sekaadooyye, akka qoota poroose ke tura sekaade malla kalisootaayti a harka kudan oppa takka eeyyen kaya malaaltooyye,

²⁵ kalisoose kaajapa purshe ka porase a Yaahiwwe Waaqaayti reexade opan aane.

²⁶ Ka kaajasenetinni wa heenta, oton punu so'a lo'alla taaki a kahirra isho a telalla taaki taadeta wayneeta taaki ikkayta a kokkoka taaki wa a karittaayti jaalannaatin piddado; ka ke isho toolaayti fuula Yaahiwwe Waaqaayti tura dama ka xasooda.

²⁷ Ka Lawaata a katamaassin kara kalto qoottota taaki lehanda in qaptooy, alle ishootta in katan.

²⁸ Para sessattati piraampira qara eta piisaayye wa dullaassin oppa palaysannittane oppa harka kudani oppa takka qeeda ka katamaddaassin karopa ollopa tuula.

²⁹ Lawaatase ishin oppa qoottota ka lehanda in qapnin ka kalayta ka hellaa aappa in qapnini isho hiyyeetewwa a ishin oppa kala ka de'en ka damen ka duduttanen; oton sede kootaayye Yaahiwwe Waaqaayti wa kodannitta pisa oppa'e ke saka.