Mataafa oppa' Ooreta 13 - Mataafa Qulqulloota

¹ Oto xuumampayta taaki olsampayta ishin oppeela xa'o ka milikkita taaki daxxootan ishin tura akkisha kiinooyye,

² ka milikkita taaki daxxoowwasene a ishina lella ka koddinaaneeyye, ikka ishina kiino, “Waaqadda pila kamma annaayye taaki waaqaysannaayye,”

³ Yaahiwwe Waaqaayshin akka karittaayshin piisan ka isi piisan isha jaalannittan taaki jaalanni a kinnin upnaatta'e ishin ekkaysadaay, wa xuumampaytose taaki olsampaytose ishina lella in dakkaysadan.

⁴ Yaahiwwe Waaqaayshin kamma aana ka isha turaayye fuura ka ajajaddadi tooytaada ka nessaadi owsada ka isha patta waaqaysada ka isha quda koka.

⁵ Xuumampaytose taaki olsampayse akka Yaahiwwe Waaqaayshin isase piita Kipsi kara ishin sookshe ka karpishshuma kela ishin furade qara tiyya xaatane ishin kollishe ka akka saantase a saantase a ishin kallaattane a Yaahiwwe Waaqaayshin ishin kollishe qara ishin maqqisheey, alle ishsha; ka seden nyala issippaayye pashsha.

^6-7 Oton innaassin a ollin dalattene taaki innaatti taaki enentaayti taaki iskatteetaayti a jaalannitto taaki moottaayti a akata jaalannitto dekandekatti ke nyarinni ka kiini, “Anna ka waaqadda a pila waaqaysannaayye,” ka pora oppa piita oorto piisaayye waaqadda orra a ke kapandesa kalooti taaki a ke kapa sekati a aappadaassin isho a atti a upninin waaqaysannaayye ka seden dapoppopa ke kallinniiyyi,

⁸ isha an owsadan umma isha an dakkaysadan umma ishan suraysadan ka ishan in pahan ka wa kode in juutan.

⁹ Alle isha ishshe diisheey, in diishan ka isha ikassa'e, atti dakaan isha xaptitta paayye; kammadesa samayta piisa ka isha dakko.

¹⁰ Qoota Yaahiwwe Waaqaayti isase piitase a karpishshuma a Kipsi kara ke sookshe kapa ke purissa fade malla, haka toono'e dakaan isha dakke ka ishshe.

¹¹ Samayta Isira'eeli piisa oto sede dakayooyye ifuura; umma neequmta asse pahato lammatta issi oppa in kodo.

^12-13 Akka kara kallaatto'e katamadda a Yaahiwwe Waaqaayti ke daasho oppaayye, oton takka karaayye ukkuttowwa ishin oppaayye xa'an ka samayta a katamooseneti qindandesa maqshan ka ishootta kidane waaqadda a ishina a upnini a pila “Anna ka waaqaysannaayye,”

¹⁴ akka wa asse paha dakaytaayye wossen kamma fade ka qorado ka qanqannissa kaassado; oton seden dukaataayye, wossen jippame ka keeto otantaayshin oppa koddeneeyye,

¹⁵ samayta katamooseneti piisa koraatetan leyshe! Ka orra a kara kalo isho horeetaaysho piisa pire!

¹⁶ Ka poojeta katamoosen kara deeto piisa katamoosen kara'ew lakoppa ollopa tuule ka katamoosen isho poojese kara deete piisa apittan kupe! Ka kalisoota a kupannitto kode ka Yaahiwwe Waaqaayti dehayshe; ikka haka paraparati qitqitto umma lammatta in qupammin.

¹⁷ Yaahiwwe akka aappadaassina a xattaati xaxa kale qara'e, akka miiraadi a kutta harfo'e ikka ke diissata kodo'e ka ke suraysado'e ka ke leksho'e, wa looma kodde harkaaytippa in caannin.

¹⁸ Sede nefo oto nessa a Yaahiwwe Waaqaayti ajajammittooyye ka ajajadda an anti awwe ke daanna piisa tooytannittooyye ka fuula a Yaahiwwe Waaqaayti tura wa paxaara koonittooyye asse koddita.