Mataafa oppa' Ooreta 12 - Mataafa Qulqulloota

Pora Waaqa waaqaysatta takkayta

¹ Yaahiwwe Waaqa aappadaassina a xatta piitoose akka lehattane ishina daashe kara haka kallaannittane'e, taantewwa isho tampeewwa a qanqannissa tooytaatta ishin parpaaccisnitta sene.

² Samaytase a piitaaysho kara alle istura sookinnittane porrasene a oppa killowwaasso a Waaqaysannaane irrowwa a kukutta ka kunkunnawwa qara isho qora kukutta kela ca piisa alle pashsha.

³ Ka poqaddaasso a kalisoota alle qitqishsha ka dakaddaasso a killowwa oppa faata; ka olaahiyya a killoota asheera alle apittan kupa ka pahanasene a killootaayshoti a xefadene oppa quura ka piitopa dakka; ka porroosen qaraayye alle maxxadaasso pashsha.

⁴ Ka saantaaysho qara Yaahiwwe Waaqaayshin in waaqumsadan.

⁵ Ma xoori Yaahiwwe Waaqaayshin akka oppa kallaado'e, maxxaadi ka kara ulfeessamo'e, pora a reexade kaffaassin pisa oppaayye fada ka eeyyepa aana.

⁶ Ka kalisowwaassin a kupanna isho kalisoowwaassin a pila ka daassawwaassin a harka kudan oppa takka kodde ka daassawwaassin ka daassawwaassin a xasa daasatta isho daassawwaassin a nama karitta kareela hennaadin daanna ka xellootaayshin a okkaya ka a kahirra isho a tela oppa a paayyota dalatte piisan eeyyepa xooya.

⁷ Ishin isho toollaassin ka eeyye'e fuula a Yaahiwwe Waaqaayshina tura damtan ka wa kodattene, Yaahiwwe Waaqaayshin ka oppa ishina sakeetin xasoottan.

⁸ Amma akkima nama wa ishi aaka koono mina'e, awwse asse a kootan.

⁹ Maana malla amma porase a lehattan a nessuma a Yaahiwwe Waaqaayshin ishina daanno oppa a kayneey.

¹⁰ Ma xoori oto Yurtaanoosi tuullitan ka piitase a Yaahiwwe Waaqaayshin akka lehattane ishina daanno oppa kallaatta paayyitaneeyye, akka nakaytan kallaattane'e, nyaapaayshina a ishin kapandesa co piisa kelaayye ishin nessisha.

¹¹ Sekkammaayyeew akka maxxaadi kara halaamo'e, pora a Yaahiwwe Waaqaayshin reexanno oppopa waan anti ishin ajajna piisa, kalisowwaassin a kupanna ka kalisowwaassin a pila ka daassawwaassin a harka kudan oppa takka ka daassawwaassin isho kalisowwaassina a Yaahiwwe xasa daasattene eeyyepan deetan.

¹² Ka eeyye'e ishin isho hellaassin a diira isho a tuparra ka orxayaassin a diira isho a tuparra ka Lawaatase ishin oppa qoottota taaki lehanda in qapnin a katamaddaassin kara kalto piisantiiyyi, akka fuula Waaqa tura xasoottan.

¹³ Ka akka kalisootaayti a kupannitto porra heente pisa oppa a dehannini'i isi tooytado.

¹⁴ Ma kaffaassin oppaayye pora takka a Yaahiwwe reexado patta oppa kalisootaayti a kupannitto kalshe ka eeyye waan ke ajajna piisa kode.

¹⁵ Akka Yaahiwwe Waaqaayti sakaadi ke daanno qara'e, katamaddaatti a heenta pisa oppa'e, so'a qalatta ka a heento mina kitto dameeta i'ettanissa; akka nama so'a kuumanta taaki a kappurashsha dama ettaninno mina'e, so'osen qalame nama a nyale ka a in nyallin piisa dameeta i'ettansha.

¹⁶ Ma diikaaysho a pisha mina'e piitopa tuqta diisheey a damto.

¹⁷ Ma xoori untaayti ka taadeta wayneetaayti ka sayteeta a ekerta qaraayye kalisoota harka kudan oppaayye takka taaki kalisoota xellootaayti a okkaya ka a kahirra ka a tela oppaayye a paayyota dalatte taaki kalisootaayti a xasa daasatte taaki a karitta kareela heennaattin dehannitto taaki daassataayti a pila, katamaatti kara dameeta ke parpaaccisni in kitto.

¹⁸ Ma xoori ke isho hellaatti a diira ka a tuparra ka orxayaatti a diira ka a tuparra ka Lawaata a katamaatti oppa kalto ollin, pora a Yaahiwwe Waaqaayti reexanno oppa'e, fuula a Yaahiwwe Waaqaayti tura damtan; ka wa kodattene piisan xasoottan.

¹⁹ Haka piisse kara kallaannitto kara'e akka Lawaata alle a kannini'i isi tooytado.

²⁰ Yaahiwwe Waaqaayti akka turan ke kippeeta daashe qara'e, oto piitaayti ke paldinnooyye so'a dameeta ka ke aakto akka kiinitto, “So'an damaayye,” akka heento qara so'a dameeta i''ettanissa.

²¹ Akka maxxaadi kara halaamo'e, oton porase a Yaahiwwe Waaqaayti akata ke kapa sekiiyyi, xellootaayti a okkaya ka a kahirra ka a tela a Yaahiwwe ke daashe oppaayye, akkan ke ajaje qara'e, qalatta ka tikaayti kara'e a heento mina kitto dameeta i''ettanissa.

²² Akka nama so'a kuumanta taaki a kappurashsha dama ettaninno mina'e, so'osen nama a nyale ka a in nyallin piisa dameeta i'ettansha.

²³ Ma xoori diika kideeta caattaay, akka diika a dammini isi tooytaado ka caatta so'a ollinni in daman.

²⁴ Diika a pisha mina piitopa tuqe diisheey in daman.

²⁵ Akka ke isho hellaatti a ke kammandesa caati ettanto'e, diika in daman; sede kodaanne fuula a Yaahiwwe tura'e wa paxaara kooniiy.

²⁶ Daassataayti a qulqullaawte isho xasa a Yaahiwwe daasatte piisa qeede ka porase a Yaahiwwe reexado opan aane.

²⁷ Kalisootaayti a kupannitto, so'a ka diika porase a kalisoota a Yaahiwwe Waaqaayti qara dehaayshe; diika a kalisowwa pila'ew, porase a kalisoota a Yaahiwwe Waaqaayti kapa tuqmado; so'adi xoori dameeta i'ettanissa.

²⁸ Akka haka paraparati ke ka hellaatti a ke kammandesa caati ettanto'e, ajajaddosen an awwe ke daanna qanqannisa dakkaysado ka koda qara nakayshe; sede fuula a Yaahiwwe Waaqaayti tura'e, wa paxaara ka a qajeele'e kooniiy.

Killanna waaqaysatta akka parpaaccisni in kinnin turanneew dawramte

²⁹ Yaahiwwe Waaqaayti oto samaytose a piitaaysho qapatta annitta ke tura alle pirooyye, akka piitaaysho qapatto ka oppa kallaannittooyye,

³⁰ ishootta ka ke tura pataneeyye, akka qoota killannaassoti desa a kaassannin ka a kiinini, “Ata samaytose atta killannaasso waaqaysade? Anti xaaysho mina'ewwen waaqaysatta heenaay!” Ka oppa a qapammini'i isi tooytaado.

³¹ Atti Yaahiwwe Waaqaayti a xaaysho qara in waaqumsadan; maana malla ishootta oto killannaasso waaqaysannaaneeyye, waasene a Yaahiwwe needdanna ka jippina piisa kooni ka laaddi killannaassoti'i, hellaasso a diira ka a tuparra kalisoota a kupannitto kooni ka apittan kupniiy.

³² Waan ke ajaje piisa qanqannissa koda qara nakayshe diisheey, qara an qajishan taaki qara in padaawan.