Mataafa oppa' Ooreta 11 - Mataafa Qulqulloota

Saka Waaqa ajajama kela deeno

¹ Semmalla Yaahiwwe Waaqaayti jaalado ka wa ke qara faana kode; ka awta piisa taantewwaadi ka tampewwaadi isho ajajaddaadi tooyte.

² Fuka a Yaahiwwe a Waaqaayshina kuttumaadi ka harkaadi a kokkoka ka hupnase xaadi kutta a akke ka upnaade ishin diisheey, akkima hellaassin in koddinin awwe matte oorsada.

³ Piita Kipsi karaayye milikkitaddaadi ka kodaddaadi a Feri'ooni nuqusa Kipsi isho piitaadi piisa qara kode,

⁴ ka wa xela oranna a Kipsi ka fartadaasso isho sarakeelladdaasso a oranna Qara kode ka ete ishin kamma daannaaneeyye, pakateeta a tiima karopa ishootta tawshe ka akka awwe dapaden mina'e akka Yaahiwwe ishootta piisa pire i'uptan.

⁵ Haka are kaynittan kara'e wa koommaytoppa ishina kode i'uptan.

⁶ Kafa Roopeli oppaayye wa hellaa Eliyaapi Dataani isho Aperooni qara kode, akkima piita kaamatte ka a Isira'eeleta eeyye tooynittooyye ishootta ka toolaaysho ka tukkannaasso ka orxayaasso isho horeetaaysho a qapane piisa loqte i'uptan.

⁷ Akka ildaassinan kodaddoosen kukutta a Yaahiwwe kode piisa akkiten.

Saka piitase kippeeta daasamte qapto

⁸ Semmalla akka piitase a oppopa tuullittan ka lehattan oppopa kalta ka qapatta'e hupna akkattane'e, ajajadda an awwe ishina daanna piisa tooytada.

⁹ Piittase a takma isho aanna oppa puren, a Yaahiwwe aappadaassina a xatta isho ishin sanynyeetaayshoti daassata xaxa kale oppa akka para leka kallaattan'e, ajajaddaadi tooytada.

¹⁰ Piitose a lehatta oppopa kallitto, piitase a Kipsi a kara sookte oto xotta aylannittooyye a eenna dishma mina hupnan kela pisha ikinnitto minan.

¹¹ Piisse a tuullitan ka lehatta karopa annittan xoori piita kunkunnawwa ka naabba qapto, roopa ka moonte xata oppa roopno ka faakinno.

¹² Isheetta piita a Yaahiwwe Waaqaayti qara tooyno ka para piisa ildaadin qara caanno.

¹³ Oton ajajaddaayyo an awwe ishina daanna'e tooytattaneeyye ka Yaahiwwe Waaqaayshin jaalannittan ka karittaayshin piisan ka isi piisan isha waaqaysattaneeyye,

¹⁴ akka unta ferattane'e ka dalta wayneeta isho a ekertaayti pohatto'e, isha etaadippa'e roopa para ka a hakayta piitaayti oppa roopsha.

¹⁵ Isha lakoppan desa horeetaayti aykitta deehsha; atti nefo ka damta ka duttanta.

¹⁶ Akka a sassapatammin ka qindopa a tiitaawnin ka Waaqadda pila a waaqaysannin ka a sakatannini'i, isi tooytaada.

¹⁷ A taakkiti Yaahiwwe miiranne ishin qara xa'a; ka akka roopa a akkaannini dulla ka unta in palannini moonta dufa, akka piisse paxaara a Yaahiwwe ishina daanno qaraayye irra qara pattan.

¹⁸ Semmalla qaalewwosen xayyo karittaayshin isho mattaayshin kara qapada; ka milikkita kodada ka harka mina sukada ka miintoppa hiddada.

¹⁹ Ka hellaassin kollisha; ka oto tikkaassin kara kutiitaneeyye taaki poroppa annittan taaki muknittaneeyye, taaki xaanittaneeyye, oppa o'oora ka torraada.

²⁰ Ka qora xarra tikaayti isho xarra kullaysuma a paleetaayti quda puusado.

²¹ Oton asse koonittaneeyye, piitase a Yaahiwwe akka ishootta daasho'e, aappadaassina xaxa kale oppaayye, parraassin isho a hellaassina akka moonta piita qareela kitto mina'e deraadan.

²² Ajajaddoosen akka kootane ishina daanna qanqannissa tooytada; ka Yaahiwwe Waaqaayshin jaalada ka saantadaadi pisa oppan aana ka isha quda koka.

²³ Oton sede kootaneeyye, Yaahiwwe samaytase piisa ishin tura alle sooksha; ishina ka piita samayta lekuma ka kokkonnuma ishin qaropa qapa qapattan.

²⁴ Piita a kamantaayshinan oppa yetatten piisa ka xaayshina koddita; xeela a piitaayshina nefo koommaytase qinda tupattatin cooyye xa'a ka qinda qutattatin irrowwa Lipaanoosi kaya; ka qinda piirtotatin kirra Efraatisiti xa'a ka qinda dumaatatin haka pakateetase kutta a Meditiraaniya kaya.

²⁵ Umma nama takka nefo ishin tura qa'atta in ettansho; Yaahiwwe Waaqaayshin akka turan ishina kippeeta daashe qara'e, piita a kamantaayshin oppa yetatto piisa akka ishin tura tammaqto ka fuurane koda.

²⁶ Tin, anti awwe akka oppa reexattane'en fuulaayshin tura'e saka ka jiija xaayni!

²⁷ Oton ajajadda a Yaahiwwe Waaqaayshina an awwe ishina daanna'e tooytattaneeyye, saka akkattan.

²⁸ Oton waaqadda pila a turanne a upnini kamma anta'e ajajadda a Yaahiwwe a Waaqaayshina a tooytanni a kinniniiyi ka saanta an awwe ishin ajajno qara qindopa maqqitaneeyye, jiija ishin qara kaya.

²⁹ Oto Yaahiwwe Waaqaayti piisse a qapatta karopa annitto karopa ken kalooyye, irroota Kerisaani qara saka salishe; ka irroota Eepaali qara jiija salishe.

³⁰ Irrowwosen nefo, Yurtaanoosiiyyi qinda dumaatatinni piitase a Keneaaneta a Raapa kara kalto oppaayye katama Kelkela minadesa qora Moore a kukutta kapaayye caan.

³¹ Ishina piitase a Yaahiwwe Waaqaayshin ishina daanno oppopa kalta'e ka qapatta'e kirra Yurtaanoosi tuulla'e harmisattan; oto qapattan ka kara kallaatta paayyitan kammaayye,

³² taantewwa isho tampeewwa an awwe ishina daannaatin kallaatta'e tooytada.