Mataafa oppa' Ooreta 10 - Mataafa Qulqulloota

Muuse akkima a lammattati seera qeede

¹ Sitiiyyi Yaahiwwe ka ana kide, “Dakadda a qaqqaaha lakki a paayyota paha xefe; ka qoyroppa saatineeta kode ka irroota qaropa ana kapopan fayyado;

² anti seerrasene dakaddasene qaqqaaha a paayyota qara ca'en qara poja; atti nefo ka saatinetase kara'e, ishootta xaaytaay.”

³ Anka jeela kolalta oppaayye saatineeta kode; ka dakaddasene lakki a paayyota paha xefe ka dakaddasene qaqqaaha a kodayteeta lakki harkoppa qapade ka irroota qaropan fayyade.

⁴ Yaahiwwe ka seerase kudan a turan poje a kuyyaatase a xooratiiyyi irroota qara apitta kara xata ishina haasawade, dakaddaasene qaqqaaha qara pojeew ka ana daashe.

⁵ Anka tiitaawe ka irrootase qara lekkade ka akka Yaahiwwe ana ajaje qara'e, dakaddasene qaqqaaha lakki saatinetase taapota kidammitto kara xaaye; ikka ammikki'i eeyye ca.

⁶ (Samayta Isira'eeli ka ella a pisha a sanynyeeta Ya'iqaani kapa xa'e ka pora Moseera kidammo opa aane; Arooni ka eeyye to'e ka eeyye kara hawlaame; innaadi Alasaari ka pakkaadi oppa qeesitta kodde.

⁷ Ikka eeyye xa'eneew ka pora Kudkoda kidammo opa aanen; ka piitase kirrada pisha qapto a Yotipaata opa aanen.

⁸ Sitiiyyi Yaahiwwe ka akkima awwe koonaan mina'e, kafa Lewwi akka saatinetase a kodayteeta Yaahiwwe taapota kidammitto haado ka ishi koda koda'e ka fuulaadi tura qa'ado ka maxxaadin samayta sakane'e, xawwi reexe.

⁹ Seminan nama kafa Lewwi kodde, hellaasso a Isira'eeli oppaayye qoottota taaki lehanda in qapo; akka Yaahiwwe Waaqaayshin ishootta kide mina'e, lehandaasso mattaadi Yaahiwwe.)

¹⁰ Anti ka a paayyota mina'ew irrootase qara'e kuyyaata kunda afur ka halkeetta kunda afur jare; Yaahiwwe ka sitiiyyi qinseetiyyo dakayeew ka ishin pira diishe.

¹¹ Ka oori ana kide, “Piitase akkan ishootta daasho aappadaassoti xaxa kale oppopa akka kalan ka qapadane'e, samayta tura qate ka ishoottan aane.”

Yaahiwwe tura fuure

^12-13 Amma samayta Isira'eelitiiyyi, Yaahiwwe Waaqaayti maana ke qara faani? Akka Yaahiwwe Waaqaayti tura fuurto ka saantaadi pisa oppan anto ka isha jaalatto ka karittaayti piisan ka isi piisan isha waaqaaysatto, ka akka ke ettanto'e akka ajajadda ka taantewwaadi an awwe ke daanna tooytito'enne?

¹⁴ Tin, moontada isho moonta moontada qaropeela kitto ka piita isho wa kara ca piisa a Yaahiwwe Waaqaayti'iw.

¹⁵ Ma xoori, Yaahiwwe qoota aappadaassina a xatta a kuttati jaalade malla, akka awwe koddite mina'e, samayta piita piisa qaran qapto'e ishina a sanynyeetaaysho kodde reexade.

¹⁶ Semmalla kamtoolluma a karittaayshina alle diisha ka xolmaassin an kokshan.

¹⁷ Yaahiwwe Waaqaayshin Waaqa Waaqadda ka Poqla poqalladda. Isha Waaqa a kutta ka hupnampayta ka orra fuurinni; umma qatayma kooni in co. Umma nooddota teyyanni in co.

¹⁸ Isha he'aya ka hiyyettewwa'e dukaata murri; isha kalayta jaalanni ka damta isho wa uwwisadane ishootta daani.

¹⁹ Semmalla jaalala a kalayta qaptane akkisha; ishina xatta piita Kipsi kara a kalaytawweey.

²⁰ Yaahiwwe Waaqaayti tura fuure ka isha waaqaysado ka isha quda koke ka maxxaadi pattan xaxado.

²¹ Isha jeejjaatti ka Waaqaaytiiy, a wossen kukutta ka orra fuurinna a ildaan akkite a ke kode ishaay.

²² Aappadaassin a xatta a Kipsi oppa lekkannaaneeyye kunda tappaaw; ma xoori amma Yaahiwwe Waaqaayshin akka hiikka moonta mine ishin lekshe.