Mataafa oppa' Ooreta 1 - Mataafa Qulqulloota

Ajaja akka samayta Isira'eeli irroota Siinaati anta xa'o daasame

¹ Kirra Yurtaanoositi qinda piirtotatiiyyi koommayta Arapa oppaayye Suufi mina desa a samayta Isira'eeli arta Faraani isho a Toofeti ka a Laapani ka a Haserooti isho a Disahaapi kara safareeyye, haasa a Muuse ishootta piisa haasawade sene.

² Pora irroota Seyritin, irroota Siinaati paayyatte haka Qaades- parneeti'i, kuyyaata kudanka takka qeenni.

³ Samayta Isira'eeli a Kipsi kara sookeeyye para kunda afrattatiiyyi leya kudanka takkatta oppa kuyyaata paayyotatiiyyi Muuse wa Yaahiwwe isha qudan samayta Isira'eeliti ajajan tarpishe piisa ishootta' lele.

⁴ Sede nefo a Muuse nuqusase a Amoorata Siihooni kidammo ka katama Hasepooni mukinno ka nuqusase a Paasaani Ooki kidammo ka katama Astaarooti isho a Eetiri piddino pute kammaayye asse koddite.

⁵ Muuse a kirra Yurtaanoositi qinda piirtotatiiyyi piita Mo'aapi oppa caaneyye seerase ishootta la'assa paayye ka kide,

⁶ “Yaahiwwe Waaqinno an irroota Siina kela kinnooyye i'ino kide, ‘Tin a kuttaati'i irrooseti jarteneey,

⁷ tukkannaassin piisa putada ka anta xa'a ka piitase a Amoorata irrowwa qapto ka piitase kapandesa kitto isase irrowwa isho lakka qapto a Arapa ka koommayta a Nekepi ka pakateeta a Mediteraaniya qudan xata piita Kene'aaneta isho a Lipaanoosi oppan tarpa ka haka kirrase kutta a Efraatisiti aana.

⁸ Tin, piisse ishina'en daashe; anti Yaahiwwe akka ishootta isho sanynyeetaaysho lehatto'e piitase an aappadaassina a xatta Aprihaami ka Hisaaqi ka Yayqoopi daassata xaxade sedeey, karopa kala ka qapada.’”

Akkima Muuse samayta qara saarra Shuume

⁹ Muuse isamayta kide, “Etoosenetiiyyi anti in ishina kide, ‘Xawwaati ishin haadatta an ettansho;

¹⁰ Yaahiwwe Waaqaayshin i'ishin lekshe; tin, awwe akka a hiikka moonta mina lekaatten.

¹¹ Amma nefo Yaahiwwe Waaqa a aappadaassina, akka kippeeta ishina daashe qara'e, a harka kuma ishin leksho ka ishina sako!

¹² Ma xawwaati anti attan rakkootaayshin ka haadetaayshin isho qoojqoojaayshin haadatta ettansha?

¹³ Semmalla ishina kaffaassin pisa oppaayye, ookka ka a qalpeeta qapa isho a ulfeessame reexada; anka saarra kodo ka ishin qara shuumo.’

¹⁴ Ishina ka ana kiitene, ‘Wa kiite qara kodeeta i'ino paxaari.’

¹⁵ Anti ka kaffaassin oppaayye mattiyyaassin a ookka a ulfeessame qeede ka ishin qara'e, shaalaqadda ka motoloqadda ka amsalaqadda isho assiralaqadda kode ka shuume ka saarra kaffa kuli ishina shuume.

¹⁶ Ka sitiiyyi taanynyadaassin ajaje ka ishootta kide, ‘Deexa a hellaassin a piita dakkaysada ka deexa a hellaassina lakki otantoppa co taaki innaassina a piita isho kalayta otantoppa co taantetan mura.

¹⁷ Ka deexa muraappaayye qatayma in kodan; a shakka ka a kutta piisa olmina dakkaysada. Firteeta, firteeta Waaqa'ey, fuula nama tura in tammaqan; ka deexa a ishin qaropeela co ana turopan xooya, anti ka dakayo ka muro.’

¹⁸ Ka sitiiyyi wa koda ishin parpaaccisnitta piisa ishina lele.

Akkima lettissampaya erkamen

¹⁹ Anka akka Yaahiwwe Waaqinno ino ajaje qarae irroota Siinaatiiyyi xaane ka akka akkiten mina'e, koommayse palda ka orra fuurinno pisa oppan tarpine ka pora piitase kunkunnawwa qapto a Amoorata opa annon deene ka Qaades- parne kayne.

²⁰ Anti ka ishina kide, “Piitase kunkunnawwa qapto a Amoorata a Yaahiwwe Waaqinno ino daasho oppa ikkayten.

²¹ Tin Yaahiwwe Waaqaayshin ipiitase i'ishina daashe; semmalla akka Yaahiwwe Waaqa a aappadaassina turan ana lele qara'e, oppopa kulla ka qapada; ka in fuuran ka in tammaqan.’

²² Sekkamma piisani ana kapopa deeten ka kiitene, ‘Akka ino piitase leettishan ka qoota poran oppan anno isho katamadda an oppan tarpinaati desa nessan ino oorane'e isturandesa orra erkina.’

²³ Dikattose ka ana paxaarnaade; anka kaffa oppa nama takka takka qeede ka ishin oppa nama kudanka lakki reexe.

²⁴ Ishootta ka aanen ka piitase a kunkunnawwa kayen ka haka kirrase koke a Eshkooliti aanen ka piitase lettishen.

²⁵ Ka piitasetiiyyi harkadaasso oppa dalta luukkawwa qaqqapaden ka ino kapopan de'en ka nessan ino kalen ka kidene, ‘Piita a Yaahiwwe Waaqinno ino daanno piita paxaara.’

²⁶ Ishina xoori piitose oppopa kalta a heennane ma ajaja a Yaahiwwe Waaqaayshin qara'e tiyya xaaten.

²⁷ Ka tukkannaassin kelandesa moomooten ka kiitene, ‘Yaahiwwe qoota ino needdade malla akka Amoorata ino pirto'e harkaaysho oppopa ino tuukka'e piita Kipsi kara ino sookshe.

²⁸ Hellaasene xanno piita lettishe akkan fuuraan qishshaamoonno'e ino koden ka kiini, orra a oppa kalo ino qara kokkonnuma qapa ka dedderi; katamaddaasso nefo akata kukutti, kawwattaaysho ka illi lettoppa oorta anka irreelaya sanynyeese a Enaaqi eyye kara akkineey, hela maana'en eyyepa anna?’

²⁹ Anka ishina kide, ‘Ishootta tura in fuuran ka in tammaqan;

³⁰ isase ishin tura anno Yaahiwwe Waaqaayshin akka piita Kipsi kara ildaassin tura ishina oranna torpe mina'eew mattaadi asseew ishina torpa.

³¹ Ka akka koommaytoppaayye pora oppa deeten piisaayye haka poroose kaynittan kara'e, a nama innaadi haano mina'e akka Yaahiwwe Waaqaayshin ishin haade i'akkiten.

³² Kadi punu asse koddite nefooyye, Yaahiwwe Waaqaayshin a kippanne.

³³ Isha nefo a pore annittaneeyye isase pora oppan antan ishina akkissa'e ka pora oppa tukkannaassin daapattan ishina fada'e kuyyaateeyye oraartanne ka halkeetteeyye apittan ishin tura aane.’

Akka Waaqa samayta Isira'eeli qatta'e

³⁴ Yaahiwwe ka wa haasawattene dakaye ka miirode ka xaxade ka kide,

³⁵ ‘Piisse paxaara an aappadaasso a xattati daasha xaxade, xeltoose neeqa oppaayye nama takka nefo iltan in akko.

³⁶ Ma Kaalepi inna Yifuuni qoota karittaadi piisan ana Yaahiwwe kamma aane malla, i'akka; anka piisse a loqtan oppa yetade, isha isho sanynyeetaadi daasha.’

³⁷ Yaahiwwe ka ishin minan ana qara miirode ka kide, ‘Atti nefo oppopa a kalto;

³⁸ ma xoori isase ke qaarqaarro Iyyaasu inna Newe i'oppopa kala; akka samayta Isira'eeli piitose qapado'e a kodo ishaay, isha kokkonnayshe.’

³⁹ Sekammaayye Waaqa ka ino piisa kide, ‘Semaliiyyiiw nyooqqawwasene xaayshin a kiinittane nyaapa poojada isho hellaasene xaayshin a paxaara ka a neeqa olkela in upnini, i'oppopa kalan; anka piitose ishootta daasha ikka qapadan.

⁴⁰ Ishina xoori alle tiitaawa ka qinda a pakateeta a tiimatin desa koommaytoppopa aana.’

⁴¹ Ishina ka ana kiitene, ‘Yaahiwwe qara'en juppoota koone; ma amma xoori akka Yaahiwwe Waaqinno ino ajaje qara'e, piitose oppopan tuulla ka ishootta torpina.’ Ka piitase a irrowwa qara pira wa shakka kapa dikten ka piisani mehaddaassin a oranna hidatten ka oranna harmisatten.

⁴² Yaahiwwe ka ana kide, ‘Ishootta lele ka kide, anti ishin olli an kinnaadooy akka nyaapaayshin tura a putammini'i, piitose oppopan tuulan ka ishoottan torpan.’

⁴³ Anti ka ishina lele, ishina ka dakaya tiitten; ka ajaja Yaahiwwe qara tiyyaan xaaten ka isi peepassinanne piitase a kunkunnawwa opa tuulten.

⁴⁴ Amooratase piitase a kunkunnawwa oppa kalto ka ishin torpa tuulte ka a xanta mina ishin qara qitte ka haka katama Hormaati ishin kamma daante ka piita Etoomi kara ishin putte.

⁴⁵ Ishina ka tiitaawten ka fuula Yaahiwwe tura pooyatten; umma Yaahiwwe ullupittaayshin in dakayne ka ishin opa in dakkaysanne.

⁴⁶ Akka se minan Qaadeshi kara a kuttaati jarten.