Mataafa Masmuureta 88 - Mataafa Qulqulloota

Waaqa kapa qaarqaarsa qinsatta (masmuureta kalata a hellaa Qore saara dawampayati' dehaatte)

Kollissa a Iyyisira'elittase Emaani kidammoti

¹ Oo Waaqqo, dinshampaytiyyo Poqallaayyo, halkeetta ka kuyyaatan keepa ullupni.

² Qinseetiyyo a ke kapa kayto; nappaatti ka ullupitiyyo dakayen.

³ Napseetiyyo rakkootanne immakaatte, caattiyyo ka qinda toota opa dehaade.

⁴ A hawloppopa lekkanna oppa'en dikame, ka nama a meella dape kodde.

⁵ Orra a le'e oppopan katame, a leyshene ka hawla kela eeyye dedderaaden, a atti matte ishootta a' qapnini ka harkaaytippa alle' katame' mina'en kodde.

⁶ Atti qaawa akata seka karopa ana katte ka qaawa tukkane ka akata seka karopa ana shuulite.

⁷ Miiraayti ka a kuttati ana qara' ulsaade, uufanditta miiraayti ka ana qara pire.

⁸ An fuuloppa upa' piisa ana kapa sekasse, ka akka ana qara minynyaaqsadane' koote; anka qara pirame, umma kela passatta an ettansho.

⁹ Nyarrahata qaran xaate'e, ildaayyo ilulen, Waaqqo, kuyyaata piisan keepa ullupni ka harkaayyo kepa pappaldinni.

¹⁰ Hela orra le'e'e, iddaxxowwa kooni? Ishootta ka xaani ka ke kalataysanni?

¹¹ Hela xoonaatti ihawla kara' torraammi? Amanumaayti ka piita pateetta oppa' torraammi?

¹² Hela daxxowwaatti itukanta kara upnaysammi? Hanqeellumaayti ka piita orra teymame oppa upnaysammi?

¹³ Oo Waaqqo, anti' xoori keepan ullupanni; ka teykanta karan qinseetiyyo kepa dehanni.

¹⁴ Oo Waaqqo, maana'e alle napseetiyyo kanni? Ka maana ana tura fuulaayti quu'ini?

¹⁵ Anti innume paayyatte rakkoota i'ana payyahisse, anka toota' foolsade; ka tammaqissaaytin miidame ikka ana tura' ollin patte.

¹⁶ Miiraayti a kokkoka ana qara pire, fuurissaayti ka alle ana pashshe.

¹⁷ Ka letta kumma a malxa' mina ana qara pire; ka qinda piisan ana kapa qaadde.

¹⁸ Moottadaayyo isho firiyyo ana kapa issekasse; ka tukkanta patta ana kapa' hattisse.