Mataafa Masmuureta 83 - Mataafa Qulqulloota

Qinseeta paarkaala Isira'eeli akka putamane' qinsatamte

Masmuureta kalata a Asaafi

¹ Oo Waaqqo, jaw in kidan, di'i in kidan ka alle inon diishan.

² Tin are tooye, nyaapa ihorri, a ke needda ka mattaaysho opeela xa'inni.

³ Ka samaytaayti qara kurpa sassapa' kurpaaden, ka isasene karkaayti kela ca qara' suladen.

⁴ Ka olli' kiini, “Xooya ka akka maxxa Isira'eeli lammatta in halaammini'i, mankisteeta koddeetaaysho alle' hattinna.”

⁵ Ka afaa takkanen olli' oorsaden, ka ke qara' xaana'e, olli' kodayteeta kodaden.

⁶ Ishootta orra Etoomi ka a Isma'eeli ka a Mo'api ka a Akkaari

⁷ ka orra Epaali ka a Amooni ka a Amaaleqi ka a Filisteemi isho a Tiroosi.

⁸ Orra Asoori kuli ishootta qudaaw kodde ka hellaa Looti qaarqaarri.

⁹ Akka Miidiyaameta koote mina ishootta kode; ka kirra Qiishooni kara'e, wa Siisaara isho Iyyaapisi qara' koote ishootta qara' kodeew.

¹⁰ Ishootta Entoori kara'e piramen, ka piita qara a miissa' mina' sahamen.

¹¹ Akka Oreepi isho Aseepi mina poqalladdaasso' kode; ka akka Sepaahi isho a Saalmuna'i mina saarraasso' piisa kodeew.

¹² Ishootta i'olli' kiini, “Haminta Waaqa' qeenna ka a xanno' kodanna.”

¹³ Semmalla Waaqqo, kuyyalaytase a puppeeta xa'innitto, ka ukkashshase a xayxayta haano mina ishootta kode.

¹⁴ Ka akka apitta mura kupno mina'e, opaya apitta ka irrowwa pirro mina'e,

¹⁵ atti asseew uruurittaaytin ishootta kamma daane ka puppeetaaytin ishootta tammaqshe.

¹⁶ oo Waaqa akka fuulaayti fadane'e, jeeran ishootta immake.

¹⁷ Haka paraparati a jeeren ka tammaqen ka piramen ka paten.

¹⁸ Ka akkima atti patta Waaqa koddite ka piita piisa qara atti'iw kutti upnaaden.