Mataafa Masmuureta 74 - Mataafa Qulqulloota

Qinseeta a nakayta samayta malla dehaatte (Kollissa Asaafi)

¹ Oo Waaqqo, maana'e haka paraparati asse alle ino katte? Kaharrasene' xaayti deettaaytippa kala' qara'e miiraayti maana'e asse opaye?

² Samaytase' xaayti a' xattaw piddatte, ka kafase koddayyaataayti kodde akka furatte; isho irrootase a Siyyooni a' turan qara kalto nefo matte oorsado.

³ Piitoose lulte a arepadesa we oppa in dehnini oppandesa aane; nyaapa wa tikase' xaayti a qulqulloota' kela ca' piisa nyapalshe.

⁴ Nyaapaayti paapahaayti a qulqulloota oppa uuyanni, ka milikkita'e, oppa' paantiraadi qaatishe.

⁵ Ka orra muroppa qora quura'e erkaha qapade pahan.

⁶ Ka meehaadi a harmuman quda sirene' piisa, erkahadda isho purrishaddaan oppa mammaajen.

⁷ Ka tikaayti a qulqulloota oppa' apitta qapen, ka tikase a kara' maxxaayti halaammo alle nyalshen.

⁸ Ka olli' kidene, “Xooya ka alle iskelopa ishootta oorinna!” Ka porrasene a Waaqa' piisa alle' piitoppa kupen.

⁹ Milikkita an akkininno in co umma xuumampayta in co. Umma sede haka aytamiti akkima asse koddito nama inoppa upo in co.

¹⁰ Oo Waaqqo! Haka aytamiti paarkaala ke qara asse seesan? Ka awta piisa maxxaayti jeershan?

¹¹ Maana'e alle harkaayti oorsanni? Harkaayti a akkitta derayshe ka alle ishootta pire.

¹² Waaqqo, xattaaw atti a' nuqusiyyo; ka piita qara' dina qeette.

¹³ Atti hupnaaytinni pakateeta lakki' qitisse; ka pofadda a pisha kela' tupa matta mammaajte.

¹⁴ Ka matta pofase a pakateeta Lawaataani kidammo nyalxattasse; ka so'adi pinaana koommaytati' damta' daasse.

¹⁵ Ka ella isho fishanna kara pisha urqisse; ka kapan kirrada kukutta' kokisse.

¹⁶ Kuyyaata xaaytiiw, halkeetta xaaytiiw; leya ka piirtota ke kode.

¹⁷ Xeella piita' piisa keew xeelle; ka pona isho soroora atti'iw koote.

¹⁸ Oo Waaqqo, nyaapa akkima seesno; eeppa orra ka maxxaayti onnaan, matte oorsado.

¹⁹ Orrase' xaayti a' jaalannitto pinaana tura in diishan; ka rakkatampayaatti alle in teyman.

²⁰ Kodayteetaayti matta oorsado, piisse qara pora oppa tukkanta kitto piisa oppa tiyyaaw immakaadeey.

²¹ Isasene miidame akka jeerane in kodan; teekolaya isho hiyyeessa ka maxxaayti kalataysaden.

²² Oo Waaqqo! Xa'e, ka isqara tamaakkado, ka akkima eeppa awta piisa ke qara seesnaan dikado

²³ horayta paarkaalaatti ka nyaraasso a awta piisa koopaan anna in teyman.