Mataafa Masmuureta 71 - Mataafa Qulqulloota

Qinseeta a Waaqa kela' koorsatta

¹ Oo Waaqqo! Ke qara'en xasa xaayadeey, pakkanna ana an jeershan.

² Hanqeetaaytin rakkoota kela anan pahe; ka napahataayti anopa oorshe ka ana dinshe.

³ Awta piisa xelsuma a kokkoka ana' kodde; ken shiliyyo a kela' pahana'ey, qoota' shiliyyo ka xelsumaayyo koddite malla, anan paheeta'e, ajaja sookshe.

⁴ Oo Waaqqo, juppoolayta kela anan pahe; ka harka a nyiraamayta ka a karpampayta kela ana tooyte.

⁵ Oo Waaqqo Poqallaayyo, kippeetiyyo keey, an shakki paayyatte ke qara'ewwen xasa xaayade.

⁶ Karitta aayyaanno' kara ke ana qeede; hakan dalade paayyatte, atti ka ana kammeela qapteey; anti awta piisan ke kalataysada.

⁷ Orra lekayta ana qara oppa qawwaawni, atti' xoori xelsumaayyo a kokkoka'e' koddite.

⁸ Afaayyo kalataanne immakaaden; ka awta piisa ulfeenaayti' dawanni.

⁹ Amma nefo keranta kelaayye alle anan katan; ka oto hupniyyo nukkullaadooyye, alle ana an diishan.

¹⁰ Paarkaalaayyo anaaw pora haasawniiy; a ana ikssa ana kaatanna ka anaaw sulanni.

¹¹ Ka olli' kiini, “Waaqa i'alle isha diisheey, umma a ishan paho in cooy, kamma daanna ka isha qapna.”

¹² Waaqqo, ana kapa in sekaadan; Poqallaayyo, jarjartan ana' qaqqaapsado.

¹³ A ana toorra a jeeren ka piramen; a miiddotiyyo faana' piisa ka puyatamen ka palamen.

¹⁴ Anti' xoori awta piisan ke kippada; ka kalata qara'ew kalata ke' kalsha.

¹⁵ Afaayyo awta piisa hanqeellumaaytti torran, kadan punu dikoota an ettaninniniiyyi, dinissaaytiwwin pora haasawada.

¹⁶ Oo Waaqqo Poqallaayyo, in aana ka kodaayti a kokkoka pora salisha; ka hanqeellumaayti pattaaw pora' torra.

¹⁷ Oo Waaqqo! an shakki paayyatte ana kollisse, anka awwe ikki kodaayti a orra qawwannoow pora torrini.

¹⁸ Oo Waaqqo, hakan kokkonnumaatti xelta deenitto lello'e, ka hupnaayti xelta a itturopa xaanitto piisa' upnanno'e, oton kerino ka arreeta dehinnooyye, alle anan diishan.

¹⁹ Oo Waaqqo, hanqeellumaatti akata kutti; atti wa orra qaqawwanna'e' kooteey, Waaqqo, ata ayno ke paha?

²⁰ Akata ana rakkacciiste ka ana payyahisse; ma xoori piita kela ana pootta; ka amma ana caassaaw.

²¹ Ka ulfeena ana' padaawtaaw; ka ana' xasa oorissaaw.

²² Qulqullitto Waaqa Isira'eeli, amanumaayti malla kehaytannen ke kalataysada; ka maasinqootan kalata ke' dawada.

²³ Oo Waaqqo, oton ke' sammarrooyye, hiibbaayyo a kuttati xasoodan; napseese' xayyo a' dinisse kuli ka ililiwta.

²⁴ Isasene miiddamiyyo faana ikojeessamen ka jeereneey, afaayyo awta piisa hanqeetaaytiiw torran.