Mataafa Masmuureta 7 - Mataafa Qulqulloota

Qinseeta firteeta dukaata (Masmuureta a Taawwiti lela a Kuushi, namase a kafa Piniyaami minan Waaqa' dawade)

¹ Oo Waaqqo Poqallaayyo! Ke qara'en xasa xaayanniiy, a pora ana daanna' piisa kela ana qaarqaare ka anan pahe.

² Taakiti, a karma' mina'e ana yuutadan; ka qoota nama anan paho in kinnin malla, ana tuuqadan.

³ Oo Waaqqo Poqallaayyo! Oton seden kodeeyye, dapa ka ana qara' akkaadeeyye,

⁴ anka a paxaarumta ana' kodeeti, a neeqa' oorsheeyye, taaki paarkaalaayyo patta' miiddeeyye,

⁵ paarkaalaayyo a ana kamma daanen ka ana qapen; ka caattiyyo piita' katen ka qara loqqaan aanen. Ka ulfeeniyyo kuyyan lahen.

⁶ Oo Waaqqo! Miiraaytin xa'e; ka miira paarkaalaayyo ana qara oorshe, oo Waaqqo! Xa'e; ka akka dukaata muramto ajaje.

⁷ Xora samayta a ke kapa tiitaysho; ka atti moonte xata ishootta mukshe.

⁸ Waaqa samayta qara'e farata; oo Waaqqo! Akka hanqeellumaayyo mina'e ana' dukaata mure; oo ke a piisa qara qapo, akka dukaatiyyo nefo qara'e ikka ana' koddito.

⁹ Oo hanqeellayto Waaqqo! Ke a karitta isho dikatta nama kara qorro; neequmta ukkuttowwa alle' pashshe; ka hanqeellaya japaacciise.

¹⁰ Waaqa isase piisa qara qapo kontaleetiyyo; ise a karitta fayya qapaatin pahano.

¹¹ Waaqa taanynya a dukaata; ka awta piisa wa neeqa qara' miiroonni.

¹² Ka oto oorri in kinniniiyyi, koraatetaadi kapa' laajanni; ka paantaadi tittini ka pokka harmisanni.

¹³ Ka meeha a naman ikannaan kapa' dikkisanni; ka lawaadi qara apitta qapanni.

¹⁴ Ha juppoolayta neequmta hinni; ka nyiraamuma karittan haani; ka darta xaayni.

¹⁵ Isha orra tura'e, qaawa seka qonni; ka qaawase a qote karopa, isha'ew pi'ini.

¹⁶ Rakkoota, mattaadi qaropaaw oorri; nyiraamumaadi ka nahtittaadi qaropaaw tiitaawni.

¹⁷ Hanqeellumaadi mallan Waaqa kalataysada; ka maxxa a Waaqase' piisa qaropa qapooti masmuuretan saarsha.