Mataafa Masmuureta 57 - Mataafa Qulqulloota

Qaarqaarsa Waaqa' fadeeta (Taawwiti a Sa'oli tura qahe ka rahana kara' dekadeeyye, masmuureta a saara dawampayaati' dehayshe)

¹ Ana maare, Waaqqo ana suraysado. Napseetiyyo ke qare xasa xaayatteey, haka pateettose tarpinitto kara'e, kaatta xoollaatti kela'en koorsada.

² Anti Waaqase kutta, ka we' piisa ana' dikkinno opan ullupa.

³ Ikka moonte xata erka ka ana dinsha; ka isasene ana rakkacciise ana qara fukka; Waaqa jaalalaadi a pirama in qapnini ka dukaataadi erka.

⁴ Napseetiyyo karmada a orra damma otantoppa'e pi'ite; ilkaasso akka oranna ka a lawadda' mina, arrapaayshokan koraateta a qarta qapto mina.

⁵ Oo Waaqqo, moontada piisa qaropeela kukuttado! Ulfeenaayti ka piita piisa qara piro!

⁶ Paarakaaladdaayyo turuura ana tura' qaasen; anka xasa mure ka matta raa'ishe. Ishootta' qaawa ana tura' qoten, ma xoori ishoottaaw karopa seehe.

⁷ Sataatiyyo ijapaanni, oo Waaqqo sataatiyyo ijapaanni; in ke saarsha ka ke' sammara.

⁸ Napseetiyyo, impase! Kehaaytiyyo isho maasinqootiyyo, ishina' nefo xa'a! Anti nefo paraappannen xa'aay.

⁹ Waaqqo, samayta piita' tura'en ke kalataysada; ka orra tura'e, ke' sammara.

¹⁰ Ha jaalalaatti a pirama in qapnini illi moonta kayniiy, amanumaayti ka illi oorara oora.

¹¹ Waaqqo, moontada piisa qaropeela kukuttado! Ulfeenaayti ka piita piisa qara piro!