Mataafa Masmuureta 52 - Mataafa Qulqulloota

Waaqa orra neeqa qara'e faranni (A Etoomittase Tooyqi Sa'oli kapoopa de'e ka kide, “Ha Taawwiti Apemeleki kapopa aane” Ka leleeyye, masmuureta a Taawwiti saara a orra masmuureta sammarro tura' dawade)

¹ Jaalala Waaqa awta piisa akka eeyyew caan a' upto kapaayye, atti irreelayto, maana'e neequmtannew isi jeejjini?

² Arrapaayti neequmtaaw ollopa sukni; ka akka kooshshota qarta qapto mina'e sassapaan orra quurri.

³ Atti' paqaarumta kapa neequmta; ka hanqeeta haasawatta kapa dartaaw' jaalanni.

⁴ Atti arrapa sassapa ka haasa pateetta'ewwe' jaalanni,

⁵ semmalla, Waaqa takka'e alle ke pashsha; ka tikaayti kara alle ke shukka; ka piita a orra co oppaayye alle ke tawsha.

⁶ Hanqeellaya ka sede akkan ka fuuran; ka isha qara xosalan ka kidane,

⁷ “Tin eeyye, namase Waaqa qara isi in xaayannin, ka teyantaadi a koopte kippade, ka wa neeqa' kodeeta kamma' kame, eeyye tooya.”

⁸ Anti' xoori tika Waaqa' karaayye, ekerta ilaawa'en paha; ka haka paraparati' jaalalasene a Waaqa' pirama in qapnini qara' xasa xaayanni.

⁹ Atti kodoose a ana' koote malla, haka paraparatin ke kalataysada. Maxxaayti kippatta wa paxaara'ey, qulqullowwaatti tura'en paqaarumtaayti torra.