Mataafa Masmuureta 5 - Mataafa Qulqulloota

Qinseeta a teykanta (Masmuureta a Taawwiti saara a orra a masmuureta dawnootin luuttotan dawe)

¹ Oo Waaqqo! Waan kiina' dakaye; ka quujattiyyo matte qapnaado.

² Nuqusiyyo ka Waaqiyyo! kepan qinsanniiy, ullupittiyyo dakaye.

³ Oo Waaqqo! atti teykanta karanne nessiyyo' dakayni; anti teykanta karannen qinseetiyyo ke tura' dehanni ka ke mina asanni.

⁴ Atti a Waaqa juppootan xasoonni in kinnin; umma ukkuttowwa ke olli in kallaadan.

⁵ Jeejjampaya fuulaayti tura qa'anni in caan; a neequmta koona' piisa inneeddita.

⁶ a darta haasawanna, alle' patinni; Waaqa orra diika koono ka orra sassapanno i'ifanni.

⁷ Anti' xoori, diissataayti a koopte minannen tikaaytipa kulla; ka ke tura fuuretan, qinda tikaayti a qulqulloota opa sakatada.

⁸ Oo Waaqqo! Paarakaalaayyo malla, hanqeetaaytin ana marra'e, ka saantaayti ana tura' qajeelshe.

⁹ Afaasso oppaayye dukaata in kitto karittaaysho neequmtanne immakaade; koomaraasso hawla a in kiyyammin mina, afaa daatanne orra sassapanni.

¹⁰ Oo Waaqqo! Ishootta ke qara'e xa'eneey, dapa ishootta qara' mure; sullataaysho ka ishoottaaw teyto; juppootaysho a koopte minan alle ishootta pashshe.

¹¹ Ma xoori, a ke kelopa qahana' piisa a xasooden; ka haka paraparati' xasan ke' sammaren; qoota atti ishootta' xelsuma koddite malla, a maxxaayti jaalanna kuli, a ken xasooden.

¹² Oo Waaqqo! Atti hanqeelaya'e' sakni; ka ulfeenaayti a kutta akka kontaleeta' mina ishootta qara' qapte.