Mataafa Masmuureta 41 - Mataafa Qulqulloota

Qinseeta nama a paaqa (Masmuureta a Taawwiti saara a orra masmuureta sammarroti'i,)

¹ Nama teekolayta' dikanno, oo atta oloode! Kuyyaata rakkootatiiyyi, Waaqa asseew ishan paha.

² Waaqa isha tooyta; ka isha caaysha; ka piita qara ishi' saka; umma harka paarkaalaadi oppopa isha in daasho.

³ Oton ipaaqni ka loshsha qara caayye, Waaqa isha adada; ka dinsha ka qoollaappa isha xaasha.

⁴ Anti in qinsade ka kide, oo Waaqqo! ana suraysado; anti ke tura'en juppoota kodeey, ana dinshe.

⁵ Paarkaaladdaayyo neequmtaaw ana qara' haasawanni; ka kiini, “Kaata aytamiiyyi to'a, maxxaadi ka piita qara pata?”

⁶ Nama ana tooyya' deeno, okoto afaa harminni; ka karittaadippa'e, neequmta ollopa qapsanni; ka oto xata sookooyye, anaaw haasawni.

⁷ Paarkaaladdaayyo piisa olli' kale ka qootiyyo desa hushushaytan olli' torrini; ka neequmtaaw ana qara' sulanni.

⁸ Ka kiini, “Paaqa neeqa'e isha qapeey, amma desa qooloppa in xa'o.”

⁹ Moottiyyo an kippanno an toma takkoppa ollin damme kuli, ana qara paarkaallummaatan xa'e.

¹⁰ Oo Waaqqo! Atti' xoori ana suraysado; ka akkan ishootta qara haalota pooyyo'e, ana xaashe.

¹¹ Paarkaalaayyo qoota ana punni in kinnin malla, akka ana jaalannitto sedennen upa.

¹² Qoota qaja an qapnin malla, ana kammeela iqqapte; ka haka paraparati' fuulaayti tura ana qaatisse.

¹³ Waaqa Poqalla a Isira'eeli pare desa haka paraparati a ulfeessamo. Ameen! Ameen!